اباي وبلىسىنداعى مۇعالىم تانىمال ءانشى نيكي ميناجدىڭ ساۋند- پروديۋسەرى بولدى

سەمەي. KAZINFORM - اباي وبلىسىنداعى اباي اتىنداعى مامانداندىرىلعان مەكتەپ- گيمنازيا- ينتەرناتىندا بيولوگيا ءپانىنىڭ مۇعالىمى بولىپ جۇمىس ىستەيتىن ەرقانات سادۋحانوۆ الەمگە تانىمال ءانشى نيكي ميناج البومىنىڭ ساۋند- پروديۋسەرى بولدى، دەپ حابارلايدى Kazinform اگەنتتىگى.

وبلىستىق ءبىلىم باسقارماسىنىڭ مالىمەتىنە سۇيەنسەك، جاس پەداگوگ ءوزىنىڭ ۇستازدىق قىزمەتىن سۇيىكتى ىسىمەن قاتار الىپ ءجۇرىپ، حالىقارالىق جوبالاردا شىعارماشىلىق قابىلەتىن تانىتۋدا. مۋزىكالىق الەمدە ول @eraholic لاقاپاتىمەن تانىمال.

ەرقانات سادۋحانوۆ ءوز پاراقشاسىندا نيكي ميناجدىڭ «Pink Friday 2» البومىنىڭ دەليۋكس- نۇسقاسىنىڭ ساۋند- پروديۋسەرى بولعانىن رەسمي تۇردە جاريالادى. البومنىڭ تۇساۋكەسەرى 2024 -جىلدىڭ 13-جەلتوقسانىندا جوسپارلانعان.

ايتا كەتەيىك، ەرقانات بۇرىن الەمدىك جۇلدىزدارمەن، اتاپ ايتقاندا Dua Lipa, Rosalia جانە Blackpink توبىنىڭ مۇشەسى Lisa-مەن جۇمىس ىستەگەن.

نيكي ميناج - الەمدەگى ەڭ تانىمال رەپ ورىنداۋشىلاردىڭ ءبىرى. ول بىرنەشە ماراپاتتىڭ يەگەرى، ونىڭ ىشىندە ASCAP سىيلىعىن «ەڭ ۇزدىك حيپ- حوپ ورىنداۋشىسى» نوميناتسياسىندا جەڭىپ العان. سونداي- اق جاقىندا ەمينەمدى وزىپ، ەڭ كوپ قارالعان رەپەر اتاندى.

وسىعان دەىن قازاقستاندىق ءانشى دينارا كايرگوجانىڭ (بيسەنوۆا) بريتاندىق Golden time Talent حالىقارالىق بايقاۋىندا ءبىرىنشى ورىندى يەلەنگەنىن جازدىق.