اجىراسقان، تۇل، جەسىر: ەلىمىزدە قانشا وتباسى بار؟

 قازاقستاندا قىركۇيەكتىڭ ەكىنشى جەكسەنبىسىندە وتباسى كۇنى اتاپ وتىلەدى. ەلىمىزدە قانشا جالعىزباستى انا مەن اكە بار، قانشا وتباسى بار؟ Massaget.kz ءتىلشىسى انىقتاپ كوردى. 

ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ مالىمەتىنشە، بيىل قاڭتاردان ماۋسىمعا دەيىن قازاقستاندا 57,5 مىڭ جاڭا وتباسى پايدا بولعان. ال بىلتىر وسى كەزەڭدە 53,8 مىڭ نەكە تىركەلگەن ەدى.

2021 -جىلعى اقپارات بويىنشا، ەلىمىزدە 8 ميلليوننان اسا ادام نەكەدە تۇر، ونىڭ 800 مىڭعا جۋىعى نەكەسىن تىركەمەگەن.

ەلىمىزدە تۇل ەر ادام سانى - 130 مىڭ، جەسىر ايەل - 600 مىڭعا جۋىق. نەكەسىن بۇزعان ادام سانى 800 مىڭعا جۋىق.

بۇدان باسقا، قازاقستاندا 15-19 جاس ارالىعىندا 35 تۇل ەركەك پەن 119 جەسىر ايەل بار.

بىلتىر قاراشادا 557300 كوپبالالى وتباسى جاردەماقى العان ەدى. بۇل اقپاراتتى ەڭبەك جانە حالىقتى الەۋمەتتىك قورعاۋ مينيسترلىگى ۇسىندى.

ايتا كەتەيىك، 2009 -جىلعى حالىق ساناعى بويىنشا رەسپۋبليكاداعى وتباسى سانى 4022388 بولعان.

ەسكە سالايىق، 2009 -جىلى ەلدىڭ ۇلتتىق كوميسسياسى قازاقستاندا وتباسى كۇنىن ۇيىمداستىرۋدى جانە ونى 15-مامىردا، حالىقارالىق وتباسى كۇنىمەن ءبىر كۇندە اتاپ ءوتۋدى ۇسىندى.

الايدا 2013 -جىلى ناۋرىزدا نۇرسۇلتان نازاربايەۆ قازاقستان رەسپۋبليكاسىنىڭ كاسىبي جانە وزگە دە مەرەكەلەرىنىڭ تىزبەسىنە وزگەرىستەر مەن تولىقتىرۋلار ەنگىزۋ تۋرالى جارلىققا قول قويدى. وسىلايشا، ەلدە جاڭا مەرەكە - وتباسى كۇنى پايدا بولدى جانە ونى تويلاۋ كۇنى قىركۇيەكتىڭ ءار ەكىنشى جەكسەنبىسى رەتىندە بەكىتىلدى.