اباي وبلىسىنداعى اۋىل مۇعالىمى الەم انشىلەرىنىڭ ءانىن وڭدەيدى
سەمەي. KAZINFORM - اباي وبلىسىنداعى اۋىلداردىڭ بىرىندە بيولوگيا ءپانىنىڭ مۇعالىمى الەمنىڭ تانىمال انشىلەرىنىڭ ءانىن وڭدەۋمەن اينالىسادى. ەرقانات ەرعازى ۇلى جۇمىس ىستەگەن شەتەلدىك جۇلدىزداردىڭ تىزىمىندە ايگىلى دۋا ليپا دا بار. ال قازىر وعان الەمگە ايگىلى يسپاندىق ءانشى روزاليادان جاڭا ءاندى بىرگە جازۋعا ۇسىنىس تۇسكەن.
ەرقانات ەرعازى ۇلى - اباي اۋدانى قاراۋىل اۋىلىنىڭ مامانداندىرىلعان مەكتەپ- گيمنازيا- ينتەرناتىندا بيولوگيا ءپانىنىڭ مۇعالىمى. جاس مامان ءوزى تۇلەپ ۇشقان ءبىلىم ورداسىنا جۇمىسقا ورنالاسقانىنا ءبىر جىلدان اسقان. بوس ۋاقىتىندا ارانجيروۆكا جازۋمەن اينالىسادى. ارىپتەستەرى دە ەرقاناتتى جان- جاقتتى تالانتتى ۇستاز دەيدى.
- مەكتەپتە وقىپ جۇرگەن كەزدىڭ وزىندە شىعارماشىلىققا جاقىن ەدى. ون ءبىرىنشى سىنىپتا مۋزىكالىق توپ قۇردى. تەك ءان ەمەس، بيگە دە يكەمى بار، - دەيدى ارىپتەسى روللان تلەۋحانوۆ.
ەرقانات سادۋحانوۆ شوۋ بيزنەستە «Eraholic» لاقاپ اتىمەن تانىمال. جاقىندا وعان الەمگە ايگىلى يسپاندىق ءانشى روزاليادان جاڭا ءاندى بىرگە جازۋعا ۇسىنىس ءتۇسىپتى.
- ول كىسى مەنىڭ الەۋمەتتىك جەلىدەگى جۇمىستارىمدى كورىپ ءجۇر ەكەن. كەيىن ءوزى حات جازىپ، بىرگە جۇمىس ىستەۋدى ۇسىندى. قازىر قانداي جانردا بولاتىنىن پىسىقتاپ جاتىرمىز. ال، ءان دايىن تۇر. جالپى ول تۋىندىنى قازاقستاندا تانىمال بولىپ كەلە جاتقان رەگگەتون ستيلىندە لاتىن موتيۆتەرىمەن شىعارعىم كەلەدى، - دەيدى ەرقانات سادۋحانوۆ.
10 جىلعا جۋىق اندەرگە ارانجيروۆكا جازۋمەن اينالىسىپ كەلە جاتقان مۋزىكانتقا قازاقستاندىق ارتىستەردەن دە سۇرانىس كوپ. ءبىراق، شەتەلدىك جۇلدىزدارمەن ءجيى جۇمىس ىستەيدى. ويتكەنى ەرقاناتتىڭ وڭدەۋ ءستيلى كوبىنە باتىس حالىقتارىنىڭ تالعامىنا ساي.
ءبىراق اۋىل مۇعالىمى مۋزىكا تەك حوببيىم، ال نەگىزگى جۇمىسىم - ۇستازدىق ەتۋ دەيدى.
التىنبەك ءاميت