اشىق قۇدىقتار بالالاردىڭ ومىرىنە قاۋىپ توندىرەدى - دەپۋتات

ونىڭ سوزىنشە، ەل ازاماتتارىنىڭ قاۋىپسىزدىگىنە قاتەر توندىرگەن اشىق قۇدىقتار ماسەلەسى شۇعىل ءارى جۇيەلى شەشىمدى قاجەت ەتەدى. بۇل - كوممۋنالدىق ينفراقۇرىلىم مەن جاۋاپتى ورگانداردىڭ جۇمىسىنداعى وزەكتى ماسەلە.

- ب ا ق مونيتورينگىنىڭ مالىمەتتەرى بويىنشا، تەك 2026 -جىلى بالالاردىڭ اشىق قۇدىقتارعا قۇلاۋىنىڭ جەتى جاعدايى تىركەلگەن. بۇل ماسەلە جۇيەلى سيپاتقا يە بولۋدا. ىشكى ىستەر مينيسترلىگىنىڭ مالىمەتى بويىنشا، انىقتالعان اشىق ليۋكتەر سانى 2021 -جىلى 126 دان، 2025 -جىلى 356 عا دەيىن ءوستى، ال 2026 -جىلدىڭ توعىز ايىندا تاعى 276 اكىمشىلىك ءىس تىركەلگەن، - دەدى دەپۋتات.

سونىمەن قاتار، ەلدە ءالى كۇنگە دەيىن بارلىق ينجەنەرلىك قۇدىقتىڭ ءبىرىڭعاي سيفرلىق ەسەبى جوق ەكەنىن اتاپ ءوتتى. ولاردى قاۋىپسىز دەڭگەيدە ۇستاۋعا جاۋاپتىلار ءاردايىم انىقتالا بەرمەيدى. ال يەسىز وبەكتىلەردىڭ مەتالل قاقپاقتاردىڭ ۇرلاۋ قاراۋ نيەتتى كىسىلەرگە وڭايعا سوعادى.

- قولدانىستاعى اباتتاندىرۋدىڭ ۇلگىلىك قاعيدالارى بويىنشا قاقپاق ۇرلانسا، قاۋىپتى ايماق ءبىر ساعات ىشىندە قورشالىپ، جاڭا قاقپاق بەس ساعات ىشىندە جابىلۋى كەرەك. دەگەنمەن، ناقتى ەسەپ بەرۋ، قاۋىپتى جەدەل انىقتاۋ جانە ورىنداۋ بولماسا، مۇنداي قاعاز جۇزىندەگى ەرەجە پايدا بەرمەيدى، - دەدى نۇرسادىق ەرگەشبەك .

ول ماسەلەنى شەشۋدىڭ ناقتى جولدارىن ۇسىندى:

· ءبىرىڭعاي جاۋاپكەرشىلىك ەرەجەلەرىن بەلگىلەۋ جانە مەنشىك يەسى تۋرالى اقپاراتى بار قۇدىقتاردىڭ سيفرلىق ءتىزىلىمىن جاساۋ؛

· قاۋىپتى دەرەۋ جويۋ ءۇشىن قاراۋسىز قالعان قۇدىقتاردى مامانداندىرىلعان ۇيىمدارعا بەرۋ؛

· ءبىر ساعات ىشىندە قاۋىپتى ايماقتاردى قورشاۋ، ەكى ساعات ىشىندە بالالار مەكەمەلەرىندەگى قاقپاقتاردى اۋىستىرۋ جانە قاقپاقتاردىڭ جەتكىلىكتى قورىن ساقتاۋ؛

· تاۋەكەلى جوعارى قۇدىقتاردى تورلارمەن جانە داتچيكتەرمەن جابدىقتاۋ ارقىلى ارنايى ساناتقا ءبولۋ؛

· كومپوزيتتىك قاقپاقتارعا قويىلاتىن تالاپتاردى ازىرلەۋ جانە ۇرلىق ايماقتارىنداعى مەتالل قاقپاقتاردى ولارمەن اۋىستىرۋ؛

· ۇرلانعان قاقپاقتاردى تاپسىرۋ ارەكەتتەرى كەزىندە مەتال سىنىقتارىن قابىلداۋ بويىنشا باقىلاۋدى كۇشەيتۋ جانە پوليتسياعا جەدەل حابارلاۋ؛

· ۋاكىلەتتى ورگاندار مەن وڭىرلەر ءۇشىن ءبىرىڭعاي جۇيەدە دەرەكتەر الماسۋدى قامتاماسىز ەتە وتىرىپ، جاراقاتتاردىڭ، ۇرلىقتاردىڭ جانە ولاردى شەشۋ مەرزىمدەرىنىڭ ءبىرىڭعاي ەسەبىن ەنگىزۋ.

ودان بولەك، دەپۋتات قاۋىپتى ايماقتاردى انىقتاۋ جانە سىن-قاتەر كارتالارىن جاساۋ بويىنشا پيلوتتىق جوبالاردى ىسكە قوسۋ ارقىلى بۇكىل ەل بويىنشا «قاۋىپسىز قۇدىق» ناۋقانىن ۇيىمداستىرۋدى ۇسىندى.

ايتا كەتەيىك، بۇعان دەيىن شىمكەنتتە قۇدىق ىشىندە ەكى جۇمىسشى ۋلانىپ، كوز جۇمعانىن جازعانبىز.