ىشكى ىستەر مينيسترلىگىنىڭ اسكەري-تەرگەۋ ورگاندارى ماڭعىستاۋ وبلىسىندا وقۋ-جاتتىعۋ كەزىندە اسكەري قىزمەتشىلەردىڭ قازا تابۋ دەرەگى بويىنشا قىلمىستىق ءىستى تەرگەۋدىجالعاستىرىپ جاتىر.
قايعىلى وقيعانىڭ بارلىق ءمان-جايىن جان-جاقتى ءارى وبەكتيۆتى انىقتاۋ ءۇشىن كەشەندى تەرگەۋ ارەكەتتەرى جۇرگىزىلدى.
- قازىرگە دەيىن 300-دەن استام ادامنان جاۋاپ الىنىپ، 30-دان استام سوت ساراپتاماسى مەن زەرتتەۋ جۇرگىزىلدى، - دەلىنگەن حابارلامادا.
ەسكە سالا كەتەيىك، تەرگەۋ بارىسىندا قىزمەتكە سالعىرت قارادى جانە كەمە جۇرگىزۋ قاعيدالارىن بۇزدى دەگەن كۇدىكپەن 8 لاۋازىمدى تۇلعا سوت سانكسياسىمەن قاماۋعا الىندى. ولار — قارۋلى كۇشتەردىڭ اسكەري-تەڭىز كۇشتەرىنىڭ باس قولباسشىسى، ونىڭ ءبىرىنشى ورىنباسارى مەن جاۋىنگەرلىك دايارلىق جونىندەگى ورىنباسارى، ەكى اسكەري ءبولىمنىڭ كومانديرلەرى، تەڭىز جاياۋ اسكەرى باتالونى مەن روتاسىنىڭ كومانديرلەرى، سونداي-اق كاتەر كاپيتانى.
قىلمىستىق-پروتسەستىك كودەكستىڭ 201-بابىنا سايكەس سوتقا دەيىنگى تەرگەپ-تەكسەرۋدىڭ وزگە دەرەكتەرىن جاريا ەتۋگە بولمايدى.
جاقىن ارادا تەرگەۋ ارەكەتتەرىن اياقتاپ، قىلمىستىق پروتسەسكە قاتىسۋشىلاردى ءىس ماتەريالدارىمەن تانىستىرۋ جوسپارلانىپ وتىر.
تەرگەۋ بارىسى باس پروكۋراتۋرانىڭ ەرەكشە باقىلاۋىندا.
ايتا كەتەلىك پرەمەر-مينيستر ولجاس بەكتەنوۆ دەپۋتاتتىق ساۋالعا بەرگەن جاۋابىندا اسكەري وقۋ- جاتتىعۋلار كەزىندە انىقتالعان كەمشىلىكتەر مەن ساربازداردىڭ قاۋىپسىزدىگىن كۇشەيتۋ شارالارى تۋرالى ايتقان ەدى.