اڭشىلارعا تەك انالىق كيىكتى اتۋعا رۇقسات بەرىلۋى مۇمكىن - مينيستر

استانا. KAZINFORM - ەكولوگيا ءمينيسترى ەرلان نىسانبايەۆ اڭشىلارعا كيىك اۋلاۋعا رۇقسات بەرۋ تۋرالى تىلشىلەر سۇراعىنا جاۋاپ بەردى جانە ونىڭ نەلىكتەن قاۋىپتى ەكەنىن ايتتى.

− ونى دا قاراستىرىپ جاتىرمىز. ءبىراق بۇل جەردە قاۋىپ كوپ. ءبىزدىڭ كەڭ بايتاق دالامىز ۇلكەن، ال ينسپەكتورلار سانى ءار اڭشىنىڭ ارتىنان ەرىپ جۇرۋگە مۇمكىندىك بەرمەيدى. بۇل تاجىريبە سوۆەت داۋىرىندە بولعان. ءبىر جىلدارى رۇقسات بەرىلىپ، بۇكىل دالا ءمۇيىزى كەسىلگەن كيىكتەردىڭ تۋشاسىنا تولعان. سول سەبەپتى بيىل تەك انالىعىنا (رۇقسات - رەد.) بەرەمىز بە دەپ ويلاپ وتىرمىز. ءبىراق قازىر ونىڭ جولى، ءار قادامى قالاي بولادى - سونى اڭشىلار ۇيىمىمەن ءوزىمىز اقىلداسىپ جاتىرمىز، − دەدى ەكولوگيا ءمينيسترى ەرلان نىسانبايەۆ سەناتتا وتكەن بريفينگتە.

بۇعان دەيىن ە. نىسانبايەۆ كيىك سانىن رەتتەۋگە قاتىستى عالىمداردىڭ بيولوگيالىق نەگىزدەمەسى كەلەسى اپتادا دايىن بولاتىنىن ايتقان ەدى.

وسى بيولوگيالىق نەگىزدەمەگە سايكەس، كيىكتىڭ بەلگىلى ءبىر سانىن اۋلاۋ ماسەلەسى كوتەرىلەدى.

سونىمەن بىرگە اقمولا وبلىسىنىڭ شارۋالارى كيىكتىڭ قاپتاۋىنا بايلانىستى توتەنشە جاعداي جاريالاۋدى ۇسىندى.

اۆتور

ايجان سەرىكجان قىزى