ءبىر تاراپ اكەنىڭ قىزىن ەرنىنەن ءسۇيۋىن ورىنسىز دەپ ساناسا، ەندى ءبىرى مۇنداي پىكىرلەر ەر ادامداردى ءوز بالاسىنان الشاقتاتىپ جىبەرۋى مۇمكىن ەكەنىن ايتادى.
وسى تۇستا ماڭىزدى سۇراق تۋىندايدى: اكە قىزىن قالاي جاقسى كورۋى كەرەك جانە بالاعا دەگەن تابيعي مەيىرىم مەن جەكە شەكارانى بۇزۋدىڭ اراجىگىن قالاي اجىراتامىز؟ وتباسىلىق پسيحولوگ ەرجان مىرزابايەۆتىڭ ايتۋىنشا، بۇل ماسەلەدە ەڭ الدىمەن بالانىڭ جاس ەرەكشەلىگىن، پسيحولوگيالىق جانە فيزيولوگيالىق دامۋىن ەسكەرۋ قاجەت.
فيزيكالىق جاقىندىقتىڭ فورماسى وزگەرۋى كەرەك
پسيحولوگتىڭ پىكىرىنشە، كىشكەنتاي كەزىندە اتا-اناسىنىڭ قۇشاعىندا ءوسىپ، ۇنەمى ەركەلەپ جۇرەتىن بالا ەسەيگەن سايىن ونىڭ جەكە شەكاراسى دا قالىپتاسا باستايدى. سوندىقتان اتا-انا بۇرىنعىداي فيزيكالىق جاقىندىقتى ساقتاعانىمەن، ونىڭ فورماسىن وزگەرتۋى كەرەك.
قىز بالا وسكەن سايىن، اسىرەسە وتپەلى كەزەڭدە فيزيولوگيالىق جانە پسيحولوگيالىق تۇرعىدان داميدى. ونىڭ جەكە شەكاراسى قالىپتاسىپ، كەڭەيە تۇسەدى. اناسى دا، اكەسى دە وسىنى ۇمىتپاۋى كەرەك. بۇرىن كىشكەنتاي بوپەنى قولىڭىزدان تاستاماي، قۇشاقتاپ، باۋىرىڭىزعا باسىپ جۇرسەڭىز، بالا ەسەيگەن سايىن فيزيكالىق جاقىندىقتى ازايتىپ، ونىڭ فورماسىن وزگەرتۋ قاجەت، - دەيدى وتباسىلىق پسيحولوگ.
ماماننىڭ سوزىنشە، اكە مەن قىز اراسىنداعى مەيىرىمدى قارىم-قاتىناس توقتاماۋى كەرەك. ءبىراق بالانىڭ جاسىنا ساي فيزيكالىق جاقىندىقتىڭ تۇرلەرىن تاڭداعان ءجون. مىسالى، قىزىن ماڭدايىنان، بەتىنەن ءسۇيۋ، شاشىنان يىسكەۋ، قۇشاقتاۋ - اكەلىك مەيىرىمدى ءبىلدىرۋدىڭ تابيعي جولدارى.
مۇنداي قارىم-قاتىناس بالاعا ءوزىن قاۋىپسىز سەزىنۋگە كومەكتەسەدى. سونىمەن بىرگە اتا-انا بالانىڭ دەنەسىنە قاتىستى جەكە شەكارالاردى كىشكەنتاي كەزىنەن قالىپتاستىرۋى قاجەت.
ءيا، اكە رەتىندە بالانى ءسۇيىپ، قۇشاقتايمىز. ءبىراق ماڭدايىنان ءسۇيىپ، يىسكەۋگە، بەتىنەن سۇيۋگە، شاشىن يىسكەۋگە، قۇشاقتاۋعا بولادى. وسە كەلە وسى ادەت قالىپتاسۋى كەرەك. ءتۇرلى سەزىم وياتۋى مۇمكىن ارەكەتتەردەن الىستاعان دۇرىس، - دەيدى ەرجان مىرزابايەۆ.
بالانىڭ قارسىلاسپاۋى - بارىنە كەلىسىم بەرگەنى ەمەس
پسيحولوگ اتا-انالار جيى ەسكەرە بەرمەيتىن تاعى ءبىر ماسەلەگە نازار اۋدارادى. ول - بالانىڭ فيزيكالىق جاقىندىققا قاتىستى رەاكسياسى.
