اباي وبلىسى وزىق تەحنولوگيالار جانە سيفرلاندىرۋ سالاسى بويىنشا شىنجاڭمەن تاجىريبە الماسادى
سەمەي. KAZINFORM - اباي وبلىسىنىڭ اكىمدىگى شەت ەلمەن وزىق تەحنولوگيالار جانە سيفرلاندىرۋ سالاسى بويىنشا تاجىريبە الماسۋدى كوزدەپ وتىر.
ءوڭىر اكىمى اپپاراتىنىڭ باسشىسى جاسۇلان سارسەبايەۆ باستاعان اباي وبلىسىنىڭ دەلەگاتسياسى ق ح ر ش ۇ ا ر- نا ساپارلاپ قايتتى. ساپاردىڭ نەگىزگى ماقساتى زاماناۋي تەحنولوگيالار، قوعامدىق ءتارتىپ جانە توتەنشە جاعدايلاردىڭ الدىن الۋ سياقتى نەگىزگى سالالاردا تاجىريبە الماسۋ بولدى. كەزدەسۋ اياسىندا دەلەگاتسيا مۇشەلەرى بىرنەشە ونەركاسىپتى ارالاپ، قىتايلىق كاسىپورىندار مەن مەملەكەتتىك ورگاندار قولداناتىن وزىق تەحنولوگيالار مەن ادىستەردى زەرتتەدى.
«شىڭجاڭ- ۇيعىر اۆتونوميالىق اۋدانىنا بارۋ بىزگە سيفرلاندىرۋ سالاسىنداعى جاڭا تەحنولوگيالارمەن تانىسىپ قانا قويماي، ءوڭىردىڭ دامۋىنا ىقپال ەتەتىن ماڭىزدى بايلانىستار ورناتۋعا جول اشتى. بۇل ساپار وبلىسىمىزدىڭ نەگىزگى سالالارىنداعى جۇمىس تيىمدىلىگىن ارتتىرۋعا مۇمكىندىك بەرەدى»، - دەدى وبلىس اكىمى اپپاراتىنىڭ باسشىسى.
قوعامدىق ءتارتىپتى قامتاماسىز ەتۋ جانە توتەنشە جاعدايلاردىڭ الدىن الۋ ماسەلەلەرىنە ەرەكشە نازار اۋدارىلدى. دەلەگاتسيا ش ۇ ا ر- نىڭ ءتيىستى ورگاندار جۇمىسىمەن تانىسىپ، وسى ادىستەردى اباي وبلىسىنا ەنگىزۋ مۇمكىندىگىن تالقىلادى.
بۇدان بولەك، دەلەگاتسيا ءۇرىمجى ءورت- قۇتقارۋ جاساعىنىڭ كوماندالىق ورتالىعىنا، شىڭجاڭ پوليتسيا اكادەمياسىنا، شىڭجاڭ باعدارلامالىق قامتاماسىز ەتۋ پاركىنە، «GAC passenger Car Co.، Ltd.» كومپانياسىنىڭ فيليالىنا، ءۇرىمجى ورتالىعىنىڭ مادەني جوسپارلاۋ زالى مەن «Guyuanxiang» قوعامدىق سەرۆيستىك ورتالىعىندا بولدى.
«بۇگىندە وبلىستا ءبىرقاتار سيفرلىق جوبا ىسكە اسىرىلىپ جاتىر. مىسالى، 2024 -جىلى ءبىرىڭعاي بايلانىس ورتالىعىن تولىق ىسكە قوسۋ جوسپاردا بار. بۇل ايماقتىڭ تىرشىلىگىن قامتاماسىز ەتۋ ماسەلەلەرى بويىنشا وتىنىشتەردى تاۋلىك بويى قابىلداۋدى جۇزەگە اسىرادى. سونىمەن قاتار مەملەكەتتىك قىزمەتتەر كورسەتۋ ءتارتىبى ماسەلەلەرى جانە اباي وبلىسى اكىمدىگىنىڭ قىزمەتىنە قاتىستى باسقا دا ماسەلەلەر بويىنشا كەڭەستەر بەرمەك. جوبانى ىسكە اسىرۋ اياسىندا سەمەيدە 2022 -جىلدىڭ قازان ايىنان باستاپ ءبىر جارىم مىڭنان استام «سەرگەك» كامەراسى ورناتىلدى. وبلىس اكىمدىگى توتەنشە جاعدايلاردىڭ الدىن الۋ جانە انىقتاۋ جۇيەسىندە وزىق تەحنولوگيالار مەن سيفرلاندىرۋدى ەنگىزۋدى كوزدەۋدە»، - دەپ حابارلادى وبلىس اكىمدىگىنىڭ باسپا ءسوز قىزمەتىنەن.
ايتا كەتەيىك، بۇل ساپار وبلىس اكىمى مەن ش ۇ ا ر پارتيا كوميتەتى ءتوراعاسى اراسىندا جاسالعان ىنتىماقتاستىق تۋرالى مەموراندۋمدى ىسكە اسىرۋ اياسىندا ۇيىمداستىرىلعان.