اشىق سۋدا جۇزۋدەن قازاقستاندىق سپورتشى ەل تاريحىندا تۇڭعىش چەمپيون اتاندى

اشىق سۋدا جۇزۋدەن وتكەن «Oceanman» حالىقارالىق جارىسىندا توپ جارىپ، قازاقستان تاريحىندا تۇڭعىش رەت الەم چەمپيونى اتانعان ەلوردالىق الپامىس ءامىر ەلگە ورالدى، دەپ حابارلايدى Kazinform ەلوردا اكىمدىگىنىڭ رەسمي سايتىنا سىلتەمە جاساپ.

تايلاند ەلىنىڭ پحۋكەت قالاسىندا وتكەن بايراقتى باسەكەگە الەمنىڭ تۇكپىر-تۇكپىرىنەن بارعان 70 ەلدىڭ سپورتشىسى جۇلدەلى ورىندارعا تالاستى. جيىرما جىلدان بەرى ۇزدىكسىز ۇيىمداستىرىلعان حالىقارالىق جارىسقا قازاقستان اتىنان ەلوردالىق الپامىس ءامىر قاتىستى.

وتانداسىمىز Inspiration ساناتى بويىنشا 2 شاقىرىمدىق قاشىقتىققا جۇزۋدەن قارسىلاس شاق كەلتىرمەدى.

«حالىقارالىق جارىستا مەكتەبىمىزدىڭ سپورتشىسى چەمپيون اتاندى. الپامىس ءامىر «بارىس» سپورت كەشەنىندە اپتاسىنا 6 رەت جاتتىعادى. الەم چەمپيوناتىنا ءساۋىر ايىنان باستاپ تىڭعىلىقتى دايىندالدى. ەڭبەك پەن توزىمدىلىك جەمىسىن بەردى. سپورتشىمىزبەن ماقتانامىز. سپورت دامۋ ەرەكشەلىگىنە قاراماستان بارلىعىنا ورتاق ەكەنى قۋانتادى»، - دەدى ينتەللەكتۋالدى دامۋ ەرەكشەلىكتەرى بار ادامدارعا ارنالعان سپورت فەدەراتسياسىنىڭ پرەزيدەنتى دينا تەمىرعاليەۆا.

الپامىستى اۋەجايدان قالالىق دەنە شىنىقتىرۋ جانە سپورت باسقارماسىنىڭ باسشىسى سامات جىلقىبايەۆ، سپورتشىنىڭ تۋعان-تۋىستارى، جانكۇيەرلەرى مەن سپورت سالاسىنىڭ وكىلدەرى قارسى الدى.