اۋدارىلعان قارجىنىڭ ءار تيىنىنا ەسەپ بەرىلەدى - «قازاقستان حالقىنا» قورى

استانا. KAZINFORM - ءىرى كومپانيالار بولگەن قارجاتتىڭ ءبىر تيىنىن دا اكىمشىلىك شىعىندارعا نەمەسە قىزمەتكەرلەردىڭ جالاقىسىنا بولمەيمىز. بۇل تۋرالى «قازاقستان حالقىنا» قوعامدىق قورىنىڭ باسقارما ءتوراعاسى ءلاززات شىڭعىسبايەۆا ءمالىم ەتتى.

- مەملەكەت باسشىسىنىڭ باستاماسىنان كەيىن، ءىرى كومپانيالار قورعا قاراجات اۋداردى. 2022-جىلدان بەرى 252 ميلليارد تەڭگە قاراجات كەلىپ ءتۇستى. ودان بەرى جىل سايىن قاراجات جيناۋ ماقساتى بولمادى. ويتكەنى جينالعان قاراجاتتى رەتتەپ، جوبالاردى ىسكە اسىرۋ كەرەك. ءىرى دونورلار «بەرگەن قاراجات قالاي جۇمسالىپ جاتىر؟» دەگەن سۇراعىنا جاۋاپ بەرىلۋى قاجەت. ءبىزدىڭ رەسمي سايتىمىزدا بارلىق قارجىنىڭ جۇمسالۋى، كىممەن كەلىسىمشارت بەكىتىلگەنى جايىندا تولىق اقپارات بار. ءتيىستى تىزىمدە ءۇش جىلدىڭ ىشىندە قول قويىلعان شارتتار تىركەلگەن جانە اشىق كورسەتىلگەن، - دەدى ل. شىڭعىسبايەۆا «Jibek Joly» تەلەارناسىنىڭ «ۋادە» باعدارلاماسىندا.

ونىڭ سوزىنە قاراعاندا، ءۇش جىلدىڭ ىشىندە دونورلار تاراپىنان قور قىزمەتىنە قاتىستى ەشقانداي كۇمان بولماعان.

- جالپى، قورعا تۇسكەن قاراجاتتىڭ باسىم بولىگى ءبىر جىلدىڭ (2022-جىلى) ىشىندە كەلىپ ءتۇستى. سونىمەن قاتار، زاڭناما اياسىندا جىل سايىن «سامۇرىق-قازىنا» تازا پايداسىنىڭ 7 پايىزىن «قازاقستان حالقىنا» قوعامدىق قورىنا اۋدارادى. «ءساتتى جۇلدىز» لوتەرەيا وپەراتورى دا جارناسىن سالىپ تۇرادى... اتاپ ايتقاندا، قور قاراجاتىن ساقتاۋعا قاتىستى ءىس-قيمىلدار تۇجىرىمدامامەن بەكىتىلگەن، وسى جايىندا تولىق اقپاراتتى ءبىزدىڭ رەسمي سايتتان كورۋگە بولادى، - دەدى قور باسشىسى.

ماسەلەن، قور بەلگىلى ءبىر قارجىنى دەپوزيتتە تەڭگەمەن ساقتايدى. ەرەجەدە دەپوزيتتە ساقتاۋعا قاتىستى تالاپتار قاراستىرىلعان.

- ول جاقتان (دەپوزيتتىڭ وسىمىنەن) تۇسكەن قاراجات اكىمشىلىك شىعىندارعا، كەڭسەنى جالعا الۋعا، شتاتقا جۇمسالادى. جالپى، دونورلاردان تۇسكەن قاراجات تەك جوبالار مەن باعدارلامالارعا باعىتتالادى. ءىرى كومپانيالار بولگەن قارجاتتىڭ ءبىر تيىنىن دا اكىمشىلىك شىعىندارعا نەمەسە قىزمەتكەرلەردىڭ جالاقىسىنا بولمەيمىز. وسى قادامدار دونورلاردىڭ سەنىمىن ساقتاۋعا، اشىق جۇمىس ىستەۋ ءۇشىن ىسكە اسىرىلىپ وتىر. بىزگە كەلگەن قارجىنىڭ ءار تيىنىنا ەسەپ بەرەمىز، - دەدى ول.

ايتا كەتەيىك، قازاقستاندا مەملەكەت باسشىسى قاسىم-جومارت توقايەۆتىڭ تاپسىرماسى بويىنشا «قازاقستان حالقىنا» قوعامدىق الەۋمەتتىك قورى (ق ءا ق) قۇرىلدى.

ەسكە سالساق، بيىل قاڭتار ايىندا «قازاقستان حالقىنا» قوعامدىق قورىن ءۇش جىل بويى باسقارعان بولات جامىشيەۆ قىزمەتىنەن كەتتى.

ول بۇل قىزمەتكە 2022-جىلدىڭ قاڭتارىندا تاعايىندالعان ەدى. باسقارما ءتوراعاسى بولىپ سايلانعان وكىلەتتىك مەرزىمىنىڭ اياقتالۋىنا بايلانىستى ب. جامىشيەۆ قورداعى جۇمىسىن اياقتاۋ تۋرالى شەشىم قابىلدادى.