اجار عينيات قىزىلشا ورشىگەن وڭىرلەردى اتادى

ەلىمىزدە قىزىلشا اۋرۋى بويىنشا ەپيدەميولوگيالىق جاعداي تۇراقسىز. بۇل تۋرالى دەنساۋلىق ساقتاۋ ءمينيسترى اجار عينيات ءمالىم ەتتى، دەپ حابارلايدى Kazinform.

«قىزىلشامەن سىرقاتتانۋشىلىقتىڭ ءوسۋى بايقالدى. بۇگىنگى تاڭدا قىزىلشا اۋرۋى بويىنشا ەپيدەميولوگيالىق جاعداي تۇراقسىز. رەسپۋبليكادا قىزىلشانىڭ 17 مىڭنان استام جاعدايى تىركەلگەن، 82 پايىزدان استامى بالالارعا تيەسىلى. ونىڭ ىشىندە، 83 پايىزى - ەكپە الماعان بالالار. بۇل رەتتە، بالالاردىڭ 60 پايىزى باس تارتۋعا بايلانىستى، قالعان بالالار ەگۋ جاسىنا جەتپەۋىنە بايلانىستى جانە مەديتسينالىق كورسەتىلىمدەر بويىنشا ۆاكسيناتسيا الماعان. قىزىلشا اۋرۋى بارلىق وڭىردە تىركەلدى»، - دەدى مينيستر ورتالىق كوممۋنيكاتسيالار قىزمەتىندەگى بريفينگتە.

ونىڭ دەرەگىنشە، قىزىلشا شىمكەنت، الماتى قالالارىندا، جامبىل، الماتى، ماڭعىستاۋ، اقتوبە، قىزىلوردا جانە اتىراۋ وبلىستارىندا ءورشىپ تۇر.

«سىرقات تانۋشىلىقتىڭ كۇرت ءوسۋى وسى جىلدىڭ قىركۇيەگىنەن باستاپ ۇيىمداسقان ۇجىمداردا، ياعني وقۋ جىلىندا بالالاردىڭ جينالۋىنا بايلانىستى بايقالادى. ناتيجەسىندە سىرقاتتانۋشىلىق دەڭگەيى ەكى ەسە ءوستى. بۇگىنگى تاڭدا ەلىمىزدە قىزىلشامەن اۋىرعان ناۋقاستار ءۇشىن ينفەكسيالىق اۋرۋحانالاردا 3,5 مىڭنان استام توسەك-ورىن اشىلدى. ستاتسيونارلىق ەمدەلۋدە 2375 بالا جاتىر. توسەك-ورىنمەن قامتۋ 59,5 پايىزدى قۇرايدى. رەزەرۆتە 1 مىڭنان استام ورىن بار»، - دەدى اجار عينيات.