اكىم وليمپيادا جۇلدەگەرى نۇربەك ورالبايعا كولىك مىنگىزىپ، جاتتىقتىرۋشىسىنا قارجىلاي سىي جاسادى
استانا. KAZINFORM - استانا قالاسىنىڭ اكىمى جەڭىس قاسىمبەك Instagram پاراقشاسىندا پاريج وليمپياداسىنىڭ كۇمىس جۇلدەگەرى نۇربەك ورالباي مەن ونىڭ جاتتىقتىرۋشىسىنا ارنايى سىيلىق بەرىلگەنى تۋرالى جازدى، دەپ حابارلايدى ەلوردا اكىمدىگىنىڭ رەسمي سايتى.
«پاريجدە وتكەن وليمپيادا ويىندارىنىڭ كۇمىس جۇلدەگەرى نۇربەك ورالبايمەن جانە ونىڭ جاتتىقتىرۋشىسى اسقار ەركەبايەۆپەن كەزدەستىم. نۇربەك ورالباي ەلىمىزدىڭ ءارى قالامىزدىڭ اتىنان سىنعا ءتۇستى. ونىڭ بۇل جەتىستىگىنىڭ ارتىندا مىڭداعان ساعاتتىق جاتتىعۋلار، سول سياقتى وتباسىنىڭ، جاتتىقتىرۋشىسىنىڭ جانە تۋىستارىنىڭ قولداۋى مەن وزىنە دەگەن سەنىمى جاتىر. دەمەۋشىلەر ەسەبىنەن نۇربەك ورالبايعا Land Rover Defender اۆتوكولىگىنىڭ كىلتى، ال جاتتىقتىرۋشىسىنا 10 ميلليون تەڭگەنىڭ سەرتيفيكاتى تابىس ەتىلدى. سپورتشىلارىمىزعا بيىك-بيىك شىڭداردى باعىندىرۋىن تىلەيمىن!» - دەپ جازدى جەڭىس قاسىمبەك.
ەسكە سالا كەتەيىك، بوكستان ەرلەر اراسىندا 80 كەلى سالماقتا نۇربەك ورالباي پاريج وليمپياداسىنىڭ كۇمىس جۇلدەگەرى اتاندى.