اشۋلانباۋدىڭ سىرى

استانا. قازاقپارات - ەرتە زاماندا تيبەتتىڭ بيىك ۇستىرتىندە ايديبا ەسىمدى ءبىر كىسى ءومىر ءسۇرىپتى. ول اشۋلانسا بولعانى ۇيىنە قايتىپ بارىپ، ءۇيىن جانە وزىنە تيەسىلى جەرىن ءۇش رەت اينالىپ جۇگىرەدى ەكەن.

كەيىن ونىڭ جاعدايى جاقسارىپ، بايىپ، ءۇيى مەن جەرى دە بارعان سايىن كەڭەيە ءتۇسىپتى. ال ايديبا اشۋلانسا بولعانى شارشاپ-شالدىققانىنا قاراماي ءۇيى مەن جەرىن ءۇش رەت اينالا جۇگىرەتىن ادەتىن قويماپتى.

ءتىپتى، قارتايىپ، قولىنا تاياق ۇستاپ، قالت-قۇلت ەتىپ ارەڭ جۇرگەن كەزىندە دە اشۋعا باسسا بولدى، تاعى سول ءۇيى مەن جەرىن ءۇش رەت اينالا جۇگىرەدى ەكەن.

بىردە، اشۋعا باسقان ول كۇن ۇياسىنا باتقانىنا قاراماستان تاياعىنا سۇيەنىپ جۇگىرە بەرىپتى. وقىس جاعداي بولماسىن دەپ الاڭداعان نەمەرەسى ونىمەن بىرگە جۇگىرىپتى. نەمەرەسى اتاسىنان: «اتا، ءسىزدىڭ اشۋلانعاندا ءۇيىڭىز بەن جەرىڭىزدى اينالا جۇگىرەتىنىڭىزدە قانداي سىر بار؟» دەپ سۇراپتى.

اتاسى وعان: «جاس كەزىمدە بىرەۋمەن ۇرسىسىپ، ءسوز تالاسىپ، اشۋلانىپ قالسام بولعانى، ءۇيىم مەن جەرىمدى ءۇش رەت اينالا جۇگىرەتىنمىن، سوندا تاۋىقتىڭ ۇياسىنداي ۇيگە، تۋلاقتاي جەرگە ارەڭ يە بولىپ جۇرگەن كەيپىمە قاراماي، باسقالارمەن ۇستاساتىن مەن كىم ەدىم، وعان جۇمسايتىن قايداعى ۋاقىتىم، قانشا قۋاتىم بار ەدى دەگەن ويعا ورالسام بولعانى، اشۋدان ارىلىپ قالامىن دا، ۋاقىتىمنىڭ كوبىن، سونداي-اق بارلىق زەيىن-زەردەمدى جۇمىس ىستەۋگە، ۇيرەنۋگە ارنايتىنمىن» دەيدى.

نەمەرەسى تاعى: «اتا، قازىر ءسىز قارتايدىڭىز، ءارى، باي جانعا اينالدىڭىز، نەلىكتەن كۇنى بۇگىنگە دەيىن ءۇيىڭىز بەن جەرىڭىزدى اينالا جۇگىرەسىز؟» دەپ سۇرايدى.

سوندا اتاسى: «قازىر دە اشۋعا مىنسەم، ءۇيىم مەن جەرىمدى ءۇش رەت اينالا جۇگىرەمىن. سوندا سارايداي ءۇيىم، اسا اۋماقتى جەرىم بار ەكەن، بولار-بولماس ىسكە بولا باسقالارمەن كەركىلدەسىپ، كوڭىلسىز بولۋىمنىڭ قاجەتى قانشا دەگەن ويعا ورالامىن دا اشۋىم تاراپ، جادىراپ قالامىن» دەپتى.

دايىنداعان: سۇڭقار اقبوز

Massaget.kz