اعزادا ماگني جەتىسپەۋشىلىگىنىڭ بەلگىلەرى قانداي؟

استانا. KAZINFROM - ماگني - ءبىزدىڭ اعزامىز ءۇشىن ەڭ قاجەتتى مينەرالداردىڭ ءبىرى. ول جۇيكە جۇيەسىن تىنىشتاندىرادى، جۇرەك سوعىسىن رەتتەيدى، بۇلشىق ەتتى بوساڭسىتادى جانە جالپى ىشكى تەپە-تەڭدىكتى ساقتاۋعا كومەكتەسەدى. ءبىراق كوپشىلىگىمىز ماگنيدىڭ جەتىسپەيتىنىن بايقاماي دا جۇرە بەرەمىز.

ماگني جەتىسپەيتىنىن بىلدىرەتىن 5 نەگىزگى بەلگى:

1. تىتىركەنگىشتىك پەن كۇيزەلىس

كوڭىل-كۇيىڭىز ءجيى قۇبىلىپ، ۇيقىڭىز ناشارلاپ، ۇساق نارسەلەرگە اشۋلاناتىن بولساڭىز - بۇل جۇيكە جۇيەسىنىڭ ماگنييگە مۇقتاج ەكەنىن كورسەتەدى. ماگني ميدى تىنىشتاندىراتىن حيميالىق پروتسەستەرگە تىكەلەي اسەر ەتەدى.

2. بۇلشىق ەت تارتىلۋى مەن تىرىسۋ

اياعىڭىز تۇندە جيى تارتىلىپ وياناتىن بولسا نەمەسە دەنەڭىز ۇزاق ۋاقىت قالپىنا كەلە المايتىن كۇيدە جۇرسە، بۇلشىق ەتتەردەگى ماگنيدىڭ ازايۋى سەبەپ بولۋى مۇمكىن.

3. سوزىلمالى شارشاۋ مەن ەنەرگيانىڭ تومەندەۋى

ۇيقى قانعانىمەن ءوزىڭىزدى شارشاڭقى سەزىنۋ - ماگنييدىڭ جاسۋشا ىشىندە ەنەرگيا وندىرۋگە كەدەرگى كەلتىرىپ تۇرعانىنىڭ بەلگىسى.

4. جۇرەك سوعىسىنىڭ تۇراقسىزدىعى

جۇرەك سوعىسى بىردە جيىلەپ، بىردە باياۋلاپ، سەكىرىپ تۇرعانداي سەزىلسە، بۇل ماگنيي تاپشىلىعىنىڭ بەلگىسى بولۋى مۇمكىن. بۇل مينەرال جۇرەك بۇلشىقەتىنىڭ دە جۇمىسىنا قاتىسادى.

5. باس اۋرۋى، ميگرەن

كەيبىر ادامداردا ماگنيي جەتىسپەۋشىلىگى ءجيى باس اۋرۋىن تۋدىرادى. اسىرەسە كۇيزەلىس كەزىندە بۇل جاعداي ۋشىعۋى مۇمكىن.

كىمدەردە ماگني تاپشىلىعى جيى كەزدەسەدى؟

- گازدالعان سۋسىن مەن كوفەنى كوپ ىشەتىندەر

- جۇيكەسى ءجيى شارشايتىندار، كۇيزەلىسكە بەيىم جاندار

- سپورتپەن اينالىساتىندار (تەر ارقىلى ماگنيي شىعىپ كەتەدى)

- جۇكتى ايەلدەر

- قانت ديابەتىمەن اۋىراتىندار

ماگنيگە باي تاعامدار:

- جاسىل جاپىراقتى كوكونىستەر (شپينات، اقجەلكەن)

- جاڭعاقتار مەن تۇقىمدار

- قاراقۇمىق، سۇلى جارماسى

- قارا شوكولاد (كەمى p)

- بانان، اۆوكادو

- بۇرشاق تۇقىمداستار

قالاي انىقتاۋعا بولادى؟

قان تالداۋى ارقىلى اعزاداعى ماگنيي دەڭگەيىن تەكسەرۋگە بولادى. ەگەر تاپشىلىق راستالسا، دارىگەر كەڭەسىمەن ماگني قوسپالارىن قابىلداۋعا بولادى. ماگني - اعزاداعى كوپتەگەن پروتسەستەرگە جاۋاپ بەرەتىن ماڭىزدى ەلەمەنت. ونىڭ جەتىسپەۋشىلىگى - ەلەۋسىز باستالىپ، ۇزاققا سوزىلسا، دەنساۋلىققا ەلەۋلى اسەر ەتۋى مۇمكىن. سوندىقتان تاماقتانۋ ادەتتەرىمىزگە ءمان بەرىپ، اعزامىزدى تىڭداي بىلەيىك.