جالپى العاندا، الەۋمەتتىك جەلى قولدانۋشىلارى جاۋاپكەرشىلىك تانىتىپ، قازا تاپقانداردىڭ وتباسىلارىنا قۇرمەتپەن قارادى. الايدا سونىمەن قاتار قايعىلى وقيعانى قارالىم جيناۋ، اككاۋنتتاردى ىلگەرىلەتۋ جانە تەكسەرىلمەگەن اقپاراتتى تاراتۋ ماقساتىندا پايدالانۋعا تىرىسقان جاعدايلار دا بايقالدى. سونداي-اق ۇيلەستىرۋ بەلگىلەرى بار حابارلامالار، ونىڭ ىشىندە انونيمدى اككاۋنتتاردان جانە قازاقستاننان تىس جەردە جۇرگەن ادامداردىڭ اككاۋنتتارىنان جاريالانعان جازبالار انىقتالدى.
مۇراعاتتاعى ۆيدەو قازا تاپقان اسكەري قىزمەتشىنىڭ «سوڭعى قوڭىراۋى» رەتىندە تاراتىلدى
ەڭ ايقىن مىسالداردىڭ ءبىرى - اكەسىنىڭ ۇلىمەن سويلەسكەن ۆيدەوسى. اتالعان ۆيدەو اسكەري قىزمەتشىنىڭ وقۋ-جاتتىعۋ كەزىندە قازا تاباردان از ۋاقىت بۇرىن بولعان سوڭعى قوڭىراۋى رەتىندە تاراتىلعان.
اقپاراتتىڭ جالعان ەكەنى انىقتالدى. ۆيدەوداعى جاس جىگىت امان-ەسەن، ول جوعارى اسكەري وقۋ ورنىنىڭ كۋرسانتى بولىپ شىقتى. جازبا بۇعان دەيىن تۇسىرىلگەن جانە ماڭعىستاۋداعى قايعىلى وقيعاعا ەش قاتىسى جوق.
سوعان قاراماستان، جالعان اقپارات الەۋمەتتىك جەلىلەردە كەڭىنەن تاراپ ۇلگەردى. ونى پابليكتەر تاراتسا، جەكەلەگەن ب ا ق اقپاراتتى ءتيىستى دەڭگەيدە تەكسەرمەي قايتا جاريالاعان.
مۇراعاتتاعى كادرلار ماڭعىستاۋدا بولعان وقيعالار رەتىندە كورسەتىلدى
الەۋمەتتىك جەلىلەردە قاڭتار وقيعاسى كەزىندە تۇسىرىلگەن ۆيدەولار دا تارالىپ، ولار ماڭعىستاۋدا قايعىلى وقيعادان كەيىن ميتينگىلەر ءوتىپ جاتىر دەگەن مالىمدەمەلەرمەن سۇيەمەلدەندى.
شىنايى ۆيدەونى جالعان ۋاقىت، ورىن نەمەسە ءمان-جايلارمەن بايلانىستىرىپ كورسەتۋ - شىن مانىندە بولماعان وقيعانىڭ بولعانى تۋرالى جالعان تۇسىنىك قالىپتاستىرۋدىڭ كەڭ تارالعان تاسىلدەرىنىڭ ءبىرى.
قازا تاپقانداردىڭ فوتوسۋرەتتەرى نەگىزىندە ج ي كومەگىمەن جاسالعان بەينەروليكتەر
قازا تاپقان اسكەري قىزمەتشىلەردىڭ فوتوسۋرەتتەرى نەگىزىندە ج ي كومەگىمەن ازىرلەنگەن بەينەروليكتەردىڭ جاپپاي تارالۋى دا ەرەكشە نازار اۋدارتادى.
