ابايدىڭ 180 جىلدىعىنا وراي ماڭعىستاۋ وبلىسى سەمەيگە دوستىق ءۇيىن سالىپ بەرمەك
سەمەي. KAZINFORM - ماڭعىستاۋ وبلىسى سەمەي قالاسىنا دوستىق ءۇيىن سالىپ بەرۋ ءۇشىن ارنايى دەلەگاتسيا جىبەردى.
ابايدىڭ 180-جىلدىعىنا وراي مەملەكەت باسشىسى قاسىم-جومارت توقايەۆتىڭ قولداۋىمەن «ابايعا قۇرمەت» اكسياسى باستالعان بولاتىن. اكسيا اياسىندا ەلدىڭ ءار ءوڭىرى اباي وبلىسىنا ءبىر نىساننان تارتۋ ەتەدى.
- بۇگىن وبلىس اكىمى بەرىك ءۋالي وڭىرگە ماڭعىستاۋ وبلىسىنان ارنايى كەلگەن دەلەگاتسيا مۇشەلەرىمەن كەزدەستى. ماڭعىستاۋ وبلىسى اكىمدىگى اكسياعا قولداۋ ءبىلدىرىپ، سەمەي قالاسىنا دوستىق ءۇيىن سالىپ بەرمەك، - دەپ حابارلادى اباي وبلىسى اكىمىنىڭ باسپا ءسوز قىزمەتىنەن.
بەرىك ءۋالي «ابايعا قۇرمەت» اكسياسىن ەلدىڭ بارلىق ءوڭىرى قىزۋ قولداپ جاتقانىن، تۇركىستان، اقتوبە، قىزىلوردا، پاۆلودار، جەتىسۋ، الماتى، سولتۇستىك قازاقستان، شىعىس قازاقستان، باتىس قازاقستان، اتىراۋ، جامبىل، اقمولا وبلىستارى مەن شىمكەنت، الماتى، استانا قالالارى ءتيىستى جۇمىستاردى باستاپ كەتكەنىن ايتتى.
ماڭعىستاۋ وبلىسى اكىمىنىڭ ءبىرىنشى ورىنباسارى ەربول ىزبەرگەنوۆ مۇنايلى ولكە جۇرتىنىڭ سالەمىن جەتكىزدى.
- كورشىسى شارۋا باستاپ جاتسا، قاسىنان قۇر ءوتىپ كەتپەيتىن قازاقپىز عوي. ءار وبلىستىڭ تارتۋ جاساۋى وتە دۇرىس قابىلدانعان شەشىم دەپ ەسەپتەيمىز. ويتكەنى بۇل نىساندار حالىقتىڭ يگىلىگىنە جۇمىس ىستەيتىن بولادى. يگى باستامالارىڭىزعا ساتتىلىك تىلەيمىز، - دەدى ول.
ەسكە سالساق، وسىعان دەيىن اباي وبلىسى اكىمدىگىندە جيھاز ساتىپ الۋ كونكۋرسى توقتاتىلعانى حابارلانعان.