اباي وبلىسىندا جوعارى IT جانە روبوتوتەحنيكا كوللەدجى اشىلادى
سەمەي. KAZINFORM - اباي وبلىسىندا جوعارى IT جانە روبوتوتەحنيكا كوللەدجى اشىلماق. اباي وبلىسىندا IT سالاسى قارقىندى دامىپ كەلەدى.
بۇعان جاس ماماندار، ستۋدەنتتەر مەن مەكتەپ وقۋشىلارىنىڭ ازىرلەگەن جاڭا سيفرلىق جوبالارى مەن قوسىمشالارى دالەل بولىپ وتىر.
«ولاردىڭ ونەر تابىستارى قازىرگى زامانعا ساي، ءارى بۇكىل رەسپۋبليكا بويىنشا كەڭىنەن تارالدى. وسى باستامالاردى ودان ءارى دامىتىپ، قولداۋ ءۇشىن سەمەيدە جوعارى IT جانە روبوتەحنيكا كوللەدجىن اشۋ جوسپارلانۋدا. كوللەدج زاتايەۆيچ كوشەسى، 4 مەكەنجايىندا ورنالاسادى»، - دەپ حابارلادى وبلىس اكىمدىگىنىڭ باسپا ءسوز قىزمەتى.
قازىرگى ۋاقىتتا دايىندىق جۇمىستارى اياقتالدى. جاقىن ارادا قۇرىلىس باستالادى. وسىعان بايلانىستى ايماق باسشىسى نۇرلان ۇرانحايەۆ اتالعان ءبىلىم وشاعىندا بولىپ، جۇمىستارمەن تانىستى.
«بۇگىندە عيماراتتا ەنەرگيانى ۇنەمدەۋ جانە جىلىتۋ جۇيەلەرىن ورناتۋ جۇمىستارى جۇرگىزىلدى. ەندى عيماراتتىڭ شاتىرى مەن قاسبەتىن جوندەۋ، وقۋ كورپۋسىنىڭ ىشكى ارلەۋى، جىلىتۋ جانە جارىقتاندىرۋدىڭ «اقىلدى جۇيەلەرىن» ەنگىزۋ، جەدەلساتى ورناتۋ جوسپاردا بار. سونىمەن قاتار كوللەدج بازاسىندا ينتەراكتيۆتى مۇراجاي قۇرىلىپ، گاردەروب تولىعىمەن روبوتتاندىرىلادى. ايماق باسشىسى جۇمىس قارقىنىن باسەڭدەتپەي، بارلىق جۇمىستار مەرزىمىندە اياقتالۋى ءتيىس ەكەندىگىن اتاپ ءوتتى. وسىعان بايلانىستى جۇمىستى جەدەلدەتۋدى جانە مەردىگەر ۇيىمدارمەن اراداعى شارتتاردى جاساسۋدى تاپسىردى»، - دەلىنگەن اقپاراتتا.
سونداي- اق نۇرلان ۇرانحايەۆ كوللەدجدىڭ بولاشاق جوباسىمەن تانىستى. كوللەدج ساپالى IT ماماندار دايارلايتىن ورىنعا اينالۋى ءتيىس ەكەنىن، سوندىقتان بارلىق قاجەتتى جاعدايلاردى جاساۋ كەرەكتىگىن تىلگە تيەك ەتتى.