مۇنى بىلەتىن كوپشىلىك سويلەيتىن جاسقا كەلسە دە ءتىلى شىقپاي جۇرگەن بالانى ناعاشىلارى ارنايى مال سويىپ، ونىڭ ىشەگىمەن موينىنان تارتىپ، ىرىمداۋ ەكەنىن ءتۇسىندىرىپ جاتسا، ەندى ءبىرى بۇل كونە ىرىمنان بەيحابار ەكەنىن جازىپ، ول تۋرالى سۇراستىرىپ جاتادى. Turkystan.kz ءتىلشىسى ەتنوگراف بۇلبۇل كاپ قىزىنان اتالعان ىرىمنىڭ ءمانى مەن شىعۋ توركىنى تۋرالى سۇراپ كوردى.
«ءبىز - ىرىمعا سەنگەن حالىقپىز. نانىم-سەنىمگە كوپ جۇگىنەمىز. كۇندەلىكتى تۇرمىستا جاسالاتىن ارەكەتتەردىڭ استارىندا وسىنداي سەنىمدەر جاتىر. ولاردىڭ بارلىعى مىندەتتى تۇردە عىلىمي تۇرعىدان تۇسىندىرىلگەن نارسە ەمەس، كوبىنە ۇرپاقتان-ۇرپاققا اۋىزشا جەتكەن. سوندىقتان وسىلاي جاساسا، بالانىڭ ءتىلى شىعادى دەگەن ىرىم بار جانە سوعان سەنگەن. ونىڭ تۇپكى ءمانى ادامنىڭ بالاعا دەگەن تىلەگىنەن، ونىڭ اماندىعىن، ءوسىپ-جەتىلۋىن قالاعان نيەتىنەن شىققان»، - دەدى ەتنوگراف.
بۇلبۇل كاپ قىزىنىڭ سوزىنشە، بۇل ىرىمدى قازىرگى تۇسىنىكتەگىدەي «قىلقىندىرۋ» سوزىمەن قابىلداۋعا بولمايدى.
«بالا كەزىمنەن بۇل ىرىمدى ءوزىم دە كورىپ ءوستىم. ءبىراق ءدال نەلىكتەن قويدىڭ ىشەگىن پايدالاناتىنىن بىلە قويمايمىن. مال ىشەگىنىڭ ەمدىك قاسيەتى بار دەگەن تۇسىنىك بار. قازاق حالقى مالدىڭ دۇنيەسىن بەرەكە-بىرلىككە قاتىستى ىرىمداردا وسىلاي پايدالانعان عوي.
3-4 جاسقا كەلىپ، ءتىلى شىقپاعان بالانىڭ ناعاشىلارى قوي سويىپ، اشى شەگىمەن بالانىڭ موينىنىڭ استىنا سالىپ، ىرىمىن عانا جاساعان. ول جەردە بۋىندىرمايدى نەمەسە قاتتى قىلقىندىرمايدى. بالا بىلمەۋگە ءتيىس. سول كەزدە دەنەسى تىتىركەنىپ، شوشىعاندا ءتىلى شىعادى»،-دەدى ب. كاپ قىزى
ەتنوگراف داستۇرىمىزدەگى كوپ ىرىمنىڭ شىعۋ سەبەبىن ناقتى ءتۇسىندىرۋ قيىن بولعانىمەن، حالىق جادىندا ساقتالىپ قالعانىنىن ايتتى. سوندىقتان مۇنداي دۇنيەلەردى تەك ىرىم رەتىندە عانا ەمەس، حالقىمىزدىڭ دۇنيەتانىمىنىڭ ءبىر بولىگى رەتىندە قاراۋ كەرەك.
ءىنجۋ ءاليحان