ۆەدومستۆو مالىمەتىنشە، اۋەجايلاردا قۇستاردى باقىلاۋ ارنايى بەكىتىلگەن باعدارلامالار نەگىزىندە جۇرگىزىلەدى. وسى باعدارلامالار اياسىندا ولاردىڭ شوعىرلاناتىن ورىندارى انىقتالىپ، قۇستاردى تارتۋى مۇمكىن نىساندارعا نازار اۋدارىلادى.
- اۋەايلاقتاردى پايدالانۋشىلار اۋەجاي اۋماعى مەن وعان ىرگەلەس جەرلەردى بەلگىلى ءبىر ۋاقىت سايىن تەكسەرىپ وتىرادى. قاجەت بولعان جاعدايدا قۇستاردىڭ جينالۋىنا جول بەرمەۋ ءۇشىن ءتيىستى شارالار قابىلدانادى. قۇستاردى ۇركىتۋ ءتاسىلى ولاردىڭ تۇرىنە، مىنەز-قۇلقىنا، سانىنا، جىل مەزگىلىنە جانە ناقتى قاۋىپ دەڭگەيىنە قاراي تاڭدالادى، - دەلىنگەن جاۋاپتا.
كوكتەمگى جانە كۇزگى كوشى-قون كەزىندە باقىلاۋ جۇمىستارى كۇشەيتىلەدى. بۇل كەزەڭدە اۋەجاي اۋماعىن پاترۋلدەۋ جيىلەپ، قۇستاردى ۇركىتۋ شارالارى بەلسەندى جۇرگىزىلەدى.
ماسەلەن، نۇرسۇلتان نازاربايەۆ حالىقارالىق اۋەجايىندا قۇستاردى ۇركىتۋ ءۇشىن گاز زەڭبىرەكتەرى، ستاتسيونارلىق جانە اۆتوكولىككە ورناتىلعان بيواكۋستيكالىق جۇيەلەر، مەحانيكالىق قۇرالدار، قول لازەرلەرى، دىبىستىق جانە پيروتەحنيكالىق قۇرىلعىلار پايدالانىلادى.
اۋەجاي مالىمەتىنشە، قاجەت بولعان جاعدايدا بىرنەشە ءادىس قاتار قولدانىلادى. ماماندار قۇستاردىڭ بەلگىلى ءبىر دىبىسقا نەمەسە قۇرىلعىعا ۇيرەنىپ كەتپەۋى ءۇشىن ۇركىتۋ تاسىلدەرىن الماستىرىپ وتىرادى.
اۆياتسيالىق اكىمشىلىكتىڭ تۇسىندىرۋىنشە، اتالعان جۇمىستاردىڭ نەگىزگى ماقساتى - اۋەايلاق اۋماعىندا قۇستاردىڭ شوعىرلانۋىنا جول بەرمەۋ جانە ۇشۋ قاۋىپسىزدىگىن قامتاماسىز ەتۋ.