ادام ولتىرگەنى ءۇشىن كۇدىككە ىلىنگەن قازاقستان ازاماتى تۇركيادان ەكستراديتسيالاندى

استانا. KAZINFORM - بۇگىن باس پروكۋراتۋرا مەن ىشكى ىستەر مينيسترلىگىنىڭ قىزمەتكەرلەرى قازاقستان رەسپۋبليكاسى سىرتقى ىستەر مينيسترلىگىنىڭ قولداۋىمەن توناۋ، كىسى ءولتىرۋ جانە ۇرلىق جاساعانى ءۇشىن قىلمىستىق جاۋاپكەرشىلىككە تارتۋ ماقساتىندا قازاقستان ازاماتىن تۇركيادان ەكستراديتسيالادى. بۇل تۋرالى قازاقستاننىڭ باس پروكۋراتۋراسى مالىمدەدى.

2022 -جىلدىڭ ناۋرىز ايىندا الماتى وبلىسىندا كۇدىكتى ءوزىنىڭ اعاسىمەن بىرلەسىپ قۇنى 300 ميلليون تەڭگەدەن استام تەمەكى ونىمدەرىن تاسىمالدايتىن جۇك كولىگىنىڭ جۇرگىزۋشىسىنە قاراقشىلىق شابۋىل جاساعان. جۇرگىزۋشىنى ءولتىرىپ، ءمايىتتى جول بويىنداعى شۇڭقىرعا كومگەن.

«قىلمىس جاساعان كۇدىكتىلەردىڭ ءبىرى ۇستالىپ، ناتيجەسىندە سوتتالدى، ال ەكىنشىسى تەرگەۋدەن قاشىپ ۇلگەردى، سوندىقتان وعان حالىقارالىق ىزدەۋ جاريالاندى. 2023 -جىلعى تامىزدا ەكىنشى كۇدىكتى تۇركيادا ۇستالدى. قازىر ول استاناداعى تەرگەۋ يزولياتورىندا قاماۋدا. وسى قىلمىستاردى جاساعانى ءۇشىن مۇلكى تاركىلەنىپ، ون بەس جىلدان جيىرما جىلعا دەيىنگى مەرزىمگە باس بوستاندىعىنان ايىرۋ نەمەسە ءومىر بويىنا باس بوستاندىعىنان ايىرۋ تۇرىندەگى جازا قاراستىرىلعان»، - دەلىنگەن حابارلامادا.

اۆتور
باقىتگۇل اباي قىزى