اداي جىلقىسى رەسمي مارتەبە الۋ ءۇشىن حالىقارالىق جارىستا سىنالادى

 ماڭعىستاۋدا اداي جىلقىسىن اسىل تۇقىمدى رەتىندە تانۋ، رەسمي مارتەبە الۋ ماقساتىندا 100 شاقىرىمدىق ۇزاق قاشىقتىقتا ات جارىسىنان حالىقارالىق تۋرنير وتەدى، دەپ حابارلايدى Kazinform. 

الامان بايگەدە قازىلىق ەتۋگە بىرىككەن اراب امىرلىكتەرىنەن 6 تورەشى كەلەدى. ءدۇبىرلى دودادا 18 جاستان اسقان، سالماعى 70 كەلىدەن كەم ەمەس شاباندوزدار باق سىناي الادى. سونىمەن قاتار ارنايى باس كيىمى مەن جالپاق ۇزەڭگىسى، وكشەلى ەتىگى بولۋى شارت. تۇلپار تىزگىندەيتىندەر تىركەۋدەن ءوتىپ، جىلقى پاسپورتىن كورسەتۋگە مىندەتتى. تۋرنير 4 قاراشا كۇنى كەندىرلى دەمالىس اۋماعىندا باستالادى.

- 3-4-قاراشا كۇندەرى وتەتىن تۋرنيرگە قوستانايدان، اقتوبەدەن، جەتىسۋ، الماتىدان، وسكەمەننەن شاباندوزدار قاتىسادى. شاشاۋىنا شاڭ جۇقپاس 30 دان اسا جۇيرىك جەلمەن جۇيىتكيدى. بايگەگە ات قوسۋ 2-قاراشاعا دەيىن جالعاسادى. جارىس 4 ەتاپتان تۇرادى. شاباندوزدار ءبىرىنشى جانە ەكىنشى اينالىمدا 30 شاقىرىمدىق قاشىقتىقتى شاۋىپ وتسە، ءۇشىنشى جانە ءتورتىنشى اينالىمدا 20 شاقىرىم قاشىقتىقتى ەڭسەرەدى. ءار اينالىمنان كەيىن تۇلپارلاردىڭ جاي-كۇيى قاتاڭ تەكسەرىلەدى، - دەدى قازاقستان رەسپۋبليكاسى ات سپورتى فەدەراتسياسى ر ق ب ماڭعىستاۋ وبلىستىق فيليالىنىڭ باسشىسى ورىنباسار قۇلبەكوۆ.

جالپى بۇل ات جارىس 2011 - 2015 -جىلدار ارالىعىندا ءوتتى، ودان كەيىن 2022-2023 -جىلى «ۇلى دالا جورىعى» جارىسىندا جالعاسىن تاپتى.

باستى ماقسات - «اداي» جىلقىسىنىڭ مارتەبەسىن الۋ. سوندىقتان تۇلپار ءار ءتۇرلى تەكسەرىستەن وتكەننەن كەيىن عانا جۇلدە ءادىل تۇردە شەتەلدىك ساراپشىلاردىڭ شەشىمىمەن بەرىلەدى.

تۋرنير 4-قاراشا ساعات 8.00 دە كەندىرلى دەمالىس اۋماعىندا باستالادى. ال سالتاناتتى اشىلۋ ءراسىمى ساعات 12:00 دە وتەدى.