ابايعا 180 جىل: مەرەيتوي اياسىندا 100 دەن استام اۋقىمدى ءىس-شارا وتەدى
سەمەي. KAZINFORM - اباي قۇنانباي ۇلىنىڭ 180 جىلدىق مەرەيتويىنا ارنالعان حالىقارالىق، رەسپۋبليكالىق جانە وڭىرلىك دەڭگەيدەگى 100 دەن استام اۋقىمدى ءىس-شارانى قامتيتىن كەشەندى جوسپار بەكىتىلدى. بۇل تۋرالى اباي وبلىسىنىڭ وكق الاڭىندا وتكەن بريفينگتە وبلىستىق مادەنيەت، تىلدەردى دامىتۋ جانە ارحيۆ ءىسى باسقارماسىنىڭ باسشىسى جانجىگىت ومارحان مالىمدەدى.
باسقارما باسشىسىنىڭ ايتۋىنشا، اۋقىمدى باعدارلاما 1-تامىز كۇنى «ABAY ACADEMIYASY» ەنتسيكلوپەديالىق پورتالىنىڭ تانىستىرىلىمىمەن باستالادى. بۇل سيفرلىق پلاتفورما اقىن مۇراسىن جۇيەلەۋ جانە عىلىمي ورتاعا قولجەتىمدى ەتۋگە باعىتتالعان. سول كۇنى ماقانشى اۋىلىنداعى الاكول جاعاسىندا قازاقستاننىڭ حالىق ءارتىسى سەكەن تۇرىسبەكوۆ پەن «اق جاۋىن» وركەسترىنىڭ كونسەرتى وتسە، سەمەي قالاسىنداعى اربات الاڭىندا يلليۋستراتور اڭساعان مۇستافانىڭ كورمەسى اشىلىپ، «اسىل مۇرا» وبلىستىق قولونەر فەستيۆالى ۇيىمداستىرىلادى.
1-6-تامىز ارالىعىندا اباي شىعارماشىلىعىنا ارنالعان كونسەرتتەر، كورمەلەر مەن تەاترلاندىرىلعان قويىلىمدار وتكىزىلەدى. قازاقستاننىڭ حالىق ءارتىسى مايرا يلياسوۆانىڭ گاسترولدىك كونسەرتى سەمەيدەن باستالىپ، ءۇرجار، اياگوز، جارما جانە جاڭاسەمەي اۋداندارىندا جالعاسادى.
3-تامىزدا اباي تەاترىندا «اباي الەمى» رۋحاني كەشى، 4-تامىزدا سەكەن تۇرىسبەكوۆ پەن «اق جاۋىن» وركەسترىنىڭ قورىتىندى كونسەرتى وتەدى. 5-تامىزدا «وي تولعاۋ - حاكىم اباي» مونووپەراسى ساحنالانسا، 6-تامىزدا اباي الاڭىندا «اباي ەلى - ونەر كەنىشى» اتتى كونسەرت جانە ءاليحان بوكەيحان اتىنداعى ۋنيۆەرسيتەتتە «ولەڭ ءسوزدىڭ پاتشاسى» جاس اقىندار ءمۇشايراسى وتپەك.
7-9-تامىز ارالىعىندا عىلىمي-تانىمدىق جانە ادەبي-مادەني باعىتتاعى ءىس-شارالار ۇيىمداستىرىلادى. اتاپ ايتقاندا، 7-تامىزدا جازۋشى اسقار التايدىڭ شىعارماشىلىق كەشى وتەدى، وندا «اباي جولى» ەنتسيكلوپەدياسى مەن باعاشار تۇرسىنبايدىڭ «اباي قۇنانباي ۇلى كىم؟» كىتابىنىڭ تۇساۋكەسەرى جوسپارلانعان. 8-تامىزدا سەمەيدە «ادامزاتتىڭ ابايى» رەسپۋبليكالىق اقىندار ايتىسى مەن اباي اۋدانىندا «جەتى قازىنا» ۇلتتىق بايقاۋىنىڭ اشىلۋى وتەدى. 9-تامىزدا شاكارىم ۋنيۆەرسيتەتىندە حالىقارالىق عىلىمي كونفەرەنتسيا، «جيدەباي-ءبورىلى» مۋزەيىندە كورمە، اباي كىتاپحاناسىندا كىتاپتار توپتاماسىنىڭ تۇساۋكەسەرى جانە 15 ەلدىڭ قاتىسۋىمەن حالىقارالىق اقىندار فەستيۆالى ۇيىمداستىرىلادى. سول كۇنى كەشكىسىن ورتالىق الاڭدا «ابايعا تارتۋ» اتتى كونسەرت وتەدى.
10-تامىز - اباي كۇنى. بۇل كۇنى جيدەبايدا قۇران باعىشتالىپ، قۇرباندىق شالۋ ءراسىمى وتەدى.
سونداي-اق ەلىمىزدىڭ بارلىق وڭىرىندە اباي ەسكەرتكىشىنە گۇل قويۋ راسىمدەرى ۇيىمداستىرىلادى.
ايتا كەتەيىك، مەرەيتويعا وراي ماڭعىستاۋ وبلىسى سەمەيگە دوستىق ءۇيىن سالىپ بەرمەك.