پوليتسيا قىزمەتكەرلەرى الەۋمەتتىك جەلىدە تاراعان ۆيدەونىڭ اۆتورىن انىقتاعان. بەينەجازبادا ايەلدىڭ قاۋىپسىزدىك بەلدىگىن تاقپاي كولىك باسقارعانى جانە بۇل تالاپتى ورىنداۋدان اشىق باس تارتقانى بايقالادى.
تەكسەرۋ بارىسىندا جۇرگىزۋشىنىڭ بۇعان دەيىن سوت شەشىمىمەن كولىك باسقارۋ قۇقىعىنان ايىرىلعانى بەلگىلى بولدى. سوعان قاراماستان، ول قايتادان رولگە وتىرعان.
- پوليتسيانىڭ ۇستانىمى ايقىن: زاڭ الدىندا ءبارى تەڭ. ەشقانداي تانىستىق تا، بايلانىس تا، ورىنسىز مالىمدەمە دە زاڭ تالاپتارىن بۇزۋعا نەگىز بولا المايدى. ءوزىن زاڭنان جوعارى ساناپ، بەلگىلەنگەن تالاپتاردى ەلەمەۋگە ەشكىمنىڭ قۇقىعى جوق. زاڭ بارىنە ورتاق، ال ونى بۇزعان ادام جاۋاپكەرشىلىكتەن جالتارا المايدى، - دەلىنگەن پوليتسيا اقپاراتىندا.
ايەلگە قاتىستى بىرنەشە اكىمشىلىك قۇقىق بۇزۋشىلىق بويىنشا ماتەريالدار راسىمدەلدى. اتاپ ايتقاندا، كولىك باسقارۋ قۇقىعىنان ايىرىلعاننان كەيىن رولگە وتىرۋ، قاۋىپسىزدىك بەلدىگىن تاقپاۋ، سوت شەشىمىن ورىنداماۋ جانە جالعان اقپارات تاراتۋ دەرەكتەرى تىركەلگەن.
جيناقتالعان ماتەريالدار سوتقا جولدانىپ، اۆتوكولىك ارنايى ايىپپۇل تۇراعىنا قويىلدى.
سونىمەن قاتار كولىك جۇرگىزۋ قۇقىعىنان ايىرىلعان ادامعا اۆتوكولىگىن بەرگەن كولىك يەسى دە جاۋاپكەرشىلىككە تارتىلدى.
ايتا كەتەيىك، بۇعان دەيىن الماتىدا جول ەرەجەلەرىن ورەسكەل بۇزعان جۇرگىزۋشى 30 تاۋلىككە قامالىپ، 100 ا ە ك كولەمىندە ايىپپۇل ارقالاعان بولاتىن.