ادام تەرىسىنىڭ قارتايۋىن جەدەلدەتەتىن ميكروفلورا ميكروبتارى انىقتالدى

امەريكالىق جانە فرانتسۋزدىق مولەكۋلا بيولوگتارى تەرىنىڭ قارتايۋ جىلدامدىعى مەن ءاجىم تۇسۋىنە تەرى قاباتىنىڭ ميكروفلورا قۇرامى مەن وندا Staphylococcus ،Kocuria ،Peptostreptococcus جانە Lysobacter سىندى باكتەريالاردىڭ بار ەكەنى اسەر ەتەتىنىن انىقتادى. Kazinform بۇل تۋرالى ت ا س س- قا سىلتەمە جاساپ حابارلايدى.

 

- تەرىنىڭ قارتايۋى بەلگىلەرى، ونىڭ ىشىندە ءاجىم مەن كوز قيىعىنداعى اجىمدەرگە بايلانىستى بيوماركەرلەردى انىقتاۋدا ۇلكەن جاڭالىق اشتىق. ول دەنساۋلىق پەن تەرىنى جاقسارتۋعا باعىتتالعان تاسىلدەردى جاساۋدى جەدەلدەتەدى، - دەپ ءمالىم ەتتى L'Oreal كومپانياسى زەرتتەۋ ورتالىعىنىڭ عىلىمي قىزمەتكەرى چجەن تسيان.

ونىڭ ءسوزىن سان- ديەگوداعى كاليفورنيا ۋنيۆەرسيتەتىنىڭ (UCSD) باسپا ءسوز قىزمەتى كەلتىردى.

جەن چيان مەن باسقا دا ماماندار ميكروفلورا قۇرامىنىڭ تەرى مەن ونىڭ قارتايۋىنا اسەرىن زەرتتەۋ بويىنشا ەكسپەريمەنتكە قاتىسۋعا كەلىسكەن 18-70 جاس ارالىعىندا 650 ەرىكتى ايەلگە زەرتتەۋ جۇرگىزىپ، وسىنداي شەشىمگە كەلدى. زەرتتەۋگە فرانسيا مەن ا ق ش تۇرعىندارى عانا ەمەس، ماۆريكي ارالى، سينگاپۋر، جاپونيا مەن قىتايدا تۇراتىن ايەلدەر دە قاتىستى.

وسى ەكسپەريمەنت اياسىندا عالىمدار تاجىريبەگە قاتىسقان ايەلدەردىڭ ءبارىنىڭ بەت تەرىسىنىڭ قانداي جاعدايدا ەكەنىن زەرتتەپ، ونى ميكروفلورا ەرەكشەلىكتەرىمەن سالىستىردى. سالىستىرۋ ميكروفلورا ەرەكشەلىكتەرى مەن تەرىنىڭ قارتايۋ سيپاتىندا شىنىندا بايلانىس بار ەكەنىن انىقتاپ، تەرى قۇرعاقتىعى، ءاجىم مەن قارتايۋدىڭ باسقا دا بەلگىلەرى مەن ميكروبتاردىڭ ءارالۋاندىعى جانە ءتۇر قۇرامى اراسىنداعى بايلانىسقا قاتىستى زاڭدىلىقتى اشتى.

سونىمەن، جەن چيان جانە باسقا ساراپشىلار تەرى ميكروفلوراسىنىڭ تۇرلىك ءارالۋاندىعى ادامنىڭ جاسىنا قاراي بىرتىندەپ وسەتىنىن، سونىمەن قاتار ونىڭ قۇرامىندا كوپتەگەن ميكروبتىڭ بولۋى تەرىنىڭ جوعارعى قاباتىنان سۋدىڭ باياۋ جوعالۋىنا بايلانىستى ەكەنىن انىقتادى. بۇعان قوسا، زەرتتەۋشىلەر تەرىنىڭ قارتايۋ جىلدامدىعىنا جانە كوزدىڭ بۇرىشىندا اجىمدەردىڭ پايدا بولۋىنا ايتارلىقتاي اسەر ەتەتىن باكتەريالاردىڭ بىرنەشە ءتۇرىن تاپتى.

اتاپ ايتقاندا، Staphylococcus ،Kocuria ،Peptostreptococcus جانە Lysobacter سىندى باكتەريالار كوپ بولعان ادامداردا ءوزى قاتارلاس باسقا ادامدارمەن سالىستىرعاندا اجىمدەر از بولعان، ال brevibacterium جانە Kaistella تۇقىمداس باسقا ميكروبتار ارتىق بولعاندا كەرىسىنشە، تەرى قارتايۋى مەن اجىمدەردىڭ ءتۇسۋى تەزىرەك جۇرگەن. عالىمداردىڭ پىكىرىنشە، وسىنى ءتۇسىنۋ ارقىلى ميكروفلورانىڭ قۇرامىن ەسكەرە وتىرىپ، تەرىنىڭ قارتايۋىن باياۋلاتاتىن تاسىلدەردى جاساۋعا بولادى.