كەيدە اتا-انالار بالانىڭ قارسىلىق بىلدىرمەۋىن، ۇندەمەي تۇرۋىن نەمەسە كۇلىپ قابىلداۋىن ارەكەتتىڭ دۇرىس ەكەنىنە دالەل رەتىندە قابىلدايدى. الايدا بۇل ءاردايىم بالانىڭ شىن قالاۋىن بىلدىرمەيدى.
بالانىڭ رەاكسيالارى دا ماڭىزدى. بالا ۇناتىپ جاتىر، قارسىلىق بىلدىرمەدى دەپ ويلاۋ - قاتە، - دەيدى مامان.
بالالار كەي جاعدايدا وزىنە ۇنامايتىن ارەكەتكە قارسىلىق بىلدىرە الماۋى مۇمكىن. اسىرەسە وتپەلى كەزەڭدەگى قىز بالالار ءوز سەزىمدەرىن تولىق ءتۇسىنىپ، جەكە شەكاراسىنىڭ بۇزىلىپ جاتقانىن بىردەن اڭعارا بەرمەيدى.
سوندىقتان اتا-انا بالانىڭ ۇنسىزدىگىن كەلىسىم دەپ قابىلداماۋى كەرەك. كەرىسىنشە، ونىڭ كوڭىل كۇيىنە، دەنە قيمىلىنا، ءوزىن قالاي سەزىنىپ تۇرعانىنا نازار اۋدارعانى ءجون. ەگەر بالا قۇشاقتاۋدان باس تارتسا نەمەسە سۇيگەندى قالاماسا، ونىڭ تاڭداۋىن قۇرمەتتەۋ قاجەت.
بۇل جەردە ماڭىزدىسى - اكە مەن قىزدىڭ اراسىنداعى سۇيىسپەنشىلىكتى شەكتەۋ ەمەس، بالانىڭ دەنەسىنە قاتىستى شەشىم قابىلداۋ قۇقىعىن قالىپتاستىرۋ.
وتپەلى كەزەڭدەگى جاۋاپكەرشىلىك
قىز بالانىڭ وتپەلى كەزەڭى - فيزيولوگيالىق وزگەرىستەرمەن قاتار، پسيحولوگيالىق تۇرعىدان دا كۇردەلى ۋاقىت. بۇل شاقتا بالا ءوز دەنەسىندەگى وزگەرىستەردى، جاڭا سەزىمدەردى، اينالاسىنداعى ادامدارمەن قارىم-قاتىناسىن ەندى تۇسىنە باستايدى.
كەيدە وزىنە جاقىن ادامنىڭ ارەكەتى دۇرىس پا، الدە جەكە شەكاراسىنان اسىپ كەتتى مە دەگەن سۇراققا جاۋاپ بەرە الماۋى مۇمكىن. ءتىپتى ۇلكەندەردىڭ ارەكەتىنە قارسى تۇرۋعا باتىلى جەتپەۋى دە ىقتيمال.
وسى سەبەپتى پسيحولوگ بالانىڭ جەكە شەكاراسىن قورعاۋ مىندەتىن ونىڭ وزىنە ارتىپ قويۋعا بولمايتىنىن ايتادى.
وتپەلى شاقتا قىز بالالار ءۇشىن كەيبىر سەزىمدەر جاڭا بولۋى مۇمكىن. جەكە شەكارالارى بۇزىلىپ جاتقانىن بايقاماي دا قالادى. تانىس ادامنىڭ شەكاراسىنان وتكەنىنىڭ دۇرىس نەمەسە قاتە ەكەنىن تۇسىنبەي قالۋى مۇمكىن. سوندىقتان بالاعا جاۋاپكەرشىلىك جۇكتەمەۋ كەرەك. اتا-انا رەتىندە بالاعا سەپاراتسيا جاساپ، دۇرىس سۋبورديناتسيا قالىپتاستىرۋ جاۋاپكەرشىلىگىن وزىمىزگە الۋىمىز قاجەت، - دەيدى ەرجان مىرزابايەۆ.
