ادۆوكات پەريزات قايراتتىڭ كىناسىز ەكەنىن مالىمدەپ وتىر

استانا. KAZINFORM - قوعامدا رەزونانس تۋدىرعان ىسكە قاتىستى پەريزات قايراتتىڭ ادۆوكاتى ءوز ۇستانىمىن ءبىلدىردى.

قورعاۋشىنىڭ ايتۋىنشا، ونىڭ قورعاۋىنداعى كۇدىكتى تاعىلعان ايىپتاردى مويىندامادى جانە قىزمەتىن اشىق جۇرگىزگەن.

- جابىق رەجيمدە وتكەن تەرگەۋ ارەكەتىنىڭ ەگجەي-تەگجەيىن ايتۋعا قۇقىعىم جوق. ول (پەريزات قايرات - رەد.) قىزمەتىنىڭ اشىق بولعانىن، قايىرىمدىلىق جوباسىنىڭ شىنايى تۇردە جۇزەگە اسقانىن دالەلدەدى. مەن ونى كىناسىز دەپ ەسەپتەيمىن، ويتكەنى ءتيىستى دالەلدەر ۇسىنىلعان جوق، - دەپ قىسقا قايىردى ادۆوكات اسلانبەك داۋلەتياروۆ ب ا ق وكىلدەرىنىڭ ساۋالىنا جاۋاپ بەرە تۇرىپ.

ساناۋلى مينۋتتان كەيىن پەريزات قايرات پەن ونىڭ اناسىنا ۇكىم شىعادى. ەسكەرەتىن جايت، ب ا ق وكىلدەرىنىڭ سوت زالىنا كىرۋگە تىيىم سالىندى، جۋرناليستەر ارنايى باسپا ءسوز ورتالىعىندا ونلاين تىڭداپ وتىر.

ايتا كەتسەك، پروكۋرور پەريزات قايراتتى 10 جىل، اناسىن 8 جىل باس بوستاندىعىنان ايىرۋدى سۇراعان ەدى.

ەسكە سالايىق، پەريزات قايرات پەن ونىڭ اناسى عايني الاشبايەۆادان جاۋاپ الۋ جابىق رەجيمدە ءوتتى.

اتىشۋلى ىسكە قاتىستى ۇكىمەت باسشىسى ولجاس بەكتەنوۆ پىكىر ءبىلدىرىپ، «پەريزات قايرات ءىسى - زاڭنامالىق وزگەرىستەر ءۇشىن مۇمكىندىك» دەگەن ەدى.

اۆتور

داۋلەت ىزتىلەۋ