ءسوز باسىندا نيكول پاشينيان بىلتىر قابىلدانعان ارمەنيا مەن ازەربايجان اراسىنداعى بەيبىت كەلىسىمگە توقتالىپ، مامىلەگە كەلۋ جولىندا قولداۋ كورسەتكەن ا ق ش پرەزيدەنتى دونالد ترامپقا العىس ءبىلدىردى. ونىڭ ايتۋىنشا، قول جەتكىزىلگەن ۋاعدالاستىق وڭتۇستىك كاۆكاز ايماعى ءۇشىن جاڭا مۇمكىندىكتەرگە جول اشتى.
— 35 جىلعا جۋىق ۋاقىتقا سوزىلعان قاقتىعىستان كەيىن ءبىز قازىر شىعىس-باتىس تەمىرجول ماگيسترالىمەن قاتار، قۇبىر جانە ەلەكتر جەلىلەرىن، اۆتوموبيل جولدارىن سالۋ ماسەلەلەرىن تالقىلاپ جاتىرمىز. مۇنىڭ بارلىعى TRIPP («ترامپتىڭ حالىقارالىق بەيبىتشىلىك پەن وركەندەۋ باعىتى») جوباسى اياسىندا جۇزەگە اسىرىلىپ كەلەدى. بۇل جوبا تۇتاس وڭتۇستىك كاۆكاز ءوڭىرىنىڭ بەيبىتشىلىك قيىلىسىنا اينالۋىنا مۇمكىندىك بەرەدى، - دەپ ءمالىم ەتتى ول.
سونىمەن قاتار نيكول پاشينيان الداعى ۋاقىتتا ءتيىمدى شەشىمىن تابۋى ءتيىس ماسەلەلەرگە دە نازار اۋداردى.
- ارمەنيا مەن ازەربايجان اراسىنداعى قارىم-قاتىناستا ءالى دە شەشىمىن تابۋى ءتيىس ماسەلەلەر بار. اتاپ ايتقاندا، حابار-وشارسىز كەتكەن بىرنەشە مىڭ ادامنىڭ تاعدىرىن انىقتاۋ بويىنشا ازەربايجانمەن ىنتىماقتاستىق ورناتۋ جونىندە كەلىسىمگە قول قويدىق. رەسمي ەريەۆان مينالاردى زالالسىزداندىرۋ جۇمىستارىن ازەربايجانمەن ىنتىماقتاستىقتا جالعاستىرۋعا نيەتتى. سونداي-اق، ارمەنيا تاراپى قاقتىعىس سالدارىنان ازەربايجاندا ۇستالعان ارميانداردىڭ ەلگە ورالۋىن اسىعا كۇتىپ وتىر، - دەدى نيكول پاشينيان.
ول اتاپ وتكەندەي، ارمەنيا سىرتقى ساياساتتا ءتيىمدى تەڭگەرىمدى ساقتاۋعا اسا ءمان بەرەدى. تيىسىنشە، كەيىنگى بىرنەشە جىلدا 10 نان استام ەلمەن ستراتەگيالىق قارىم-قاتىناس ورنادى، ولاردىڭ ىشىندە قازاقستان دا بار.
- ارمەنيا تەڭگەرىمدى ءارى بايىپتى سىرتقى ساياسات ۇستانىمىن ىلگەرىلەتە بەرمەك. بۇل - بىرىككەن ۇلتتار ۇيىمىنىڭ نەگىزگى قاعيداتتارىنىڭ ءبىرى. سوڭعى جىلدارى ءبىز قازاقستان، گرۋزيا، فرانسيا، قىتاي، نيدەرلاند، گەرمانيا، ليۋكسەمبۋرگ، ۇلى بريتانيا، بولگاريا، حورۆاتيا، ليتۆا، ا ق ش جانە ەۋروپا وداعىمەن ستراتەگيالىق قارىم-قاتىناس ورناتتىق، - دەپ قورىتىندىلادى ارمەنيانىڭ ۇكىمەت باسشىسى.
ەسكە سالايىق، بۇعان دەيىن نيكول پاشينيان TRIPP جوباسىن جۇزە اسىرۋ ايماقتاعى ءوزارا كولىك بايلانىسىن تولىق قامتاماسىز ەتۋگە مۇمكىندىك بەرەتىنىن ايتىپ ەدى.