اجەسىنىڭ 100 مىڭ تەڭگەسىن جۇمساپ جىبەرگەن بويجەتكەن قىلمىسىن جاسىرۋ ءۇشىن فانتاستيكالىق وقيعا ويلاستىرعان
پاۆلودار. KAZINFORM - اجەسىنىڭ 100 مىڭ تەڭگەسىن جۇمساپ قويعان قىز ءىس- ارەكەتىن جاسىرۋ ءۇشىن ءوزىن توناپ كەتكەندىگى تۋرالى وقيعانى ويلاپ تاپقان. بۇل تۋرالى Polisia.kz جازدى.
20 جاستاعى پاۆلودارلىق قىز پوليتسياعا قوڭىراۋ شالىپ، ءوزىن توناپ كەتكەنى تۋرالى حابارلادى. وپەراتوردىڭ سۇراقتارىنا جىلاپ تۇرىپ جاۋاپ بەرگەن ول، وقيعانى شەبەرلىكپەن سۋرەتتەپ، شىنايى وبرازعا ەنگەن.
- مەنىڭ سومكەمدى ۇرلاپ كەتتى! ىشىندە 100500 تەڭگە جانە كوك ءتۇستى Samsung تەلەفونى بولعان. اۆتوبۋستان ءتۇسىپ جاتقانىمدا، ارتىمنان ءبىر ەر ادام كەلىپ، سومكەمدى جۇلىپ الىپ قاشىپ كەتتى. مەن ونىڭ ارتىنان جۇگىردىم، ءبىراق قۋىپ جەتە المادىم. ول بىردەن جوق بولىپ كەتتى، - دەگەن تەلەفوننىڭ ار جاعىنان وكسىگىن باسا الماعان «جابىرلەنۋشى».
جەدەل- تەرگەۋ توبى دەرەۋ وقيعا ورنىنا اتتانىپ، قىز كورسەتكەن مەكەنجايعا جەتتى. پوليتسيا قىزمەتكەرلەرى، اۆتوپاترۋلدەر مەن ۋچاسكەلىك ينسپەكتورلار جاقىن ماڭداعى كوشەلەردى تەكسەرىپ، كۇدىكتىگە ۇقساس ازاماتتاردى ىزدەستىردى. بەينەباقىلاۋ كامەرالارى تەكسەرىلدى، ءبىراق وقيعا كامەراعا تۇسپەگەن. قىزدىڭ بۇرىن ەر ادامدى اۋلادا كورگەنىن ايتىپ، ارتىنان جۇگىرگەنىن بايانداعان مالىمدەمەلەرى كۇدىك تۋدىردى.
تەرگەۋشىگە كۇمان تۋدىرعان تاعى ءبىر جايت - قىزدىڭ قىلمىسكەردىڭ قاشقان باعىتىن ناقتى ايتا الماي، بىرەسە ءبىر جاقتى، بىرەسە ەكىنشى جاقتى كورسەتكەنى. جابىرلەنۋشى پوليتسيا بولىمىنە جەتكىزىلگەن سوڭ، كۇدىك راستالدى. تەرگەۋ كەزىندە قىز ايعاقتارىنان شاتاسا باستادى، ارتىنشا شىدامى تاۋسىلىپ، شىندىقتى ايتىپ بەردى. بەلگىلى بولعانداي، ستۋدەنتكە اجەسى نەسيە قارىزىن تولەۋ ءۇشىن 100 مىڭ تەڭگە بەرگەن ەكەن. الايدا قىز بۇل اقشانى ءوز قاجەتىنە جۇمساپ جىبەرىپ، جاقىندارى ۇرسادى دەپ قورقىپ، توناۋ وقيعاسىن ويلاپ تاپقان.
«ارنايى قىزمەتتەردى كورىنەۋ جالعان شاقىرعانى ءۇشىن» قىز اكىمشىلىك جاۋاپكەرشىلىككە تارتىلىپ، 30 ايلىق ەسەپتىك كورسەتكىش (ا ە ك) كولەمىندە ايىپپۇل سالىندى.
پاۆلودار وبلىسى پوليتسيا دەپارتامەنتىنىڭ باسپا ءسوز قىزمەتى بۇل جاعدايدىڭ ماڭىزدىلىعىن اتاپ ءوتتى: «مۇنداي ارەكەتتەر تەك پوليتسيا جۇمىسىنا كەدەرگى كەلتىرىپ قانا قويماي، شىنايى قاۋىپ- قاتەر تۋىنداعان كەزدە قىزمەت كورسەتۋ ۋاقىتىن ۇزارتىپ، باسقا ازاماتتاردىڭ ومىرىنە قاۋىپ ءتوندىرۋى مۇمكىن. جەدەل قىزمەتتەر مەن پوليتسيا ناقتى قاۋىپتەرگە قولجەتىمدى بولۋى ءتيىس.»
قۇقىق قورعاۋ ورگاندارىنىڭ باستى ۇستانىمى - «زاڭ جانە ءتارتىپ». بۇل قاعيدا ازاماتتاردىڭ قاۋىپسىزدىگىن قامتاماسىز ەتۋ جانە قوعامدىق ءتارتىپتى ساقتاۋ جولىنداعى نەگىزگى مىندەت بولىپ قالا بەرەدى. ءار قۇقىق بۇزۋشى ءوز ارەكەتى ءۇشىن مىندەتتى تۇردە جاۋاپ بەرەدى.
ەسكە سالا كەتەيىك، بۇعان دەيىن پاۆلودار پوليتسەيلەرى بالالارىنا 4,5 ميلليون تەڭگە قارىز اكەنى ۇستاعانىن جازعان بولاتىنبىز.