اۋدارىسپاقتان 3 قازاقستاندىق سپورتشى التىن مەدال الدى
استانا. KAZINFORM - دۇنيەجۇزىلىك كوشپەندىلەر ويىندارىندا اقتىق سىنعا جولداما العان ءۇش قازاقستاندىق سپورتشى دا ءوز سالماقتارىندا التىن جۇلدە جەڭىپ الدى. ولار - ەرمەك قۇرالباي، المات لاتىپبەك جانە دارىن وتكەلباي.
اۋدارىسپاق ويىندارىنا 9 ەلدەن 64 ويىنشى قاتىستى. ونىڭ قاتارىندا قازاقستان، قىرعىزستان، وزبەكستان، موڭعوليا، رەسەي، قىتاي، ا ق ش، تۇركيا جانە ماجارستان بار.
60 كەلى سالماقتا سىنعا تۇسكەن قازاقستان ۇلتتىق قۇراماسىنىڭ سپورتشىسى ەرمەك قۇرالباي التىن مەدالعا يە بولدى. ول فينالدا قىرعىزستان سپورتشىسىن جەڭدى.
«جاقسى دايىندىقپەن كەلدىم. فينالداعى قارسىلاسىم - بىلتىر ات ۇستىندەگى كۇرەستەن 60 كەلىدە چەمپيون بولعان قىرعىز پالۋانى. ەل نامىسىن قورعاپ، ءبىرىنشى ورىن الامىز دەپ ۇمىتتەنگەن ەدىم. سەنىمدى اقتاعانىما قۋانىشتىمىن»، - دەدى ەرمەك قۇرالباي.
اۋدارىسپاقتان 70 كەلى سالماقتا سىنعا تۇسكەن المات لاتىپبەك تە التىن مەدال جەڭىپ الدى.
سونداي-اق، اۋدارىسپاقتان 80 كەلى سالماقتا سىنعا تۇسكەن دارىن وتكەلباي التىن مەدالعا يە بولدى.
ايتا كەتەيىك، ەرتەڭ 10-قىركۇيەكتە ەسىمحان ءراحماتىللا، سىرىم ءىزباساروۆ جانە ءبىرجان قوساليەۆ سىنعا تۇسەدى.
اۆتور
ايجان سەرىكجان قىزى