ادامنان دا اقىلدى روبوت قورقىنىشتى ما؟
استانا. قازاقپارات - قولدانىستاعى ج ي جۇيەلەرى ءبىر رەتتىك، كىشىگىرىم تاپسىرمالاردى ورىنداۋعا ارنالعان. ولاردىڭ مۇمكىندىكتەرى تار اۋقىمدا جۇمىس ىستەۋگە ارنالعان. جاقىن كۇندەرى ادامنان دا اقىلدى، ويلاۋعا جانە جوسپارلاۋعا قابىلەتتى ماشينالار شىعادى.
كەشە Financial Times OpenAI جانە Meta كومپانيالارىنىڭ جاڭا ج ي ۇلگىلەرىنە بايلانىستى حابارلاما جاريالادى. وسى ماتەريالعا سۇيەنگەن Aikyn.kz جاساندى ينتەللەكت جۇيەلەرىنىڭ جاڭا ءتۇرىنىڭ مۇمكىندىكتەرى مەن قابىلەتتەرىن تۇسىندىرەدى.
جاڭا مودەلدەردىڭ ەستە ساقتاۋ قابىلەتى كەرەمەت بولادى. ويتكەنى ول - ماشينا.
Meta جانە OpenAI جاڭارتۋلارى وسى جىلى Google ،Anthropic جانە Cohere سياقتى كومپانيالار شىعارعان ۇلكەن جاڭا ءتىل ۇلگىلەرىنىڭ جاڭا بۋىنى دەپ ايتىلۋدا. ەكى كومپانيانىڭ جاڭا ج ي ۇلگىلەرى ادامنان دا اقىلدى ماشينالار جاساۋعا جەتۋ جولىنداعى ماڭىزدى قادام. جاڭا ماشينالار ويلاۋعا جانە جوسپارلاۋعا قابىلەتتى بولماقشى. ولار ادامعا قاۋىپتى مە؟
وسى اپتادا OpenAI جانە Meta باسشىلارى ChatGPT سياقتى گەنەراتيۆتى جاساندى ينتەللەكت قوسىمشالارىندا قولدانىلاتىن جۇيەلەردىڭ ۇلكەن تىلدىك ۇلگىلەرىنىڭ كەلەسى نۇسقالارىن ىسكە قوسۋعا دايىندالىپ جاتقاندارىن ايتتى.
مەتا الداعى اپتالاردا Llama 3 جۇيەسىن ىسكە قوساتىنىن جاريالادى، ال Microsoft مول ينۆەستيتسيا قۇيعان OpenAI بولسا ءوزىنىڭ GPT-5 دەپ اتالاتىن كەلەسى مودەلىن «جاقىندا» ۇسىنباقشى.
«ءبىز بۇل مودەلدەردى جاي عانا سويلەتىپ قانا قويماي، وي قورىتۋعا، جوسپارلاۋعا قابىلەتتى ەتۋ ءۇشىن كوپ جۇمىس ىستەپ جاتىرمىز. ونىڭ ەستە ساقتاۋ قابىلەتى دە بولادى»، - دەيدى Meta-نىڭ جاساندى ينتەللەكت زەرتتەۋلەرىنىڭ ۆيتسە-پرەزيدەنتى دجوەل پينو.
OpenAI وپەراتسيالىق ديرەكتورى برەد لايتكەپ Financial Times گازەتىنە GPT-تىڭ كەلەسى ۇرپاعى پايىمداۋ سياقتى «قيىن ماسەلەلەردى» شەشۋدە ۇلكەن پروگرەسكە قول جەتكىزگەندەرىن ايتقان. «ءبىز كۇردەلىرەك تاپسىرمالاردى نەعۇرلىم كۇردەلى جولمەن ورىنداي الاتىن ج ي-دى قولدانا باستايمىز. مەنىڭ ويىمشا، ءبىز بۇل مودەلدەردىڭ ويلاۋ قابىلەتىنىڭ نەگىزىن قالاپ جاتىرمىز»، - دەيدى ول.
بۇگىنگى ج ي جۇيەلەرى «ءبىر رەتتىك، كىشىگىرىم تاپسىرمالاردى ورىنداۋعا جاقسى ماشىقتانعان، ءبىراق ولاردىڭ بىرنەشە تاقىرىپتى قامتۋ مۇمكىندىكتەرى جوق.
تەحنولوگيالىق كومپانيالار بارعان سايىن جەتىلگەن گەنەراتيۆتى جاساندى ينتەللەكت جاساۋعا ۇمتىلعان سايىن پروگرەسس قارقىنى ۇدەي تۇسۋدە. ادامدار جاساعان ونىمدەردەن ايىرماشىلىعى جوق ساپادا ادام سوزدەرىن، سۋرەتتەردى، كودتاردى جانە ۆيدەولاردى جاساي الاتىن باعدارلامالىق جاساقتامالار ومىرگە جىلدام ەنگىزىلۋدە.
ۆيرتۋالدى كومەكشىلەر ءارتۇرلى تاپسىرمالار تىزبەگىن ورىندايدى.