اۆتورلاردى ادامداردىڭ جاقىندا عانا قازا تاپقانى دا توقتاتپاعان. ولاردىڭ فوتوسۋرەتتەرى «جانداندىرىلىپ»، قازا تاپقاندارعا ويدان شىعارىلعان سوزدەر ايتقىزىلعان، جاساندى كورىنىستەر جاسالىپ، وقيعانىڭ بولجامدى جەلىسى بويىنشا ءتۇرلى رەكونسترۋكتسيالار ازىرلەنگەن.
مۇنداي كونتەنت قازاقستاندىق كرەاتيۆتى يندۋستريا وكىلدەرىنىڭ دە نارازىلىعىن تۋعىزدى. كونتەنت اۆتورلارى ادام تراگەدياسىن قارالىم جيناۋ، ءوزىن-ءوزى جارنامالاۋ جانە اۋديتوريا تارتۋ ماقساتىندا پايدالانۋعا جول بەرىلمەيتىنىن جاريا تۇردە اتاپ ءوتتى. مۇنداي ماتەريالداردى قازا تاپقانداردىڭ اتا-انالارى مەن جاقىندارىنىڭ كورۋى مۇمكىن ەكەنى ماسەلەنىڭ وزەكتىلىگىن ارتتىرا تۇسەدى.
جالعان اقپارات تاراتۋشىلاردىڭ ەرەكشە نازارىندا جەرلەۋ جانە اس بەرۋ راسىمدەرى، تەرگەۋ مەن ۇكىمەتتىك كوميسسيانىڭ ارالىق حابارلامالارى، لاۋازىمدى تۇلعالارعا قاتىستى قابىلداناتىن شەشىمدەر، مەرزىمدى اسكەري قىزمەت جانە اسكەرگە شاقىرۋ ماسەلەلەرىن تالقىلاۋ، سونداي-اق اقپاراتتى «جاسىرۋعا» قاتىستى حابارلامالار بولۋى ىقتيمال.
وسى كەزەڭدە قايعىلى وقيعانىڭ ناقتى دەرەكتەرىنە نەگىزدەلگەن، الايدا شىندىققا سايكەس كەلمەيتىن، جاساندى ينتەللەكت كومەگىمەن جاسالعان نانىمدى رەكونسترۋكتسيالار تارالۋى مۇمكىن.
- قاراجات جيناۋ - تاعى ءبىر تاۋەكەل ايماعى. قازا تاپقانداردىڭ وتباسىلارىنا كومەك كورسەتۋ جونىندەگى باستاماعا قوعام تاراپىنان كەڭ قولداۋ كورسەتىلدى. ماڭعىستاۋدا كورسەتىلەتىن كومەكتى جۇيەلەۋ ماقساتىندا ءبىرىڭعاي وپەراتور بەلگىلەنىپ، قاجەتتى قاراجات جينالدى جانە ودان ءارى قاراجات جيناۋ توقتاتىلدى. قازىرگى تاڭدا باستى مىندەت - بولعان قايعىلى وقيعانىڭ جاساندى اقپاراتتىق كۇن ءتارتىبىن قالىپتاستىرۋ قۇرالىنا اينالۋىنا جول بەرمەۋ.
قوعامنىڭ قايعىرۋى - تابيعي جاعداي. وقيعانىڭ سەبەپتەرى تۋرالى سۇراقتاردىڭ تۋىنداۋى دا زاڭدى. وبەكتيۆتى تەرگەۋ جۇرگىزۋدى تالاپ ەتۋ - قالىپتى جاعداي. الايدا تەرگەۋ جالعاسىپ جاتقان كەزەڭدە قايعىلى وقيعانىڭ سەبەپتەرى، ناقتى لاۋازىمدى تۇلعالاردىڭ ءىس-ارەكەتتەرى نەمەسە جاسىرىپ قالىندى دەلىنگەن ءمان-جايلار تۋرالى كەز كەلگەن مالىمدەمە قۇزىرەتتى ورگانداردىڭ راستاۋىنسىز نەگىزدى نۇسقا رەتىندە قاراستىرىلا المايدى، دەپ حابارلايدى جالعان اقپاراتقا قارسى ءىس-قيمىل ورتالىعى.