ادام ساۋداسىنا قاتىستى زاڭنامالىق بازا كۇشەيتىلدى - ارتۋر لاستايەۆ

استانا. KAZINFORM - ادام قۇقىقتارى جونىندەگى ۋاكىل ارتۋر لاستايەۆ ادام ساۋداسىنا قارسى ءىس- قيمىل قادامدارىنا قاتىستى تۇسىنىك بەردى.

«قازاقستان حالىقارالىق قاۋىمداستىقتىڭ ءبىر بولىگى بولعاندىقتان، ءبىرقاتار كونۆەنتسيا اياسىندا ادام ساۋداسىنا قارسى كۇرەس حالىقارالىق مىندەتتەمەلەرىمىزدىڭ ءبىرى سانالادى. بىرىنشىدەن، ءبىز زاڭنامالىق بازانى نىعايتتىق، ونى حالىقارالىق ستاندارتتارعا سايكەستەندىردىك. قازىرگى كەزدە ۇلتتىق ستاندارتتاردى ودان ءارى جەتىلدىرۋ تۇرعىسىندا ءتيىستى تالداۋ جاسالىپ جاتىر. جالپى، قازاقستان مۇنداي قىلمىستار سانى بويىنشا الدىڭعى قاتاردا ەمەس. ادام ساۋداسىنا قارسى ءىس- قيمىل تەك تەرگەۋ، قىلمىستاردى انىقتاۋ جانە سوت ارقىلى جازانىڭ بۇلتارتپاستىعىن قامتاماسىز ەتۋ عانا ەمەس ەكەنىن ءتۇسىنۋ كەرەك. بۇل تۇرعىدا تۇتاس الەۋمەتتىك- ەكونوميكالىق ءىس- شارالار جۇزەگە اسىرىلادى، ياعني زارداپ شەككەندەردى تىركەۋدەن باستاپ، ولاردى وڭالتۋعا دەيىنگى اۋقىمدى جۇمىستار قامتىلادى»، - دەدى ا. لاستايەۆا.

ونىڭ ايتۋىنشا، قازاقستان بۇل باعىتتا ايتارلىقتاي ىلگەرى قادام جاسادى. قازىر ەلىمىز ورتالىق ازيا ءوڭىرى مەن پوستكەڭەستىك كەڭىستىكتە، سونداي- اق باسقا دا ەلدەردىڭ الدىنا شىعىپ وتىر.

«ءبىز ءوز تاجىريبەمىزدى وزگە مەملەكەتتەردىڭ وكىلدەرىنە تۇسىندىرۋگە دايىنبىز. سوندىقتان بۇگىن ەلوردادا ءوتىپ جاتقان كونفەرەنسيادا بىرلەسكەن قادامداردى پىسىقتايمىز»، - دەدى ادام قۇقىقتارى جونىندەگى ۋاكىل.

ونىڭ سوزىنە قاراعاندا، ىشكى ىستەر مينيسترلىگى جىلدىڭ باسىنان بەرى ادام ساۋداسىنا قاتىستى 197 قىلمىس تىركەگەن.

«وسى مەرزىم ىشىندە اتالعان سانات بويىنشا (ادام ساۋداسى) ءبىزدىڭ كەڭسەگە بىردە- ءبىر ءوتىنىش تۇسكەن جوق. اتاپ ايتقاندا، ادام قۇقىقتارىنىڭ بۇزىلۋىنا قاتىستى وتىنىشتەر مەن شاعىمداردىڭ جالپى سانىنىڭ ارتۋى بايقالىپ وتىر. بيىلعى 9 ايدا بىزگە 4800 دەن استام ءوتىنىش كەلىپ ءتۇستى، بۇل كورسەتكىش بىلتىرمەن سالىستىرعاندا  عا ارتىق»، - دەدى ارتۋر لاستايەۆ.

ەسكە سالا كەتەيىك، بيىل شىلدە ايىندا مەملەكەت باسشىسى «ادام ساۋداسىنا قارسى ءىس- قيمىل تۋرالى» قازاقستان رەسپۋبليكاسىنىڭ زاڭىنا قول قويدى.

زاڭدا ادام ساۋداسىنا قارسى ءىس-قيمىل قاعيداتتارى بەكىتىلگەن، سونداي- اق مەملەكەتتىك ورگانداردىڭ، جەرگىلىكتى اتقارۋشى ورگانداردىڭ جانە ادام ساۋداسىنا قارسى ءىس-قيمىل جونىندەگى وزگە دە سۋبەكتىلەردىڭ قۇزىرەتى بەكىتىلگەن.