اباي اۋدانىنىڭ كوكباي اۋىلىندا اقىن، ابايدىڭ شاكىرتى كوكباي جاناتاي ۇلىنىڭ 165 جىلدىق مەرەيتويىنا ارنالعان «اباي سالبۋرىنى - 2026» رەسپۋبليكالىق قۇسبەگىلەر ءتۋرنيرى مارەگە جەتتى. ەكى كۇنگە سوزىلعان ۇلتتىق سپورت دوداسىنا ەلىمىزدىڭ 11 وبلىسى مەن 3 قالاسىنان 101 قۇسبەگى قاتىستى.
13-14-قاراشا كۇندەرى ۇيىمداستىرىلعان تۋرنيردە قۇسبەگىلەر بۇركىت، قارشىعا جانە يتەلگى سالۋدان ءوزارا سىنعا ءتۇستى. سونىمەن قاتار 20 دان استام قۇماي تازىنىڭ قاتىسۋىمەن جارىستار ۇيىمداستىرىلدى. ۇلتتىق سپورت مەرەكەسى اياسىندا ارقان تارتۋ، ساداق اتۋ جانە تاي كوتەرۋ سايىستارى دا وتكىزىلدى.
بىلتىر اباي قۇنانباي ۇلىنىڭ 180-جىلدىق مەرەيتويى اياسىندا ۇيىمداستىرىلعان رەسپۋبليكالىق تۋرنير بيىل كوكباي جاناتاي ۇلىنىڭ 165-جىلدىعىنا وراي جالعاسىن تاپتى. ءداستۇرلى دودا ەلىمىزدىڭ ءار وڭىرىنەن كەلگەن قۇسبەگىلەردىڭ باسىن قوسىپ، ساياتشىلىق ونەردى دارىپتەۋگە ارنالدى.
تۋرنير قورىتىندىسى بويىنشا يتەلگى سالۋدان اقمولا وبلىسىنىڭ وكىلى ەرلان كەنجەتايەۆ جەڭىمپاز اتاندى. ەكىنشى ورىندى قاراعاندى وبلىسىنان كەلگەن تەمىرالى تولەگەن ۇلى يەلەنسە، ءۇشىنشى ورىنداردى قاراعاندى وبلىسىنىڭ وكىلى ەرداۋلەت تولەگەن مەن جامبىل وبلىسىنىڭ قۇسبەگىسى باقداۋلەت باباجان ءبولىستى.
قارشىعا سالۋدان جامبىل وبلىسىنىڭ وكىلى بەرىكبولسىن باباجان ءبىرىنشى ورىنعا يە بولدى. تۇركىستان وبلىسىنان كەلگەن زاكي ماحمۇتحان ەكىنشى ورىن السا، الماتى وبلىسىنىڭ وكىلى ساعىنىش باەتباي مەن قاراعاندى وبلىسىنىڭ قۇسبەگىسى سەرىك قاريپوۆ ءۇشىنشى ورىنداردى يەلەندى.
بۇركىت سالۋدان استانا قالاسىنىڭ وكىلى ەراسىل سەرىكبەك ۇلى جەڭىمپاز اتاندى. ەكىنشى ورىندى شىعىس قازاقستان وبلىسىنان كەلگەن باۋىرجان سەمبايەۆ يەلەندى. ال قاراعاندى وبلىسىنىڭ وكىلى نۇرعازى قازىبەك پەن الماتى قالاسىنان كەلگەن ارمان قوشقاروۆ ءۇشىنشى ورىنداردى ءبولىستى.
قازاقى تازىلار جارىسىندا شىعىس قازاقستان وبلىسىنىڭ وسكەمەن قالاسىنان كەلگەن ەركەبۇلان ادىلبەكوۆ جەڭىمپاز اتاندى. ەكىنشى ورىندى اباي وبلىسى جارما اۋدانىنىڭ وكىلى سەرىك سلاتوۆ، ءۇشىنشى ورىندى شىعىس قازاقستان وبلىسى تارباعاتاي اۋدانىنان كەلگەن مەيىر جەتپىسوۆ يەلەندى.
ۇلتتىق سپورت تۇرلەرىنەن وتكەن سايىستاردا دا ۇزدىكتەر انىقتالدى. ساداق اتۋدان قاراۋىل اۋىلىنىڭ تۇرعىنى الماس قۇرمانوۆ ءبىرىنشى، اسقار ابەۋوۆ ەكىنشى، كوكباي اۋىلىنىڭ وكىلى اباي تولەۋبەكوۆ ءۇشىنشى ورىن الدى.
ارقان تارتۋدان كوكباي اۋىلىنىڭ كومانداسى جەڭىسكە جەتتى. ەكىنشى ورىندى قاراۋىل اۋىلىنىڭ، ءۇشىنشى ورىندى قۇندىزدى اۋىلىنىڭ كوماندالارى يەلەندى.
قۇندىزدى اۋىلىنىڭ تۇرعىنى ءاليحان ءادىلوۆ تاي كوتەرۋ سايىسىنىڭ جەڭىمپازى اتاندى.