افريكاداعى قۇرعاقشىلىق: كليماتتىڭ وزگەرۋى 120 ميلليونعا جۋىق ادامنىڭ ومىرىنە قاۋىپ ءتوندىردى

استانا. KAZINFORM - ءتيىستى شارالار قابىلدانباسا، 2030 -جىلعا قاراي افريكادا 118 ميلليونعا جۋىق كەدەي حالىق قۇرعاقشىلىق، سۋ تاسقىنى جانە اپتاپ ىستىقتان زارداپ شەگەدى، دەپ حابارلادى دۇنيەجۇزىلىك مەتەورولوگيالىق ۇيىم.

دۇنيەجۇزىلىك مەتەورولوگيالىق ۇيىم (ب ۇ ۇ- نىڭ مامانداندىرىلعان مەكەمەسى) كونتينەنتتەگى كليماتتىق جاعداي تۋرالى («افريكاداعى كليمات جاعدايى 2023») بايانداماسىن جاريالادى، وندا كليماتتىڭ وزگەرۋى افريكاداعى 120 ميلليونعا جۋىق ادامعا قاۋىپ توندىرەتىنى اتالىپ وتەدى.

بايانداماعا سايكەس، افريكا كليمات وزگەرىسىنىڭ اۋىرتپالىعىن جانە قاجەتتى بەيىمدەلۋدىڭ پروپورتسيونالدى ەمەس شىعىندارىن وتكەرىپ جاتىر. 2030 -جىلعا قاراي افريكاداعى 118 ميلليونعا جۋىق كەدەي حالىق ءتيىستى شارالار قابىلدانباسا، قۇرعاقشىلىقتان، سۋ تاسقىنىنان جانە قاتتى ىستىقتان زارداپ شەگەدى.

ورتا ەسەپپەن افريكا ەلدەرى ج ءى ءو- ءنىڭ %2-5 ىن جوعالتادى، ال ولاردىڭ كوپشىلىگى ءوز بيۋدجەتتەرىنىڭ %9 عا دەيىنىن توتەنشە كليماتتىق قۇبىلىستارمەن كۇرەسۋگە ارنايدى. الايدا ساحارانىڭ وڭتۇستىگىندەگى افريكادا بەيىمدەلۋ قۇنى الداعى ونجىلدىقتا جىلىنا 30-50 ميلليارد دوللارعا باعالانادى.

اۋا رايى ۇيىمى افريكا ەلدەرى ۇلتتىق مەتەورولوگيالىق جانە گيدرولوگيالىق قىزمەتتەرگە ۇلعايتىلعان ينۆەستيتسياعا باسىمدىق بەرۋى كەرەك جانە «بارشاعا ارنالعان ەسكەرتۋلەر» باستاماسىن جۇزەگە اسىرۋدى جەدەلدەتۋ كەرەك دەيدى.

دۇنيەجۇزىلىك مەتەورولوگيالىق ۇيىمنىڭ باس حاتشىسى سەلەستا ساۋلو سوڭعى 60 جىلدا افريكاداعى جىلىنۋ ءۇردىسى الەمدىك دەڭگەيدەن الدەقايدا جىلدام ءجۇرىپ جاتقانىن اتاپ ءوتتى.

«2023-جىلى كونتينەنت ادام ولىمىنە اكەپ سوعاتىن ىستىق تولقىندار، نوسەر جاۋىن، سۋ تاسقىندارى، تروپيكالىق سيكلوندار جانە ۇزاققا سوزىلعان قۇرعاقشىلىقتى باستان وتكەردى»، - دەدى ول.