اباي وبلىسىنىڭ 22 جاستاعى تۇرعىنى مال دارىگەرلەرىنىڭ جۇمىسىن جەڭىلدەتەتىن قۇرىلعى ويلاپ تاپتى

اباي وبلىسىنداعى ەكپىن اۋىلىندا تەمىردەن، ءتۇيىن تۇيگەن جاس شەبەر تۇرادى. ەڭبەك ادامى ەلگە پايداسىن تيگىزىپ وتىر. مالعا ەكپە سالىپ، قان الاتىن كەزدە قولداناتىن قۇرىلعى ويلاپ تاپقان. ونەرتابىس مال دارىگەرىنىڭ جۇمىسىن جەڭىلدەتتى، دەپ حابارلايدى turkystan.kz 24.kz-كە سىلتەمە جاساپ.

اۋىلداعى اعايىن ءتورت تۇلىگىنە ۋاقىتىلى ەكپە سالدىرىپ، قان تاپسىرىپ، كۇتىمىن جاساماسا، مال باسىن ازايتىپ الۋى ابدەن مۇمكىن. سوندايدا ءىرى قارانىڭ باس ءجىبىن باعانعا بايلاپ، ۇساق مالدى جەرگە جىعىپ، ابىگەرگە ءتۇسىپ جاتادى. ال سايات شايماردانوۆتىڭ ويلاپ تاپقان دۇنيەسى اۋىلداستارىنىڭ اۋىر جۇمىسىن جەڭىلدەتتى.

سايات شايماردانوۆ، اۋىل تۇرعىنى:

- حالىققا كەرەك كەز كەلگەن بۇيىمدار جاسايمىز. مالعا ەم-دوم جاساۋعا فيكساتورلار جاساپ جاتىرمىز قازىر. ودان باسقا دا اۋىل شارۋاشىلىعى تەحنيكالارىن جاسايمىز. اشا كۇرەك، رۋلون تاسيتىن سياقتى بۇيىمدار جاسايمىز. جۇمىس ىستەيمىن دەگەن ادامعا ەكى قولعا ءبىر كۇرەك، ارينە، تابىلادى. ول اۋىل بولسىن، قالا بولسىن.

سايات 22 جاستا. ونىڭ تەمىرگە قىزىعۋشىلىعى بالا كۇنىنەن باستالعان. قولى ەپتى، ىسمەر جىگىت دانەكەرلەۋدى دە، تەمىر وڭدەۋدى دە ءوزى ۇيرەنگەن. الدىمەن ۇيگە قاجەت قۇرال-جابدىقتاردى جاساي باستاعان. كەيىن اۋىلداستارىنا دا كەرەك بۇيىمداردى قۇراستىرىپ بەرەتىن بولدى. ول استىق تاسۋعا ارنالعان تىركەمە، سۋ ساقتايتىن بوشكە سياقتى پايدالى دۇنيەلەردى جاسايدى. قازىر سايات ىزىنەن ەرگەن ىنىلەرىن وسى كاسىپكە باۋلىپ جاتىر.

ازامات مۇراتبەك ۇلى، اۋىل تۇرعىنى:

- مەن قازىر اعامنان ۇيرەنىپ، ءبارىن كورىپ جاتىرمىن. تاجىريبە جيناپ جاتىرمىن. ەندى، بۇيىرسا، مەن دە وسىنداي ىستەردى جاسايمىن دەپ ويلايمىن. جوسپاردا بار. مال سالاسىنا قىزىعامىن. ءبىزدىڭ ءوزىمىزدىڭ قوجالىعىمىز بار. سوندا بارىپ سانايمىز، رەتتەيمىز. اعالارىما كومەكتەسەمىن.

سايات جاڭا يدەيانى عالامتوردان دا الاتىنىن ايتادى. كورگەن- بىلگەنىن كوڭىلىنە توقىپ، قاجەت كەزىندە قولدانۋعا تىرىسادى. ونىڭ جاساعان تور قوراسىن اۋىلداستارى جوعارى باعالاپتى. ءتورت تۇلىكتى ۇستاۋعا ىڭعايلى بۇل قوندىرعى مال دارىگەرلەرىنىڭ دە جۇمىسىن جەڭىلدەتتى.

نۇرلان راحمەتجانوۆ، اۋىل ۆەتەرينارى:

- بۇرىندارى ۋاقىتتاردى ءبىز ءاربىر مالعا جەكە- جەكە ارقان سالىپ، قانشا ۋاقىتتارىن ارنايتىن. ال قازىر جاپپاي ەگىلەتىن، ەمدەلەتىن مالدار راكسول ارقىلى ۆەتەرينارلىق شارالاردان وتكىزىلە بەرەدى. وتە ءتيىمدى دەپ ويلايمىز.

«قولىنان ءىس كەلەتىن ادامعا قاشاندا سۇرانىس بار»، - دەيدى ەڭبەك ادامى. تەمىردەن ءتۇيىن تۇيگەن شەبەردىڭ ەندىگى ارمانى - كاسىبىن كەڭەيتىپ، جاساعان بۇيىمدارىن ساۋداعا شىعارۋ.