جارما اۋدانىندا پوليتسەيلەر قاتتى ايازدا اداسقان شوپانداردى ءوز ءومىرىن قاتەرگە تىگىپ قۇتقاردى

سەمەي. KAZINFORM - اباي وبلىسىندا پوليتسەيلەر قاتتى ايازدا اداسقان شوپانداردى جاياۋ ءجۇرىپ ىزدەپ تاپتى.

Polisia.kz-تىڭ جازۋىنشا، 22-اقپان ساعات 01.24 تە «103» ارناسىنىڭ وپەراتورىنان اباي وبلىسىنىڭ جارما اۋدانىنداعى شاباق قىستاۋىنان شامامەن 4 ك م قاشىقتىقتا ەكى ەر ادام كومەك سۇراعانى تۋرالى ءوتىنىش كەلىپ تۇسكەن. قوڭىراۋ شالۋشى ارىپتەسىمەن بىرگە كەشكە قىستاقتان سۋىقبۇلاق اۋىلىنا شىققان.

جول بويىندا تراكتوردىڭ جانارمايى قاتىپ قالعانىن جانە ەر ادام كەرى قايتايىن دەسە، اداسىپ كەتكەنىن حابارلادى. كەيبىر جەرلەردە بايلانىس بولمادى. جىعىلعانعا جۇدىرىق بولىپ تەلەفوننىڭ قۋاتى دا تاۋسىلۋعا شاق قالعان. دالادا كەزىپ جۇرگەن ەر ادامدار شۇعىل قىزمەتتەرگە مەزگىل-مەزگىل قوڭىراۋ شالىپ، قاتتى جاۋراعانىن حابارلادى. جارما اۋدانىنىڭ ۋچاسكەلىك پوليتسيا ينسپەكتورلارى دەرەۋ كومەككە شاقىرىلدى. ىزدەۋ جۇمىستارى وڭاي بولماعان. ويتكەنى اداسقاندار وزدەرىنىڭ كوورديناتتارىن بەرە المادى.

پوليتسيا قىزمەتكەرلەرى داستان يمانوۆ پەن ەركەبۇلان سامالحان شامامەن باعىتتى ءتۇسىنىپ، تراكتور دوڭگەلەكتەرىنىڭ ىزىمەن شىققان جەردەن ادامداردى ىزدەۋ تۋرالى شەشىم قابىلدادى. نيۆا اۆتوكولىگىمەن دالانى ارالاپ ءجۇرىپ، پوليتسەيلەردىڭ وزدەرى قار قۇرساۋىندا قالىپ، كولىكتى تاستاپ، ءار مينۋت ماڭىزدى ەكەنىن ءتۇسىنىپ، ىزدەۋدى جالعاستىرۋعا شەشىم قابىلدادى. 

بۇل ۋاقىتتا اۋا تەمپەراتۋراسى 39- عا دەيىن جەتكەن ەدى.

ءوز ءومىرىن قاتەرگە تىگىپ، ۇسىك شالعان پوليتسەيلەر 2 ك م-دەن كەيىن تراكتورشىلاردى تاپتى. ەڭ قيىنى قىزمەتتىك كولىككە قايتۋ جولى ەدى، ايازدان السىرەگەن اۋىل تۇرعىندارىنا كومەكتەسۋ كەرەك بولدى.

- ەر ادامدار قۋانىشتىڭ كوز جاسىن جاسىرا المادى، بىزگە العىس ايتتى. ءبىز ولارمەن بىرگە قۋاندىق، ادامداردى قۇتقارۋ ءۇشىن ءبارىن جاساعانىمىزدى ءتۇسىنىپ، تولىق تىنىشتىق سەزىمىمەن ۇيگە قايتتىق، - دەدى داستان يمانوۆ.

 

اۆتور
ەلميرا ورالبايەۆا