8-مامىردا استانا - فرانكفۋرت باعىتى بويىنشا KZR921 رەيسىن ورىنداۋ كەزىندە Air Astana ا ق- نىڭ Airbus A321 اۋە كەمەسىنە قاتىستى اۆياتسيالىق وقيعا تىركەلگەن. استانا اۋەجايىنان ۇشىپ شىققاننان كەيىن ۇشاق ەكيپاجى قوزعالتقىشتاردىڭ ءبىرى ىستەن شىعۋىنا بايلانىستى PAN- PAN شۇعىل دابىلىن جاريالاعان. وسىعان بايلانىستى ەكيپاج اقتوبەنىڭ قوسالقى اۋەجايىنا قونۋ تۋرالى شەشىم قابىلداعان.
اۋە كەمەسىنىڭ بورتىندا 93 جولاۋشى، ونىڭ ىشىندە 4 بالا مەن 1 نارەستە، سونداي-اق، ەكيپاجدىڭ 9 مۇشەسى بولعان. اۋە كەمەسى اقتوبە اۋەجايىنا جەرگىلىكتى ۋاقىت بويىنشا ساعات 11:34 تە شتاتتىق رەجيمدە قونعان.
«بۇل وقيعا اۋە كەمەسىنىڭ كۇشتىك قوندىرعىسىنداعى تەحنيكالىق اقاۋعا بايلانىستى بولدى. قازىر زارداپ شەككەندەر نەمەسە اۋە كەمەسى زاقىمدانعانى تۋرالى اقپارات تۇسكەن جوق. بۇل وقيعا اۋىر وقيعا رەتىندە جىكتەلىپ، ونى كولىك مينيسترلىگىنىڭ كولىكتەگى وقيعالاردى تەرگەپ-تەكسەرۋ دەپارتامەنتى تەرگەيدى»، - دەپ جازىلعان حابارلامادا.
ەسكە سالايىق، بۇعان دەيىن استانادان فرانكفۋرتقا ۇشىپ شىققان ۇشاق اقتوبەگە قونۋعا ءماجبۇر بولعانى حابارلاندى.