اباي وبلىسىندا قىزمەتكەرلەرىن روگاتكامەن اتقان پوليتسيا باستىعى جۇمىستان قۋىلدى

سەمەي. KAZINFORM - اباي وبلىسى جارما اۋدانىنىڭ شار قالاسىنداعى پوليتسيا ءبولىمىنىڭ باستىعىنا قاتىستى قىزمەتتىك تەرگەۋ اياقتالدى.

بۇعان دەيىن الەۋمەتتىك جەلىدە بەينەباقىلاۋ كامەرالارىنا جازىلعان ۆيدەو تاراپ كەتكەن ەدى. وندا كورىنگەندەي، پوليتسيا ءبولىمىنىڭ باستىعى قول استىنداعى قىزمەتكەرلەرىن روگاتكامەن اتىپ، قۋىپ جۇرگەن. بۇل حالىق اراسىندا قىزۋ تالقىعا ءتۇستى.

اباي وبلىستىق پوليتسيا دەپارتامەنتىنىڭ حابارلاۋىنشا، ۆيدەوداعى وقيعا ۇجىم ىشىندەگى تيمبيلدينگ كەزىندە بولعان. باسشىلىقتىڭ تەرىس نيەتى بولماعانى انىقتالعانىمەن، بۇل جاعداي قىزمەتتىك ەتيكا نورمالارىنىڭ بۇزىلۋى رەتىندە باعالاندى.

- تارتىپتىك كوميسسيانىڭ قورىتىندىسى بويىنشا، شار قالالىق پوليتسيا ءبولىمىنىڭ باستىعى داۋرەن ءالجاپاروۆ قىزمەتتىك ەتيكا تالاپتارىن بۇزعانى ءۇشىن اتقارىپ وتىرعان لاۋازىمىنان بوساتىلدى، - دەلىنگەن اقپاراتتا.

ەسكە سالساق، وسىعان دەيىن وسكەمەن قالالىق ءبىلىم ءبولىمىنىڭ باسشىسى سوتتالعانى حابارلانعان.

اۆتور

تالعاتجان مۇحامەتبەك ۇلى