اۋدارىسپاق: قازاقستاندىق باپكەردىڭ ءجونسىز ارەكەتى التىننان ايىردى
استانا. KAZINFORM - اۋدارىسپاقتان 90 كەلى سالماقتا ەل نامىسىن قورعاعان ەسىمحان ءراحماتىللا فينالدا قىرعىزستان سپورتشىسى يسلام بەردىبەكۋۋلىمەن كەزدەسكەنى بەلگىلى.
باسەكەنىڭ نەگىزگى بولىگى تەڭ اياقتالىپ، جەڭىمپازدى انىقتاۋ ءۇشىن قوسىمشا ۋاقىت بەرىلگەن بولاتىن. ەرەجەگە سايكەس، سپورتشىلار ءبىر-ءبىرىنىڭ بەلبەۋىنەن مىقتاپ ۇستاپ الدى. كىمنىڭ قولى بەلبەۋدەن اجىراسا سول جەڭىلىس تابادى.
وسىلايشا، ءبىر-ءبىرىن الما-كەزەك تارتقىلاعان سپورتشىلار ءبىراز ۋاقىت تارتىستى. ءبىر ۋاقىتتا قازاقستان قۇراماسىنىڭ باپكەرى «قارسىلاستىڭ قولى شىعىپ كەتتى» دەپ ايعاي سالماسى بار ما؟!
ءسويتىپ، باس تورەشى توقتاتپاعان كەزدەسۋدى باس باپكەردىڭ ارەكەتى توقتاتتى. ەكى تاراپ داۋلاسىپ، اقىرى بەينەجازبانىڭ كومەگىنە جۇگىندى.
ۇزاققا سوزىلعان انىقتاۋ پروتسەسى قازاق باپكەرىنىڭ ارەكەتى نەگىزسىز ەكەنىن دالەلدەدى. ەسىمحان ءراحماتىللا جەڭىلمەسە دە، التىننان ايىرىلدى.
اۆتور
ورالحان قوجانوۆ