اجەتحانا قاعازىنان اۋرۋ جۇعاتىنىن بىلەسىز بە؟
استانا. KAZINFORM - بۇگىندە دامىعان ەلدەردىڭ بارىندە اجەتحانا قاعازى قولدانىلمايدى. ونىڭ ورنىنا بيدە (ۋنيتازدىڭ قاسىندا نەمەسە بىرگە ورناتىلاتىن، جىنىس مۇشەلەرىن جۋۋعا ارنالعان ارنايى شاپا بار كىشىگىرىم ۆاننا) قولدانىلادى.
وسى رەتتە دارىگەرلەر اجەتحانا قاعازىنان تۋىندايتىن اۋرۋلاردى اتاپ ءوتتى، - دەپ حابارلايدى lenta.ru.
ماماندار اجەتحانا قاعازىنىڭ ورنىنا بالالارعا ارنالعان ىلعالدى مايلىقتى قولدانۋعا كەڭەس بەرەدى.
«سۋمەن جۋىنۋ - اجەتتى وتكەرگەن سوڭ تازالىقتى ساقتاۋدىڭ ەڭ قولايلى ءارى پايدالى ءتاسىلى. سۋدى قولدانۋ ارقىلى ادام دارەت قالدىعىنان تۇگەلدەي تازارا الادى. ال قاعاز مۇنداي قاجەتتىلىكتى تولىقتاي وتەي المايدى. اجەتحانا قاعازى تەك قانا جۋىنىپ بولعان سوڭ قۇرعاتۋ ءۇردىسى ءۇشىن قاجەت»، - دەدى Wockhardt hospital اۋرۋحاناسىنىڭ دارىگەرى تاريك پاتەل.
دارىگەرلەردىڭ پىكىرىنشە، اجەتحانا قاعازىمەن ءجيى ءسۇرتىنۋ - تىك ىشەكتىڭ اينالاسىنداعى جۇمساق تەرىنى جاراقاتتاۋى مۇمكىن. قاعازدىڭ جاراقاتتايتىنى جانە دارەتتىڭ قۇرامىنداعى زياندى زاتتار وعان ءتۇسىپ، بورتپە جانە باسقا دا جاعىمسىز جايتتارعا ۇلاسۋى مۇمكىن. سونىمەن قاتار تۇبەگەيلى تازارتىلماعان سوڭ باكتەريالار كوبەيىپ، ول جىنىس مۇشەلەرىنە ەنىپ كەتۋى دە عاجاپ ەمەس.
«كوپتەگەن جىنىس اۋرۋلارىنىڭ ينفەكسيا ءتۇسۋى اسەرىنەن بولاتىنىن ەسكەرسەك، جىنىس جانە نەسەپ جولدارى مۇشەلەرىنىڭ دەرتكە ۇشىراۋىنىڭ ءبىر سەبەبى اجەتحانا قاعازىن عانا قولدانۋ ەكەندىگى تۇسىنىكتى بولار. بۇل جەردە دە ءتۇرلى قاعاز قالدىقتارىنان وڭدەلىپ جاسالعان قاعازداردىڭ دەنساۋلىققا قاۋپى كوپ ەكەنى بەلگىلى. اسىرەسە قاعاز بەتىندە تازا وڭدەلمەگەن قالدىق بولشەكتەرى بار بولسا، ونى مۇلدە پايدالانباۋ كەرەك. ويتكەنى گازەت-جۋرنال، كىتاپ نەمەسە باسقا دا قالدىقتاردان وڭدەلىپ جاسالاتىن بولعاندىقتان، ونىڭ بوياۋى ارنايى حيميكاتتار ارقىلى كەتىرىلەدى. ءبىراق تولىق وڭدەلمەگەن جاعدايدا ونداعى حيميكاتتار جىنىس مۇشەلەرىنە ءتۇسىپ، تاعى دا زيانى تيەدى. اسىرەسە حلور مەن مىرىشپەن وڭدەلەتىن قاعازداردىڭ دەنساۋلىققا زياندىعى كوپ انىقتالعان»، - دەدى ماماندار.
سوندىقتان دەنساۋلىققا ءمان بەرىپ، اجەتحانا قاعازىنىڭ ەشقانداي وڭدەۋسىز، تازا قاعازدان جاسالعانىن (البەتتە، قىمبات تۇراتىنى بەلگىلى) تاڭداعان دۇرىس.