ماكرون جەكسەنبى كۇنى كەشكە ەلدەگى جاپپاي تارتىپسىزدىككە بايلانىستى حالىققا تەلەۇندەۋ جاسادى. ول جاعدايدى «اسا كۇردەلى كەزەڭ» دەپ اتاپ، سەنبى كۇنى فرانسيانىڭ ءبىرقاتار قالاسىندا نارازىلىق اكسيالارى توناۋ، قيراتۋ جانە پوليتسيامەن قاقتىعىسقا ۇلاسقانىن ايتتى.
پرەزيدەنتتىڭ سوزىنشە، راديكالدى سولشىل توپتاردىڭ وكىلدەرىنە كوپتەگەن قۇقىق بۇزۋشى قوسىلىپ، قالالاردا جاپپاي زورلىق-زومبىلىق جاساعان. دۇكەندەر تونالىپ، ليموج، ليون جانە مارسەل قالالارىنداعى قوعامدىق عيماراتتار مەن مەريالارعا شابۋىل جاسالعان. جۇزدەگەن پوليتسيا قىزمەتكەرى مەن جاندارم جاراقات العان.
—- مۇنى ەشبىر اقتاۋعا دا، تۇسىندىرۋگە دە، كەشىرۋگە كەلمەيدى. بۇگىن كەشكە ءبارىمىز اشۋ مەن ۇيات سەزىمىن باستان كەشىرىپ وتىرمىز، - دەدى فرانسيا پرەزيدەنتى.
سونىمەن قاتار ماكرون بەيبىت نارازىلىق بىلدىرۋشىلەردى قوعامدىق ءتارتىپتى بۇزعاندارمەن تەڭەستىرۋگە بولمايتىنىن اتاپ ءوتتى. ونىڭ ايتۋىنشا، اكسياعا قاتىسۋشىلاردىڭ ءبىر بولىگىنىڭ زاڭدى تالاپتارى بولعانىمەن، توناۋ مەن قيراتۋعا بارعاندار جاۋاپ بەرۋى كەرەك.
— بۇلىك شىعارعاندار مەن زورلىق-زومبىلىق جاساعاندارعا قاتىستى تاباندى ارەكەت ەتەمىز. تىڭداۋ جانە ديالوگ جۇرگىزۋ السىزدىك نەمەسە جازاسىزدىق دەگەندى بىلدىرمەيدى، — دەدى ول.
پرەزيدەنت قۇقىق بۇزۋشىلاردى جاۋاپقا تارتۋدى تالاپ ەتىپ، كەلتىرىلگەن شىعىننىڭ وتەلۋى كەرەكتىگىن مالىمدەدى. سونداي-اق قۇقىق قورعاۋ ورگاندارىنا، اكىمدەرگە، زارداپ شەككەن كاسىپكەرلەر مەن قولونەرشىلەرگە قولداۋ ءبىلدىردى.
دۇيسەنبىدەن باستاپ پرەمەر-مينيستر سەباستەن لەكورنيۋ زارداپ شەككەندەرگە جەدەل كومەك كورسەتۋ جونىندەگى داعدارىس توبىن باسقارادى. ماكرون ىشكى ىستەر ءمينيسترى لوران نۋنەستى قوسا العاندا، ۇكىمەت مۇشەلەرىنە وقيعادان ءتيىستى قورىتىندى شىعارۋدى، اسىرەسە قاۋىپ-قاتەردى الدىن الا انىقتاۋ جانە بارلاۋ جۇمىستارىنا قاتىستى شارالاردى قايتا قاراۋدى تاپسىردى.
قاجەت بولعان جاعدايدا پرەفەكتىلەر مەن اكىمدەر قوعامدىق عيماراتتار مەن دۇكەندەردى قورعاۋ ءۇشىن جەكەلەگەن جيىندارعا تىيىم سالا الادى. الداعى كۇندەرى پرەمەر-مينيستر ساياسي پارتيالار، كاسىپوداقتار جانە ستۋدەنتتەر وكىلدەرىمەن كەزدەسىپ، زورلىق-زومبىلىقتى ايىپتاۋ جانە جاعدايدى شەشۋ جولدارىن تالقىلايدى.
التى ايدان كەيىن وتەتىن پرەزيدەنتتىك سايلاۋدى ەسكە سالعان ماكرون ەلدى ءتارتىپ پەن سابىرعا شاقىردى. ونىڭ پىكىرىنشە، ساياسي پىكىرتالاستار كوشەدەگى زورلىق-زومبىلىق ارقىلى ەمەس، ساياسي پارتيالار اراسىنداعى اشىق پىكىر الماسۋ ارقىلى ءوتۋى كەرەك.
فرانسيا ىشكى ىستەر مينيسترلىگىنىڭ مالىمەتىنشە، 17 -قازانداعى نارازىلىق اكسيالارىنا ەل بويىنشا شامامەن 550 مىڭ ادام قاتىسقان. ەكى مىڭنان استام ادام ۇستالعان.
ماكروننىڭ تەلەۇندەۋى ەليسەي سارايىندا پرەمەر-مينيسترمەن جانە ءتيىستى مينيسترلەرمەن وتكىزگەن كەڭەسىنەن كەيىن جاسالدى.
17 -قازاندا فرانسيانىڭ تۇكپىر-تۇكپىرىندە «سارى كەۋدەشەلىلەر» قوزعالىسىنىڭ، جوعارى سىنىپ وقۋشىلارىنىڭ، ستۋدەنتتەردىڭ، فەرمەرلەر مەن كاسىپوداقتاردىڭ قاتىسۋىمەن نارازىلىق اكسياسى ءوتتى.
فرانسيا ىشكى ىستەر مينيسترلىگىنىڭ مالىمەتىنشە، شەرۋلەرگە شامامەن 550 مىڭ ادام قاتىسقان. ونىڭ 110 مىڭعا جۋىعى پاريجدە بولعان. ال كاسىپوداقتاردىڭ، سونىڭ ىشىندە جالپى ەڭبەك كونفەدەراتسياسىنىڭ (ك ج ك) وكىلدەرى قاتىسۋشىلار سانى 800 مىڭعا جەتكەنىن مالىمدەدى.
سەنبى كۇنى كەشكە ەممانيۋەل ماكرون الەۋمەتتىك جەلىدەگى پاراقشاسىندا «رەسپۋبليكادا زورلىق- زومبىلىققا ورىن جوق» دەپ جازدى. ول پرەفەكتۋرا عيماراتتارىن، دۇكەندەر مەن اكىمدىكتەردى بۇلدىرگەن تارتىپسىزدىككە قاتىسۋشىلاردىڭ جاۋاپكەرشىلىككە تارتىلاتىنىن ايتىپ، قۇقىق قورعاۋ ورگاندارى قىزمەتكەرلەرىنە قولداۋ ءبىلدىردى.
فرانسيا پرەمەر-ءمينيسترى سەباستەن لەكورنيۋ زورلىق-زومبىلىق دەڭگەيىن «وتە جوعارى» دەپ باعالاپ، بيلىك «ءوزىن قورقىتۋعا جول بەرمەيتىنىن» مالىمدەدى.
ايتا كەتەلىك پاريج كوشەلەرىن تازالاۋعا كوممۋنالدىق قىزمەتكەرلەر ءۇش ەسە كوپ جۇمىلدىرىلدى.