ابحازيا پارلامەنتى اسلان بجانيانىڭ وتستاۆكاسىن قابىلدادى

استانا. KAZINFORM - ابحازيا پارلامەنتىنىڭ دەپۋتاتتارى بۇعان دەيىن رەسپۋبليكانى باسقارعان اسلان بجانيانى وتستاۆكاعا جىبەرۋ تۋرالى شەشىم قابىلدادى، دەپ جازادى تاسس.

19-قاراشاعا قاراعان ءتۇنى بيلىك پەن وپپوزيتسيا اراسىنداعى كەلىسسوزدەردەن كەيىن بجانيا «ەلدەگى تۇراقتىلىق پەن كونستيتۋتسيالىق ءتارتىپتى ساقتاۋ ءۇشىن» وتستاۆكاعا كەتۋ تۋرالى ءوتىنىش بەردى.

ابحازيا كونستيتۋتسياسىنا سايكەس، رەسپۋبليكا پارلامەنتى وتستاۆكاعا كەتۋ تۋرالى ءوتىنىشتى قابىلدايدى. داۋىس بەرۋگە 31 دەپۋتات قاتىسىپ، وتستاۆكاعا كەتۋ تۋرالى شەشىمگە 28 دەپۋتات پىكىر ءبىلدىرىپ، 1 دەپۋتات قارسىلىق ءبىلدىردى، تاعى 2 بيۋللەتەن بۇلىنگەن.

قازىرگى ۆيتسە- پرەزيدەنت بادرا گۋنبا ابحازيا پرەزيدەنتىنىڭ مىندەتىن اتقارۋشى بولىپ تاعايىندالدى، دەپ حابارلادى پارلامەنت سپيكەرى لاشا اشۋبا.

ابحازيا كونستيتۋتسياسىنا سايكەس، پرەزيدەنتتىڭ وتستاۆكاعا كەتۋ ماسەلەسىن رەسپۋبليكا پارلامەنتى شەشەدى. شەشىم كوپشىلىك داۋىسىمەن قابىلدانادى. پرەزيدەنت قىزمەتىنەن شەتتەتىلگەن نەمەسە ول قايتىس بولعان، وتستاۆكاعا كەتكەن نەمەسە ءوز وكىلەتتىگىن جۇزەگە اسىرۋ مۇمكىندىگى بولماعان جاعدايدا ونى مىندەتىن ۆيتسە- پرەزيدەنت اتقارادى.

سونىمەن قاتار، ۆيتسە-پرەزيدەنت پرەزيدەنت مىندەتىن اتقارا المايتىن تۇستارى بار: بۇل جاعدايدا وكىلەتتىكتەر پرەمەر- مينيسترگە بەرىلەدى. ولاردىڭ ەشقايسىسى پرەزيدەنتتىڭ مىندەتىن اتقارا الماسا، پارلامەنت سپيكەرىنە وتەدى. پرەزيدەنتتىڭ مىندەتىن اتقارۋشىنىڭ وكىلەتتىگى پرەزيدەنتتىڭ ءوز مىندەتتەرىن اتقارا الماۋ سەبەپتەرى جويىلعانعا دەيىن نەمەسە جاڭا پرەزيدەنت سايلانعانعا دەيىن ساقتالادى.

ەسكە سالساق، بۇعان دەيىن ابحازيا پرەزيدەنتى اسلان بجانيا 15-قاراشادا بولعان سۋحۋمداعى وقيعانى مەملەكەتتىك توڭكەرىس ارەكەتى دەپ اتادى جانە ول ەلدىڭ پرەزيدەنتى بولىپ قالا بەرەتىنىن باسا ايتقان ەدى. 15 -قاراشا كۇنى سۋحۋمدا بولعان شەرۋشىلەر قورشاۋلاردى بۇزىپ ءوتىپ، اۋماققا، ودان كەيىن پارلامەنت، پرەزيدەنت اكىمشىلىگى مەن ۇكىمەت عيماراتتارىنا كىرىپ كەتكەن.

وپپوزيتسيا تالاپتارى

ابحازياداعى وپپوزيتسيا پارلامەنتتى جالعىز زاڭدى مەملەكەتتىك ورگان دەپ سانايتىنىن مالىمدەدى. بۇل تۋرالى وپپوزيتسيالىق ۇيىمداردىڭ وكىلى سانالاتىن ساياسي داعدارىستى ەڭسەرۋ جونىندەگى ۇيلەستىرۋ كەڭەسى مالىمدەدى.

وپپوزيتسيانىڭ پىكىرىنشە، ابحازيا رەسپۋبليكاسىنىڭ پارلامەنتى جالعىز زاڭدى مەملەكەتتىك ورگان رەتىندە رەسپۋبليكانىڭ بۇگىنى مەن بولاشاعى ءۇشىن تولىق جاۋاپكەرشىلىكتى ءوز موينىنا الۋى كەرەك.

ينۆەستيتسيالىق كەلىسىم تۋرالى

30 -قازاندا ماسكەۋدە رەسەيدىڭ ەكونوميكالىق دامۋ ءمينيسترى ماكسيم رەشەتنيكوۆ پەن ابحازيا پرەمەر- ءمينيسترىنىڭ ورىنباسارى ءارى ەكونوميكا ءمينيسترى كريستينا وزگان رەسەيلىك كومپانيالارعا ابحازيادا ينۆەستيتسيالىق جوبالاردى جۇزەگە اسىرۋعا مۇمكىندىك بەرەتىن كەلىسىمگە قول قويدى. قۇجات تاراپتاردىڭ قۇقىقتارى مەن مىندەتتەرىن ايقىنداپ، زاڭدى تۇلعالاردى قولداۋ شارالارىن بەلگىلەيدى.

وپپوزيتسيا جەتەكشىلەرىنىڭ ءبىرى، «ابحاز حالىقتىق قوزعالىسى» قوعامدىق ۇيىمىنىڭ ءتوراعاسى ادگۋر اردزينبا رەسپۋبليكادا 2014 -جىلى قابىلدانعان ينۆەستيتسيالىق قىزمەت تۋرالى زاڭ بار جانە وندا ينۆەستورلارعا كەپىلدىكتەر، ارنايى شارتتار مەن جەڭىلدىكتەر قاراستىرىلعانىن ايتتى.

ونىڭ سوزىنشە، جاڭا كەلىسىمدە پاتەرلەردى ساتۋدى زاڭداستىرۋدىڭ جاسىرىن ءتۇرى قاراستىرىلعان. 5 -قاراشادا سۋحۋمدا رەسپۋبليكانىڭ قازىرگى بيلىگىنە قارسى قوعامدىق ۇيىمدار كەلىسىمدى ابحازيانىڭ ەكونوميكالىق ەگەمەندىگىنە دەسترۋكتيۆتى دەپ ەسەپتەپ، ونى راتيفيكاتسيالاۋعا قارسى شتاب قۇردى.

اۆتور

ەركەجان سماعۇلوۆا