ۆاشينگتوندا دومبىرا ۇيىرمەسى اشىلدى

ەلشىلىك ىشىندە جۇمىس ىستەيتىن ۇيىرمەلەرگە كەلۋشىلەردىڭ اراسىندا كىشكەنتاي بۇلدىرشىندەر دە كوپ.

شەتەلدە تۇرىپ جاتقان وتانداستارىمىز ءۇشىن ءتول ءتىلىن ۇمىتپاي، تۇپكى مادەنيەتتى ساقتاۋ باستى ماسەلە. سول ءۇشىن بەلسەندى ازاماتتار ءتۇرلى ءىس- شارالار ۇيىمداستىرادى. ولارعا ەلشىلىك تە قولعابىس ەتەدى. ماسەلەن، ۆاشينگتوندا ءتىل ۇيرەتۋ ساباقتارى مەن دومبىرا ۇيىرمەسى جۇمىس ىستەيدى. ازىرگە توپتار بالالارعا ارنالعان. الداعى ۋاقىتتا ەرەسەكتەر توبىن اشۋ جوسپاردا بار ەكەن، دەپ جازادى 24.kz ارناسى.

بەكسۇلتان سەيدۋللا فۋلبرايت باعدارلاماسىمەن ماگيستراتۋراعا ءتۇسىپ، بىلتىر ۆاشينگتونعا كەلگەن. وسىعان دەيىن فرانسيادا جوعارى ءبىلىم الىپ، قازاقستاندا قىزمەت ەتكەن تالاپتى جاس مەكتەپ كەزىنەن دومبىرا تارتادى. مۇحيتتىڭ ارعى جاعىنا سۇيىكتى اسپابىن الا كەلگەن. جوعارعى وقۋ ورىنىندا ءبىلىمىن جەتىلدىرىپ قانا قويماي ا ق ش- تا تۇرىپ جاتقان قازاق بالالارىنا دومبىرا ۇيرەتىپ، ۇلتتىق مادەنيەتىمىزدى بويلارىنا سىڭدىرگىسى كەلەدى.

فرانسيادا وقۋدا جۇرگەن كەزىمدە بالالارعا نەگە دومبىرا ساباقتارىن ۇيرەتپەسكە دەگەن سۇراق قويدىم وزىمە. بۇل سۇراق كىشىگىرىم دومبىرا ۇيىرمەسىنە اينالىپ، ەكى جىلداي جالعاستى. سودان كەيىن ۆاشينگتونعا كوشىپ، دومبىرا ساباعىن جالعاستىرايىن دەپ ەلشىلىكتىڭ قىزمەتكەرى وتەگەنوۆ ەرلانمەن بىرىگىپ، كىشكەنتاي دومبىرا ۇيىرمەسىن، سەنبىلىك توبىن اشتىق، - دەيدى دومبىرا ۇيىرمەسىنىڭ ۇستازى بەكسۇلتان سەيدۋللا.

شاكىرتتەرىنە جەڭىل تۋىندىلاردى ۇيرەتۋدەن باستاعان بەكسۇلتان بولاشاقتا «اداي»، «ەركەسىلقىم»، «بالبىراۋىن» كۇيلەرىن ۇيرەتىپ، مەرەكەلىك شارالارعا قاتىستىرۋدى ماقسات ەتىپ وتىر. ۇيىرمەنىڭ اشىلعانىن ەستي سالا ايبەك بايباتىر بىردەن كەلىپ جازىلعان. دومبىرا تارتۋ بۇرىننان ارمانىم ەدى دەيدى.

مەن اتا-انامنىڭ جۇمىسى بويىنشا ءتۇرلى ەلدەردە، وزبەكستان، موڭعوليادا تۇردىم. قازىر امەريكادا تۇرامىن. ءبىراق قايدا جۇرسەم دە مەن ەلىمدى ساعىنامىن، مادەنيەتىمىزگە جاقىن بولعىم كەلەدى. سوندىقتان دومبىرا ۇيىرمەسى اشىلعاندا بىردەن كەلدىم. ويتكەنى مەن الماتىدا تۇراتىن اجەمە قازاقشا كۇي ويناپ بەرۋدى ارماندايمىن، - دەيدى ۇيىرمەگە قاتىسۋشى ايبەك بايباتىر.

ال 500 عالىم جوباسىمەن تاعىلىمدامادان وتۋگە كەلگەن گۇلميرا تاستەمىر قىزىنىڭ قازاق ءتىلى ۇيىرمەسىن جۇرگىزگەنىنە 2 ايداي بولىپ قالدى. بىلىكتى ۇستاز بالالارعا ساباقتى ويىن تۇرىندە قىزىقتىرىپ وتكىزۋگە ءمان بەرەتىنىن ايتادى.

شەتەلدە ءوسىپ، شەتەلدە تاربيەلەنىپ جاتقان بالالار ءۇشىن ءبىر پايدام ءتيسىن دەپ ءار سەنبى وسى ەلشىلىكتە قازاق ءتىلى كۋرسىن ۇيىمداستىرىپ ءجۇرمىن. بالالاردىڭ تاراپىنان قازاق ءتىلىن، انا ءتىلىن ۇيرەنەمىن دەگەن نيەتتەرى بار، تالپىنىستارى بار. قولىمنان كەلگەنشە كومەكتەسىپ جاتىرمىن، - دەيدى قازاق ءتىلى ۇيىرمەسىن ۇيىمداستىرۋشى گۇلميرا مۇحامەدجانوۆا.

ەلشىلىك ىشىندە جۇمىس ىستەيتىن ۇيىرمەلەرگە كەلۋشىلەردىڭ اراسىندا كىشكەنتاي بۇلدىرشىندەر دە كوپ. جەرگىلىكتى بالاباقشا مەن مەكتەپتەگى ورتادا انا ءتىلىن ەستىمەيتىن بالاقاندار ءۇشىن سەنبىلىك كەزدەسۋلەر قازاق ءتىلىن ۇيرەنىپ، ۇلتتىق سالت- داستۇرىمىزبەن جاقىن تانىسۋعا سەپتىگى زور.

اقمارال بەرەكەت