ياعني بالاعا «نەگە قارسى بولمادىڭ؟»، «نەگە ايتپادىڭ؟» دەپ كىنا ارتۋدىڭ ورنىنا، اتا-انا ونىڭ قاۋىپسىزدىگىن قامتاماسىز ەتۋى كەرەك. قىز بالا ءوز دەنەسىنە قاتىستى قانداي ارەكەتكە كەلىسەتىنىن، قانداي ارەكەتكە كەلىسپەيتىنىن ءبىلۋى ماڭىزدى. سونىمەن قاتار ونىڭ «جوق» دەگەن جاۋابىن جاقىندارى دا قۇرمەتتەۋى كەرەك.
اكە قىزىمەن قانداي تاقىرىپتا سويلەسۋى كەرەك؟
اكە مەن قىزدىڭ قارىم-قاتىناسى تەك فيزيكالىق جاقىندىقپەن ولشەنبەيدى. بالامەن سىرلاسۋ، اڭگىمەلەسۋ، بىرگە ۋاقىت وتكىزۋ، ونىڭ قىزىعۋشىلىعىنا كوڭىل ءبولۋ دە اكەلىك سۇيىسپەنشىلىكتىڭ ماڭىزدى بولىگى.
قىز بالا وزىنە قيىندىق تۋدىرعان كەز كەلگەن ماسەلەنى اتا-اناسىنا اشىق ايتىپ، كومەك سۇراي الۋى كەرەك. اسىرەسە ءوزىن مازالاعان جاعدايدى جاسىرماي جەتكىزۋىنە مۇمكىندىك بەرەتىن سەنىمدى ورتا قالىپتاستىرۋ قاجەت.
دەگەنمەن وتباسىلىق پسيحولوگ اكە مەن قىز اراسىنداعى اڭگىمەلەردىڭ دە بەلگىلى ءبىر شەكاراسى بولعانى دۇرىس دەپ ەسەپتەيدى. ونىڭ پىكىرىنشە، ينتيمدىك تاقىرىپتاردى اناسى قىزىمەن، ال اكەسى ۇلىمەن تالقىلاعانى ءجون.
بالامەن سىرلاسۋ، اڭگىمەلەسۋ، ۋاقىت وتكىزۋ دە ماڭىزدى ءرول وينايدى. بالا قالاعان پروبلەماسىن اتا-اناسىنا اشىق ايتىپ سويلەسە الۋى كەرەك. ءبىراق قىز بالا اكەسىمەن ينتيمدىك تاقىرىپتاردى سويلەسپەيتىنى سياقتى، اكەسى دە بۇل تاقىرىپتاردى قوزعاماۋى كەرەك. كەيبىر اكەلەر «جىگىتتەر جايلى قىزىممەن اشىق سويلەسەمىن» دەپ الەۋمەتتىك جەلىگە جازىپ جاتادى. بۇل دۇرىس ەمەس. اناسى قىزىن بۇل تاقىرىپتا جاقسى تۇسىنەدى. ال اكەسى ۇلىمەن سويلەسۋى كەرەك، - دەيدى پسيحولوگ.
اكەنىڭ قىز بالا ومىرىندەگى ورنى ەرەكشە. قىزىنا قامقورلىق كورسەتۋ، ونى قولداۋ، جەتىستىگىنە قۋانۋ، قيىن ساتىندە جانىنان تابىلۋ - اكەلىك سۇيىسپەنشىلىكتىڭ نەگىزگى كورىنىستەرى. قىز بالا اكەسىنىڭ جانىندا ءوزىن قاۋىپسىز سەزىنىپ، ونىڭ قولداۋىنا ءاردايىم سەنە الۋى كەرەك.
الايدا بالانىڭ ەسەيگەنىن قابىلداپ، ونىڭ جەكە كەڭىستىگىنە قۇرمەتپەن قاراۋ دا - اتا-انالىق جاۋاپكەرشىلىك. اكە قىزىنان الىستاپ، مەيىرىمىن جاسىرۋى كەرەك ەمەس. تەك قىزىنىڭ جاسىنا، پسيحولوگيالىق دامۋىنا جانە جەكە قالاۋىنا ساي قارىم-قاتىناس ورناتۋى قاجەت.
ويتكەنى بالاعا سۇيىسپەنشىلىكتى سەزىندىرۋ مەن ونىڭ شەكاراسىن قۇرمەتتەۋ - ءبىر-بىرىنە قارسى ۇعىمدار ەمەس. كەرىسىنشە، ەكەۋى قاتار جۇرگەندە عانا اتا-انا مەن بالا اراسىندا سەنىمدى ءارى قاۋىپسىز قارىم-قاتىناس قالىپتاسادى.
el.kz