اباي ولەڭدەرى تۇڭعىش باسىلعان كىتاپتىڭ ءتۇپنۇسقا بەتتەرى تابىلدى
پاۆلودار. KAZINFORM - بۇقار جىراۋ مۋزەيىنىڭ قىزمەتكەرلەرى زەينەلعابيدەن ءال-جاۋھاريدىڭ 1909 -جىلى ۋفادان باسىلىپ شىققان «ناسيحات قازاقيا» كىتابىنىڭ ءتۇپنۇسقا بولىكتەرىن تاپتى. بۇل كىتاپتىڭ ساناۋلى عانا ءتۇپنۇسقاسى ساقتالعان.
اباي تانۋ عىلىمىندا زەينەلعابيدەن امىرە ۇلىنىڭ ەسىمىن ايرىقشالاپ ايتۋعا ابدەن بولادى. فيلولوگيا عىلىمىنىڭ دوكتورى، پروفەسسور مەكەمتاس مىرزاحمەت ۇلى وعان «ۇلتتىق وي-ساناسى ەرتە ويانعان، سول جولدا قولىنان كەلەر ارەكەتتەن ايانباعان، اباي مۇراسىن باسپا سوزدە ناسيحاتتاپ، تاتار حالقىنا تانىتۋعا ارناعان تالپىنۋشىلاردىڭ ءبىرى» دەپ باعا بەرگەن.
ياعني زەينەلعابيدەن امىرە ۇلى - اعارتۋشى، اباي مۇراسىن باسپا بەتىنە العاش جاريالاعان قايراتكەر. «ناسيحات قازاقيادا» قازاق حالقىنىڭ تۇرمىس-تىرشىلىگىنە قاتىستى وزەكتى ماسەلەلەر قاراستىرىلىپ، اقىن اباي قۇنانبايەۆ پەن ءسادۋاقاس شورمانوۆتىڭ ولەڭدەرى العاش جاريالانعان.
1909 -جىلى ۋفا قالاسىندا جارىق كورگەن ەڭبەك ەنتسيكلوپەديالىق سيپاتقا يە، مۇندا سول كەزەڭدەگى قازاق حالقى ءومىرىنىڭ قوعامدىق- ساياسي جانە الەۋمەتتىك قۇرىلىسىنىڭ ماسەلەلەرى ايقىن اشىپ كورسەتىلگەن. سونداي-اق ول اباي شىعارماشىلىعىنىڭ ەرەكشە ماڭىزى بارى تۋرالى العاشقىلاردىڭ ءبىرى بولىپ مالىمدەيدى.
بۇقار جىراۋ اتىنداعى ادەبيەت جانە ونەر مۋزەيىنىڭ قىزمەتكەرى ابزال رىمبەكتىڭ ايتۋىنشا، زەينەلعابيدەن ءال-جاۋھاريدىڭ اتالعان كىتابى اراب قارپىندە، توتە نۇسقادا جازىلعان. تاريحي ەڭبەكتىڭ ءتۇپنۇسقاسى ەلىمىزدە ساناۋلى عانا.
ال پاۆلوداردا تابىلعان كىتاپتىڭ ونشاقتى بەتى عانا ساقتالعان. اراب قاربىندەگى كونە پاراقتار جەرگىلىكتى بيجان مەشىتىندەگى قۇران كىتاپتارى اراسىنان شىققان.
«ناسيحات قازاقيادا» «بالانى 11 جاستان كەيىن عانا ورىس تىلىندە وقىتۋ» كەرەك دەگەن ماسەلە ايتىلادى. قازىرگى ونەرتابىسى مەن عىلىمى دامىعان جاپون حالقى بالالارىنا شەت تىلدەرىن ۇيرەتۋدى تەك 10 جاستان كەيىن عانا قولعا الاتىنى ءمالىم. اعارتۋشى بۇل ماسەلەنى ەرتەرەك ءبىلىپ، قازاق قوعامىنا ءسىڭدىرۋدى ماقسات ەتسە كەرەك.
اتاپ وتەرلىگى، بۇعان دەيىن وتاندىق عالىمدار شىعارمانى كيريلليتساعا ءتۇسىرىپ، كىتاپ ەتىپ باستىرعان.
اۆتور
مۇرات اياعان