افريكا ەلدەرىنىڭ قارىزى 1 تريلليون دوللارعا جەتتى – ب ۇ ۇ

استانا. KAZINFORM - افريكا مەملەكەتتەرىنىڭ قارىزى 1 تريلليون دوللارعا جەتتى. بۇل تۋرالى افريكا مەملەكەتتەرىنە ارنالعان ەكونوميكالىق كوميسسيانىڭ اتقارۋشى حاتشىسى كلاۆەر گاتەتە ايتتى، دەپ حابارلايدى رەسەلىك ت ا س س اگەنتتىگى.

«افريكا مەملەكەتتەرىنىڭ قارىزى 1 تريلليون دوللارعا جەتتى. قۇرلىقتا ورنالاسقان مەملەكەتتىك قارىزى كوپ ءاربىر ءۇشىنشى مەملەكەت ايتارلىقتاي قارجىلاي قيىندىقتارعا تاپ بولىپ وتىر»، - دەدى ول.

اتقارۋشى حاتشىنىڭ سوزىنشە، افيكانىڭ قارىزىنىڭ كوبەيۋى ۇزاقمەرزىمدى جەڭىلدىكتى قارجىلاندىرۋ مەن تىكەلەي شەتەلدىك ينۆەستيتسيالار جانە دامىتۋ ءۇشىن بولىنەتىن رەسمي كومەك كولەمىنىڭ قىسقارۋىمەن بايلانىستى بولىپ وتىر.

ول سونىمەن قاتار كەيىنگى كەزدەگى كليماتتىڭ وزگەرۋى افريكاعا قيىن سوعىپ جاتقانىن، جىل سايىن قۇرلىقتىڭ بىرىككەن شىعىندارىنىڭ كولەمى %5 دەيىن ۇلعايىپ وتىرعانىن اتاپ ءوتتى.

ب ۇ ۇ مالىمەتىنشە، قازىرگى تاڭدا اسىرەسە زيمبابۆە، گانا جانە ەفيوپيا سياقتى مەملەكەتتەر وتە قيىن جاعدايدا قالىپ وتىر.

مەملەكەتتىك قارىزدار كولەمىنىڭ ءوسۋى تەك افريكادا عانا بايقالىپ وتىرعان جوق. IFF Global debt monitor ۇيىمىنىڭ ساناۋىنشا، الەمدە قارىزى بار مەملەكەتتەردىڭ ءبارىنىڭ بەرەشەگى 2024-جىلدىڭ ءبىرىنشى توقسانىندا 91,4 تريلليون دوللاردى قۇرادى.