اباي وبلىسىندا اجىراسقاندار سانى ارتتى

«اۋدان، قالالار اراسىندا سەمەي تۇرعىندارى وتباسىن كوبىرەك قۇرعان. ال ەڭ تومەنگى دەڭگەي اباي اۋدانىندا. وتباسىن قۇرعانداردىڭ ىشىندە ءبىرىنشى رەت نەكەگە تۇرعان ەرلەردىڭ ۇلەسى - 75,7 پايىز، ايەلدەر سانى - 75,1 پايىز. اجىراسقاندار اراسىندا قايتا نەكەگە تۇرۋ ۇلەسى ەرلەردە - 22,6 پايىز، ايەلدەردە - 22,1 پايىز» دەپ حابارلادى اباي وبلىسى اكىمدىگىنەن.

قالالاردا 2452 نەكە (71 پايىز)، اۋىلداردا 1000 نەكە (29,0 پايىز) تىركەلدى. العاش رەت نەكەگە تۇرعانداردىڭ ورتاشا جاسى ەرلەر ءۇشىن - 28,1، ايەلدەر ءۇشىن - 25,5 جاس.

«تىركەلگەن نەكەلەردىڭ 86,6 پايىزى مونوەتنيكالىق، ياعني ءبىر ۇلت اراسىنداعى جۇپتاردىڭ وتاسۋى، ال قالعان 13,4 پايىز - ەتنوسارالىق. اجىراسۋعا كەلەتىن بولساق، ولاردىڭ سانى الدىڭعى جىلمەن سالىستىرعاندا 5,4 پايىز كوبەيىپ، 1514 قۇرادى. قالالاردا 1148 اجىراسۋ (75,8 پايىز)، اۋىلداردا 366 اجىراسۋ (24,2 پايىز) تىركەلگەن» دەلىنگەن اقپاراتتا.

اجىراسۋدىڭ ەڭ جوعارى دەڭگەيى - كۋرچاتوۆ قالاسىندا، ال ەڭ تومەنى - اباي اۋدانىندا.

نەكە ۇزاقتىعى بويىنشا اجىراسۋدىڭ ەڭ كوپ ۇلەسى (29,5 پايىز) نەكەدە 5-9 جىل ءومىر سۇرگەن وتباسىلار اراسىندا، 18,7 پايىزى 10-14 جىل بىرگە وتاسقاندار اراسىندا بولعان.

اۆتور

تالعاتجان مۇحامەتبەك ۇلى