اباي وبلىسىندا شاحتادان التىن ۇرلاعان قىلمىستىق توپ مۇشەلەرى ۇستالدى

سەمەي. KAZINFORM - اباي وبلىسى جارما اۋدانىنداعى شاحتادان التىن ۇرلاعان 4 ادام ۇستالدى.

وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، ءتارتىپ ساقشىلارى جارما اۋدانىنداعى شاحتا اۋماعىنان قۇرامىندا التىنى بار كەن ۇرلاعان قىلمىستىق توپتى قۇرىقتادى.

«جەدەل-ىزدەستىرۋ شارالارى بارىسىندا پوليتسيا قىزمەتكەرلەرى قىلمىستىق توپتىڭ ىزىنە ءتۇسىپ، ءتورت ەر ادامدى ۇستادى. ولاردان مەتالل ىزدەگىشتەر، رەسپيراتورلار، كەن تاسۋعا ارنالعان قاپتار جانە شامامەن قۇرامىندا 3 كەلى التىنى بار كەن تاركىلەندى. وسىنىڭ سالدارىنان كەلتىرىلگەن جالپى شىعىن 3 ميلليون تەڭگەدەن اسقان»، - دەلىنگەن اقپاراتتا.

قازىرگى ۋاقىتتا اسا ءىرى كولەمدەگى ۇرلىق فاكتىسى بويىنشا سوتقا دەيىنگى تەرگەۋ امالدارى باستالدى. كۇدىكتىلەر ۋاقىتشا ۇستاۋ يزولياتورىنا قاماۋعا الىنعان.

ەسكە سالساق، وسىعان دەيىن وسكەمەندە بيزنەس اشپاق بولعان جىگىت الاياققا 23 ميلليون تەڭگە بەرگەنى حابارلانعان.

تالعاتجان مۇحامەتبەك ۇلى

اۆتور