بۇل تۋرالى سانيتاريالىق-ەپيدەميولوگيالىق باقىلاۋ كوميتەتى حابارلايدى.
اۆتوكولىك اينەك جۋعىش سۇيىقتىعى اينەكتەردىڭ تازالىعىن قامتاماسىز ەتىپ، جولداعى كورىنۋدى جاقسارتادى. بۇل اسىرەسە قىس مەزگىلىندە ماڭىزدى. الايدا ساپاسىز ءونىمدى پايدالانۋ جۇرگىزۋشىلەردىڭ دەنساۋلىعى مەن قاۋىپسىزدىگىنە ەلەۋلى قاۋىپ ءتوندىرۋى مۇمكىن.
كوميتەت جوسىقسىز وندىرۋشىلەر اينەك جۋعىش سۇيىقتىقتاردىڭ قۇرامىندا جۇيكە جۇيەسى مەن كورۋ ورگاندارىنا ۋىتتى اسەر ەتەتىن كۇشتى ۋلى زات - مەتيل سپيرتىن (مەتانولدى) پايدالانۋى مۇمكىن ەكەنىنە نازار اۋدارادى.
- سۇيىقتىقتى پايدالانۋ كەزىندە مەتانول بۋلارى اۆتوكولىكتىڭ جەلدەتۋ جۇيەسى ارقىلى سالونعا ەنۋى مۇمكىن. ولاردى تىنىس الۋ باس اۋرۋىن، باس اينالۋدى، جۇرەك اينۋىن، كورۋ قابىلەتىنىڭ بۇزىلۋىن، ال جوعارى كونتسەنتراتسيادا اۋىر ۋلانۋدى تۋدىرۋى ىقتيمال، - دەپ ەسكەرتتى ماماندار.
اينەك جۋعىش سۇيىقتىقتارعا قويىلاتىن تالاپتار كەدەن وداعى كوميسسياسىنىڭ 2010-جىلعى 28-مامىرداعى 299-شەشىمىمەن بەكىتىلگەن، سانيتاريالىق-ەپيدەميولوگيالىق قاداعالاۋعا (باقىلاۋعا) جاتاتىن ونىمدەرگە قويىلاتىن ءبىرىڭعاي سانيتاريالىق-ەپيدەميولوگيالىق جانە گيگيەنالىق تالاپتاردىڭ 5-بولىمىندە بەلگىلەنگەن.
- ءونىمنىڭ قاپتاماسىندا مەملەكەتتىك جانە ورىس تىلدەرىندە تاڭبالانۋى ءتيىس. وندا ءونىمنىڭ اتاۋى، ءوندىرۋشى تۋرالى مالىمەتتەر، وندىرىلگەن كۇنى، ساقتاۋ مەرزىمى مەن شارتتارى، ماقساتى جانە پارتيا ءنومىرى كورسەتىلۋى قاجەت. ءونىمنىڭ قاۋىپسىزدىگىن راستايتىن قۇجات - مەملەكەتتىك تىركەۋ تۋرالى كۋالىك (م ت ك). ونىڭ بار-جوعىن ە ا ە و مەملەكەتتىك تىركەۋ تۋرالى كۋالىكتەرىنىڭ ءبىرىڭعاي تىزىلىمىنەن تەكسەرۋگە بولادى، - دەيدى ولار.
كوميتەت تۇتىنۋشىلارعا اينەك جۋعىش سۇيىقتىقتاردى تەك بەلگىلەنگەن ساۋدا ورىندارىنان ساتىپ الۋدى، ءونىمنىڭ تاڭبالانۋىنا جانە قاۋىپسىزدىگىن راستايتىن قۇجاتتارىنىڭ بولۋىنا نازار اۋدارۋدى ۇسىنادى. مۇنداي قۇجاتتارى جوق ساۋدا ورىندارىنان ءونىم ساتىپ الۋدان باس تارتقان ءجون.
ايتا كەتەيىك، جولداعى قاۋىپسىزدىك تەك اۆتوكولىكتىڭ تەحنيكالىق جارامدىلىعىنا عانا ەمەس، سونىمەن قاتار پايدالانىلاتىن ونىمدەردىڭ ساپاسىنا دا بايلانىستى.
وسىعان دەيىن قىسقى شينا تاڭداۋدا وسى 5 نارسەنى ەسكەرۋ قاجەت ەكەنىن جازعانبىز.