اۋەدەگى قاۋىپسىزدىك: بورتسەرىكتەر مەن ۇشقىشتاردى قالاي وقىتادى
استانا. KAZINFORM - استاناداعى حالىقارالىق اۋەجاي ماڭىندا AirAstana اۋە كومپانياسىنىڭ وقۋ-جاتتىعۋ ورتالىعى اشىلدى.
«ۇشۋعا ارنالعان وقۋ-جاتتىعۋ ورتالىعىندامىز. Airbus 320 جاتتىعۋ ۇشاعىن ءبىز ۇشقىشتار مەن بورتسەرىكتەستەردىڭ داعدىسىن پراكتيكالىق تۇرعىدان جەتىلدىرۋ ءۇشىن قولدانامىز. ناقتىراق ايتقاندا، توتەنشە جاعدايلار تۋىنداعاندا بورتسەرىكتەر قالاي قاۋىپتىڭ الدىن الىپ، جولاۋشىلاردى قۇتقارۋ كەرەكتىگىن ۇيرەنەدى. تەحنيكا قاۋىپسىزدىگى بويىنشا جۇمىسقا جاڭا قابىلدانعان بورتسەرىكتەر 1,5 اي وقيدى، ونىڭ ىشىندە 3 اپتا تەوريالىق ءبىلىم الادى، قالعان ۋاقىتتا وسى جاتتىعۋ ورتالىعىندا پراكتيكادان وتەدى. Airbus 320 جاتتىعۋ ۇشاعى بارلىق قۇرال- جابدىقپەن قامتىلعان. ال، سۋداعى قاۋىپسىزدىك بويىنشا جاتتىعۋ ەلورداداعى «بارىس ارەنا» سپورت كەشەنىندە وتەدى»، - دەدى AirAstana اۋە كومپانياسى قاۋىپسىزدىك ترەنينگتەرى بويىنشا اعا مەنەدجەر دامير تۇرعانوۆ.
وقۋ-جاتتىعۋ كەزىندە بورتسەرىكتەر اۆاريالىق جاعدايدا جۇمىس ىستەۋدى ءىس جۇزىندە كورىپ، بىلەدى. سونداي-اق اۋە قىزمەتكەرلەرى قاۋىپتى زاتتاردى تاسۋ بويىنشا دا بىلىكتىلىگىن ارتتىرىپ، تەست تاپسىرادى.
«توتەنشە جاعداي تۋىنداعاندا باستى ماقسات - ادامداردى قۇتقارۋ، ولارعا جول كورسەتۋ، ول ءۇشىن تەحنيكالىق قاۋىپسىزدىكتى ساقتاي وتىرىپ، نۇسقاۋلىق بويىنشا ارەكەت ەتۋ ماڭىزدى. سونىمەن قاتار بورتسەرىكتەر ءورت شىققان جاعدايدا، ونى سوندىرە ءبىلۋى كەرەك، ول داعدىنى دا وسى جەردەن ۇيرەنەدى. ودان بولەك، قاجەت جاعدايدا مەديتسينالىق العاشقى كومەك كورسەتۋ مىندەتى بار، وقۋ-جاتتىعۋ مەديتسينا ماماندارىنىڭ قاتىسۋىمەن وتەدى»، - دەيدى ول.
ۇلتتىق ستاندارتتارعا سايكەس، ۇشقىشتار مەن بورتسەرىكتەر ءار 3 جىل سايىن وقۋ- جاتتىعۋدان ءوتىپ، داعدىسىن جەتىلدىرىپ وتىرۋى ءتيىس.
«ورتالىق اشىلماس بۇرىن بورتسەرىكتەر مەن ۇشقىشتار بىلىكتىلىكتەرىن شەتەلدە ارتتىراتىن. ءبىزدىڭ ماماندار فرانكفۋرت قالاسىندا (گەرمانيا)، ىستانبۇل (تۇركيا) قالاسىندا وقىپ كەلدى. ول جاقتا وقۋ-جاتتىعۋ ورتالىعىن جالعا الاتىنبىز، ەندى استانادا ءوز ورتالىعىمىز بار. بۇدان پايدا ەندى شەتەلگە بارىپ وقۋدىڭ قاجەتى جوق، ەكىنشىدەن بيۋدجەت ۇنەمدەلەدى. ورتالىق ەلىمىزدە العاش اشىلىپ وتىر جانە حالىقارالىق ستاندارتتارعا ساي»، - دەيدى د. تۇرعانوۆ.
ورتالىق وكىلىنىڭ ايتۋىنشا، باسقا اۋە كومپانيالاردىڭ ماماندارىن وقىتۋعا دايىن.
«بۇل جەردە جۇمىسقا جاڭا قابىلدانعان قىزمەتكەرلەرمەن قاتار بۇرىننان جۇمىس ىستەپ كەلە جاتىرعان مامانداردى دا وقىتامىز. Airbus 320 جاتتىعۋ ۇشاعى، كەزىندە جاپونيا جانە ەۋروپا ەلدەرىنە ۇشقان، كەيىن ەسەپتەن شىعارعان سوڭ ۇشاق جاتتىعۋ قۇرالىنا اينالدى، ونىڭ ىشىندە بارلىق جابدىق بار»، - دەيدى اۋە كومپانياسىنىڭ وكىلى.