ورتالىقتىڭ حابارلاۋىنشا، Facebook الەۋمەتتىك جەلىسىندە كاسپيدەگى قايعىلى وقيعاعا بايلانىستى تاعى ءبىر اسكەري قىزمەتشىنىڭ قازا تاپقانى تۋرالى اقپارات تاراعان.
ىشكى ىستەر مينيسترلىگى، ۇلتتىق ۇلان، شەكارا قىزمەتى جانە قورعانىس مينيسترلىگى ۇسىنعان مالىمەتتەرگە سايكەس، اسكەري قىزمەتشىنىڭ قازا بولعانى تۋرالى اقپارات راستالمادى.
- دەزينفورماتسياعا قارسى كۇرەس ورتالىعى الەۋمەتتىك جەلى قولدانۋشىلارىن رەسمي دەرەككوزگە سىلتەمەسى جوق اقپاراتقا سەنبەۋگە شاقىرادى. جالعان اقپارات تاراتۋ قازاقستان رەسپۋبليكاسىنىڭ زاڭناماسىنا سايكەس قۇقىقتىق جاۋاپكەرشىلىككە اكەپ سوعۋى مۇمكىن، - دەلىنگەن ورتالىق حابارلاماسىندا.
ەسكە سالايىق، 24-قىركۇيەكتە وقۋ-جاۋىنگەرلىك تاپسىرمانى ورىنداۋ كەزىندە كاسپي تەڭىزىندە قايعىلى جاعداي بولدى. اۋا رايىنىڭ كۇرت ناشارلاپ، جەلدىڭ كۇشەيۋى سالدارىنان اسكەري قىزمەتشىلەردى تەڭىز اعىسى الىپ كەتكەن.
بۇعان دەيىن مەملەكەت باسشىسى قورعانىس مينيسترلىگىندەگى ءىستىڭ جاي-كۇيىن كەشەندى تەكسەرۋ جونىندەگى كوميسسيا قۇرۋدى تاپسىرعان بولاتىن. كوميسسياعا اتقارىلعان جۇمىستىڭ العاشقى ناتيجەلەرى تۋرالى پرەزيدەنتكە جەتى كۇن ىشىندە بايانداۋ مىندەتى جۇكتەلدى.
سونداي-اق پرەزيدەنت داۋرەن قوسانوۆتى قورعانىس ءمينيسترى قىزمەتىنەن بوساتىپ، بۇل لاۋازىمعا ايدوس مىرزاحمەتوۆتى تاعايىندادى.
دەزينفورماتسياعا قارسى كۇرەس ورتالىعى كاسپيدەگى قايعىلى وقيعاعا قاتىستى بىرنەشە جالعان اقپاراتتىڭ تاراعانىن حابارلاعان ەدى. قورعانىس مينيسترلىگى ەكى ماتروسقا قاتىستى تاراعان اقپاراتتى دا جوققا شىعاردى.
بۇعان دەيىن، قۇرىلتاي دەپۋتاتى نيكيتا شاتالوۆ كاسپيدەگى قايعىلى وقيعاعا جاۋاپ قىزمەتتەن بوساتۋمەن جانە قاماۋعا الۋمەن شەكتەلمەۋى كەرەك ەكەنىن ايتتى.