ادامنىڭ جۇيكە جۇيەسىن تىنىشتاندىرۋعا ارنالعان ونىمدەر
استانا. قازاقپارات - ۇيقىسىزدىق، جۇمىستىڭ كوپتىگى جانە تاعى دا باسقا فاكتورلار جۇيكە جۇيەسىنىڭ السىرەۋىنە ىقپال ەتەدى. بۇدان كەيىن كۇيزەلۋ مەن جالپى السىرەۋدىڭ دە اۋىلى الىس ەمەس. ماسەلەنى شەشۋگە كەيبىر ازىق-تۇلىك ونىمدەرى كومەكتەسەدى.
كۇيزەلۋگە قارسى ونىمدەر
كوپتەگەن دارىگەرلەر جۇيكە جۇيەسىن ءدارى-دارمەكپەن تىنىشتاندىرۋدى ۇسىنادى. وكىنىشكە وراي، ءدارى-دارمەكتەر كەرى اسەر بەرۋى مۇمكىن جانە كەيبىرى اعزاعا جاقپايدى. ەگەر ءسىز دەنساۋلىعىڭىزعا الاڭدايتىن بولساڭىز، تاعامىڭىزعا قاجەتتى ونىمدەردى قوسۋ ارقىلى تىنىشتىقتى قايتا قالپىنا كەلتىرۋگە، كۇش-قۋات جيناپ، بايىرعى ءومىر سالتىنا كەلۋگە تىرىسىپ كورىڭىز.
انتيدەپرەسسانتتاردى ماقساتتى تۇردە ۇزاققا سوزىلعان كۇيزەلىس كەزىندە، گورمون ءوندىرۋ قاتتى بۇزىلعاندا پايدالانۋ كەرەك.
قۇرامىندا اقۋىز، يود، س جانە رر دارۋمەندەرى مەن ماگنيى بار بانان تىنىشتانۋعا اسەر ەتە الادى. بۇل جەمىس كوڭىل كۇيگە تۇبەگەيلى اسەر ەتەتىن سەروتونيندى وندىرۋگە كومەكتەسەدى. وعان قوسا بانان ۇيقىنى جاقسارتادى.
كاكاو مەن قارا شوكولاد جۇيكە جۇيەسىنىڭ تەز ارادا قالپىنا كەلۋىن قامتامسىز ەتەدى. تاڭعى ۋاقىتتا ىشىلگەن ءبىر شىنى كاكاو اعزادا ادرەنالين، سەروتونين جانە دوفامين ءوندىرىسىن ارتتىرادى. بۇلار جۇيكەسى السىرەگەن ادامنىڭ تىنىشتالۋىنا جانە جالپى جاعدايىنىڭ جاقسارۋىنا ىقپال ەتەدى. كاكاو-بوبتار - تابيعي انتيدەپرەسسانت ەكەنىن جىلدىق تاجىريبەلەر دالەلدەگەن.
دەپرەسسيا مەن كۇيزەلىستى ەمدەۋدە جاڭعاقتىڭ ورنى ەرەكشە. ولار جۇيكە كۇشىن جايلاپ جاقسارتادى، كوڭىل كۇيگە اسەر ەتەتىن گورمونداردىڭ ءتۇزىلۋىن رەتتەيدى، ميدى قاجەتتى ميكروەلەمەنتتەرمەن قورەكتەندىرەدى. كۇندەلىكتى ءبىر ۋىس جاڭعاق جەسەڭىز، جاعدايىڭىز جاقسارىپ، شاتتانىپ جۇرەسىز.
تەڭىز بالىعىندا جۇيكە جۇيەسىنە جاقسى اسەر ەتەتىن كوپتەگەن مايلى قىشقىلدار بار. بالىق پەن تەڭىز ونىمدەرىن ءجيى تۇتىنۋ ارقىلى جابىرقاۋلى كوڭىل-كۇيدىڭ الدىن الۋعا بولادى.
كۇيزەلىس كەزىندە جاۋجاپىراق قوسىلعان شايدى جاتار الدىندا ءىشۋ ۇسىنىلادى. ول بەيمازا كۇيدى باسىپ، ۇيقىنى جاقسارتادى، سونىمەن قاتار كۇندىزگى ەنجارلىققا توتەپ بەرەدى. جۇيكەنىڭ تىنىشسىزدىعىن باسۋعا ساسىقشوپ تە كومەكتەسەدى، ونى شايعا قوسىپ ىشۋگە دە بولادى.
ءومىر سالتىڭىزدى وزگەرتىڭىز!
ەگەر ءاردايىم كوڭىل كۇيىڭىز جابىرقاۋلى بولىپ جۇرسە، ومىرىڭىزدە بىردەڭەنى وزگەرتۋ كەرەك. جۇمىستان كوبىرەك دەمالۋعا تىرىسىڭىز، كينوتەاتر، كورمەلەرگە بارىڭىز. مۇمكىندىگىڭىز بولسا، باسسەينگە جازىلىڭىز. ءجۇزۋ جان تىنىشتىعىن ورناتۋعا كومەكتەسەدى.
ويىڭىزدى باسقا جاققا بۇراتىن، كوڭىلىڭىزگە جاعاتىن ىستەرمەن اينالىسىپ كورىڭىز. ىزدەنىستەر ارقىلى جانىڭىز قالاعان نارسەنى تاپقاندا مازاسىزدىق تا كەتەدى.
دايىنداعان: انار مۇستافينا