ويلاۋ جانە جوسپارلاۋ - بۇل ج ي زەرتتەۋشىلەرى «جاساندى جالپى ينتەللەكت» دەپ اتايتىن ماڭىزدى قادام. ادام دەڭگەيىندەگى تانىمى بار جاڭا چات-بوتتار مەن ۆيرتۋالدى كومەكشىلەر بىرنەشە باعىتتاعى تاپسىرمالار تىزبەگىن ورىنداۋعا جانە ولاردىڭ ارەكەتتەرىنىڭ سالدارىن وزدەرى بولجاي الاتىنداي مۇمكىندىككە قول جەتكىزۋگە ۇشتالعان.
سەيسەنبى كۇنى (9-ساۋىردە) لوندونداعى ءىس-شارادا سويلەگەن سوزىندە Meta-نىڭ جاساندى ينتەللەكت بويىنشا باس عالىمى يانن لەكۋن قازىرگى جاساندى ينتەللەكت جۇيەلەرى «كوپ ويلانباستان نەمەسە جوسپارلاماي-اق ءبىر سوزدەن كەيىن ءسوز تىركەستەرىن بىرىنەن سوڭ ءبىرىن شىعارىپ، سويلەم قۇرايتىنىن» ايتقان.
ولار كۇردەلى ماسەلەلەردى شەشۋدە نەمەسە اقپاراتتى ۇزاق ۋاقىت بويى ساقتاۋدا قيىندىقتارعا تاپ بولعاندىقتان، ءالى دە «اقىماق قاتەلىكتەر جىبەرەدى» دەيدى ول.
دالەلدەۋ مەن پايىمداۋلاردى قوسۋ ارقىلى ج ي مودەلدەرى «مۇمكىن جاۋاپتاردى ىزدەۋگە»، «ءىس- ارەكەتتەر تىزبەگىن جوسپارلاۋعا» جانە ء«وزىنىڭ ارەكەتتەرىنىڭ اسەرى قانداي بولاتىنىنىڭ پسيحيكالىق مودەلىن جاساۋعا» كوڭىل بولۋگە قابىلەتتى بولادى. بۇل «ماشينالىق ينتەللەكتى كەلەسى دەڭگەيگە كوتەرۋ ءۇشىن» جاسالىنۋدا.
لەكۋن جاساندى ينتەللەكت «اگەنتتەرىمەن» جۇمىس ىستەپ جاتقانىن ايتادى. ول ماشينالار، مىسالى، پاريجدەگى ءبىر كەڭسەدەن نيۋ- يوركتەگى ەكىنشى كەڭسەگە باراتىن ساپاردى جوسپارلاپ، اۋەجايعا دەيىنگى، ودان كەيىنگى ساپاردىڭ ءاربىر كەزەڭىنە تاپسىرىس بەرەتىن بولادى.
Meta ءوزىنىڭ جاڭا جاساندى ينتەللەكت مودەلىن WhatsApp پەن Ray-Ban سمارت كوزىلدىرىكتەرىنە ەنگىزۋدى جوسپارلاپ وتىر. كومپانيا الداعى ايلاردا ءارتۇرلى قولدانبالار مەن قۇرىلعىلارعا ارنالعان ءتۇرلى ولشەمدەگى Llama 3 شىعارۋعا دايىندالۋدا.
OpenAI GPT-تىڭ كەلەسى نۇسقاسى تۋرالى «جاقىندا جاڭالىقتار» بولاتىنىن جاريالاعان. OpenAI وپەراتسيالىق ديرەكتورى برەد لايتكەپ: «ۋاقىت وتە كەلە ءبىز ۇزاعىراق جانە كۇردەلى ماسەلەلەردى شەشەتىن مودەلدەردى كورەمىز دەپ ويلايمىن. ال ول ءۇشىن ماشينالاردىڭ ويلاۋ قابىلەتىن جاقسارتۋ قاجەت»، - دەيدى.
لوندونداعى ءىس-شارادا Meta ءونىمىنىڭ ديرەكتورى كريس كوكس Ray-Ban اقىلدى كوزىلدىرىكتەرىندەگى كامەرالاردى بۇزىلعان كوفە ماشيناسىن باقىلاۋ ءۇشىن پايدالانۋعا بولاتىنىن ايتادى. بۇل كەزدە Llama 3 ارقىلى جۇمىس ىستەيتىن ج ي كومەكشىسى ونى قالاي جاساۋعا بولاتىنىن كافەنىڭ قوجايىنىنا تۇسىندىرەدى.
«ءبىز وسىنداي ج ي كومەكشىلەرىمەن ۇنەمى سويلەسەتىن بولامىز. سوندىقتان ءبىزدىڭ تسيفرلىق ديەتامىز دا جاساندى ينتەللەكت جۇيەلەرىنە بايلانىستى بولادى»، - دەيدى لەكۋن.
ءيا، ادام ومىرىندەگى ج ي ماڭىزى ەندى وسە بەرمەكشى، ونى توقتاتۋ مۇمكىن ەمەس. تەك ونى قولدانۋدا جاۋاپكەرشىلىكتى ءتۇسىنىپ، جەكە تۇلعانىڭ عانا ەمەس، تۇتاس ەلدىڭ، مەملەكەتتىڭ مۇددەسىمەن ساناسۋعا شاقىرامىز. ويتكەنى ەرتەڭگى اقىلدى ماشينانىڭ نيەتىن ءبىز بىلمەيمىز.