اۋعانستاندا 22 ميلليون ايەل مەن قىز مەديتسينالىق كومەكسىز قالۋى مۇمكىن

استانا. KAZINFORM - اۋعانستاندا 22 ميلليون ايەل مەن قىز تالىپتەر ەنگىزگەن شەكتەۋلەر مەن گۋمانيتارلىق كومەكتىڭ قىسقارۋىنا بايلانىستى كوپ ۋاقىت مەديتسينالىق كومەكسىز قالۋى مۇمكىن. بۇل تۋرالى بۇۇ مالىمدەدى.

فوتو: kazinform/ج ي

ۇيىم وكىلدەرىنىڭ حابارلاۋىنشا، اۋعانستاندا ايەلدەر مەن قىزداردىڭ قۇقىعى شەكتەلىپ، حالىقارالىق كومەك كولەمى ازايعاندىقتان، جاعدايى كۇن سايىن قيىنداپ بارادى.

2021 -جىلى تالىپتەر بيلىككە كەلگەننەن بەرى ايەلدەردىڭ ۇيدەن شىعۋىنا، ءبىلىم الۋىنا جانە جۇمىس ىستەۋىنە شەكتەۋ قوياتىن 100 دەن استام جارلىق شىعارعان.
«ب ۇ ۇ-ايەلدەر» ۇيىمىنىڭ دەرەگىنشە، حالىقتىڭ گۋمانيتارلىق كومەككە سۇرانىسى ارتىپ وتىرعانىمەن، ونى قارجىلاندىرۋ كولەمى قىسقارعان. بۇل جاعداي ونسىز دا كۇردەلى احۋالدى ودان ءارى ۋشىقتىرا تۇسكەن.
ۇيىمنىڭ گۋمانيتارلىق ماسەلەلەر جونىندەگى ءبولىمىنىڭ باسشىسى سوفيا كالتورپ 22 ميلليون ايەل مەن قىز كوپ ۋاقىت مەديتسينالىق كومەكسىز قالۋى مۇمكىن ەكەنىن ەسكەرتتى.

ب ۇ ۇ مەن گۋمانيتارلىق ۇيىمداردىڭ مالىمەتىنشە، قارجىلاندىرۋدىڭ قىسقارۋى ەلدەگى ميلليونداعان ايەلدىڭ ومىرىنە اسەر ەتكەن.

اتاپ ايتقاندا، 300 گە جۋىق گۋمانيتارلىق مەديتسينالىق ورتالىق جابىلىپ، جۇمىسىن توقتاتقان. سونىڭ كەسىرىنەن ميلليوننان استام ايەل مەن قىز جاپا شەككەن.
بۇعان قوسا گەندەرلىك زورلىق-زومبىلىقتان زارداپ شەككەندەرگە كومەك كورسەتەتىن 193 تەن استام ورتالىقتىڭ جابىلۋى ميلليوننان استام ايەل مەن قىزعا كەرى اسەر ەتكەن.
سونداي-اق 3,4 ميلليونعا جۋىق مۇقتاج ايەل مەن قىز تازا سۋعا، سانيتارلىق جاعداي مەن گيگيەنا قىزمەتتەرىنە قول جەتكىزە الماي قالۋى مۇمكىن.

اۋعانستانعا ساپارىنان ورالعان سوفيا كالتورپ جەرگىلىكتى ايەلدەردىڭ اۋىر جاعدايىنا توقتالدى. ماسەلەن، كۋنار پروۆينتسياسىنداعى ءبىر ايەل مەديتسينالىق كومەك الا الماي، بىرنەشە رەت تۇسىك تاستاعانىن ايتقان.

ب ۇ ۇ وكىلىنىڭ مالىمەتىنشە، كوپتەگەن ايەل بىلتىرعى جەر سىلكىنىسىنەن كەيىن ءالى دە ۇيىنە ورالا الماي ءجۇر. ال پاكىستانمەن اراداعى قاقتىعىستار مەن سۋ تاسقىنى كەيبىر تۇرعىنداردى باسپاناسىن قايتا تاستاپ كەتۋگە ءماجبۇر ەتكەن.

«ب ۇ ۇ- ايەلدەر» ۇيىمى مۇقتاج ايەلدەرگە شۇعىل قارجىلاي جانە پسيحولوگيالىق قولداۋ كورسەتىپ، شاعىن كاسىپ اشۋعا كومەكتەسەدى. دەگەنمەن سوفيا كالتورپ مۇنداي كومەكتىڭ تالىپتەر ەنگىزگەن شەكتەۋلەردىڭ زاردابىن جويۋعا قاۋقارسىز ەكەنىن ايتتى.
بۇعان قوسا قىزداردىڭ ءبىلىم الۋىنا قاتىستى جاعداي الاڭداتادى. قازىر اۋعانستاندا 2,6 ميلليونعا جۋىق قىز ورتا ءبىلىم الا الماي وتىر.
«ب ۇ ۇ-ايەلدەر» ۇيىمىنىڭ بولجامىنشا، مۇنىڭ سوڭى ەرتە نەكەلەردىڭ كوبەيۋىنە جانە انا ءولىمىنىڭ جيىلەۋىنە اكەلۋى مۇمكىن.
ۇيىمنىڭ اۋعانستانداعى ارنايى وكىلى سيۋزان فەرگيۋسون ايەلدەر قۇقىعىنىڭ تاپتالۋىنا بايلانىستى قالىپتاسقان احۋالدى الەمدەگى ەڭ اۋىر داعدارىس دەپ باعالادى.
ونىڭ ايتۋىنشا، قارجى تاپشىلىعىنا بايلانىستى گۋمانيتارلىق ۇيىمدار كومەككە مۇقتاج جانداردىڭ بارىنە بىردەي قولداۋ كورسەتە الماي وتىر.
وسىعان بايلانىستى فەرگيۋسون ۇكىمەتتەر مەن حالىقارالىق دونورلاردى اۋعانستانداعى ايەلدەر مەن قىزدارعا بولىنەتىن كومەكتى قىسقارتپاي، كەرىسىنشە، كوبەيتۋگە ۇندەدى.
بۇعان دەيىن اۋعانستاندا 52 ايەل مەن ءبىر قىز كيىم تالاپتارىن بۇزدى دەگەن كۇدىكپەن ۇستالعانى حابارلانعان بولاتىن.